Read turkana Ekimar 10 Bible Online

Ekimar 10 - turkana bible

Ekimar 10

¹Tolimok Ekapolon Akuj Musa tama,

²“Tosubak ngaburucho ngaarei a ngakwangae ana itiakitae, toliworos kesi inyaraunia iyong ngitunga tochunakinotor, kori taramakineta.

³Ani ekutakinio ngaburucho naarei nguna nikooyen, echunun ngitunga daang kiriama iyong anakituk a eam kang.

⁴Nakaneni, ani ekutakinio aburuch apei bon, ngikarikok a ngimacharin make echunakin kiriama iyong.

⁵Ani ekutakinio ngakutakinet nauriyesik, ngitela lu elomito kide eramakinete.

⁶Ani ekutakinio ngakutakinet nauriyesik na a ngaarei, ngitela lu elomito kuju kesi epudorete nikalapatan. Eraakasi ngakutakinet nauriyesik ngakitaramakinet ngitunga.

⁷Nakaneni, eraakasi ngakutakinet nakooyak nganyaraet ngitunga tochunakinos.

⁸Talokookeng a Aron lu eraakasi ngimurok a Akuj kesi eliworosi ngikakutak ngaburucho. “Etal logo ngesi iwapio jik.

⁹Ani ijiete esi anakwap kus ijiete ka ngimoe lukitijiete esi, tokutakis ngaburucho nguna. Ayong Ekapolon Akuj na arai Akuj kus kengarakini esi katoyuu alomoe kus.

¹⁰Tani ngirwa lua alakara, lu ikote ngirwa a ngisukukui alu eanyungarere elap, ta ngirwa lua Ngisukukui a Ekapolon Akuj, ikutakinete esi ngaburucho ilemunete ngakipeyos kus na inomio ka na a ekisil. Sodi kengarak ayong esi. Ayong arai Ekapolon Akuj na arai Akuj kus.”

¹¹Akolongit na a ngatomwon-arei a elap alo a ngiarei a ekaru alo a ngiarei napei kolong arotokinioto Ngisirael alo Misiri, abu edou kikeun aloeam a Akuj,

¹²Apot Ngisirael kisiakis arotokin anariet a Sinai. Abu edou tolot towo anariet a Paran.

¹³Apot kesi kisiakis alosit loger lo adungunitor Ekapolon Akuj kisitoru nia Musa.

¹⁴Ani nganyounet kech daang, arekina kesi. Ngulu ayakasi nabendera a ekitela a Yuda kesi engarenikinete a ngalooso. Nachon lo arai lokookeng a Aminadab ngesi arikit kesi.

¹⁵Nesanel lo arai lokookeng a Suar ngesi arikit lua ekitela a Isakar.

¹⁶Eliab lo arai lokookeng a Elon ngesi arikit lua ekitela a Sebulun.

¹⁷Ani iwaakinio eam kwap, torotokis ngitunga a a emachar a Gerichon ka lua emachar a Merari lu edakeenete eam.

¹⁸Ngulu ayakasi nabendera a ekitela a Reuben kesi atupakinete a ngalooso. Elisur lo arai lokookeng a Chedeur ngesi arikit kesi.

¹⁹Chelumiel lo arai lokookeng a Surichadai ngesi arikit lua ekitela a Simeon.

²⁰Eliasap lo arai lokookeng a Deuel ngesi arikit lua ekitela a Gad.

²¹Ani erumor torotokis ngitunga a Lawi lua emachar a Koas edakito ngiboro lu italeunitoe. Apon eam todukokinae eringa kesi nyenanguna nadakar.

²²Ngulu ayakasi nabendera a ekitela a Epiraim kesi atupakinete a ngalooso. Elichama lo arai lokookeng a Amiud ngesi arikit kesi.

²³Gamaliel lo arai lokookeng a Pedasur ngesi arikit lua ekitela a Manase.

²⁴Abidan lo arai lokookeng a Gideon ngesi arikit lua ekitela a Benjamen.

²⁵Ani esal, ngulu ayakasi nabendera a ekitela a Dan, kesi apot kisidiunos eraakasi ngasigerea nguna esidiyete. Ayeser lokookeng a Amichadai ngesi arikit kesi.

²⁶Pagiel lo arai lokookeng a Okiran ngesi arikit lua ekitela a Acher.

²⁷Nakaneni Aira lo arai lokookeng a Enan ngesi arikit lua ekitela a Naputal.

²⁸Eger ngolo anyouniyoto Ngisirael a ngalooso, nacha eramakineta.

²⁹Tolimok Musa lokamuran keng Obab lo arai lokookeng a Yesiro alo a akwap a Midian tama, “Kinyou sua alosit nakwap nakolong kichikakini Ekapolon Akuj sua atamar kiinakini. Bua erukosi ka sua. Kisubea sua iyong ngakiro naajokak kainyo echikak Ekapolon Akuj Ngisirael atamar eanyunete ngakiro naajokak.”

³⁰Tatachu Obab tama, “Nyalosi ayong. Abongori ayong nakwap kang ni eyakasi ngitunga kang.”

³¹Tolim Musa tama, “Nyikiisik kare sua. Iyeni iyong ni kilom sua anariet nabo iyong kirik sua.

³²Ani kibu iyong erukosi ka sua, kimori ngoni apiaro daang nakiinakini Ekapolon Akuj sua.”

³³Ani erotokinete ngitunga alo Sinai alo erai emoru a Akuj, apot kesi toloto a ngirwa a nguuni. Engarenikini asaduku a achamunet a Ekapolon Akuj, sodi taanyunea ni elomete kesi.

³⁴Aramakinet daang aramanakinete kesi, emukit edou a Ekapolon Akuj kesi naparan.

³⁵Arai nacha erotokinio asaduku a achamunet, tolim Musa tama, “Tonyou Ekapolon Akuj, kieala ngimoe kon nabo kirita ngulu kiremokino iyong!”

³⁶Ani nacha ewaar asaduku a achamunet tolim Musa tama, “Tobong Ekapolon Akuj, tobong ni eyakasi Ngisirael[3] lu eraakasi ngabunge.”