Read turkana Ekimar 11 Bible Online

Ekimar 11 - turkana bible

Ekimar 11

¹Apot ngitunga kisiakis akisuburare Ekapolon Akuj kotere ngichan lu aanyunito kesi. Ani iirari Ekapolon Akuj ngakiro nguna, abu tongo noi sodi tomeu akim lotunga. Abu akim torirau alokiding kech kinyasu ewae epei a adakar.

²Apot ngitunga kigoronokis Musa esakete kingarakin. Ani ilipi Musa Ekapolon Akuj, todunge akim.

³Sodi tolimokinae neni ekiro be Tabera[4] kainyo neni ngesi ariraunea akim a Ekapolon Akuj alokiding kech.

⁴Ayakasi ngitunga a ngakwapea anache lu aloose aapei ka Ngisirael. Emuit kesi akiring noi, sodi apot Ngisirael dang kisiakis akiburare nabo ebalasi, “Arai bo ataanyunete akiring nakinyami dang!

⁵Kolong alo Misiri kinyami sua ngikolea etiae lo kisaki, lupearai ngigialan. Kitamunit ngamunye, ka ngakaidei, ta ngikitunkuwoi lugelagelae kolong kinyami.

⁶Nakaneni adaun tokona ngikilinga yok. Emam jik akimuj ache kinyami, erai akimuj nabe mana naga bon kinyami ngirwa daang.” (

⁷Ekwaan mana ka ngikinyam luuchik nabo arai anyang -akwaan.

⁸Aloseenete ngitunga kirimo idepete mana. Kiriata tanyapidid, ani erumor kitukulata a ngamoti sodi tosubeta ngamugati nadapal. Ekwaan abobou ka na a ngamugati ana epotoi a akimiet a ngikito.

⁹Arai na edooto ngakop nalup nakwaare, todoto aapei ka mana.)

¹⁰Kiira Musa ngitunga daang iburaate, ewaasi a ngalooso anakituk a ngieman kech. Abu Musa nyeelakar ani angoikinitor Ekapolon Akuj Ngisirael. Sodi kingit Musa Ekapolon Akuj tama,

¹¹“Nyo isubea iyong ekasuban etich kon niaronon kona? Nyo kingoikinitor iyong ayong? Nyo kiinakinitor iyong ayong etich a ngitunga kalu kadaang?

¹²Ayong kolong auri ngitunga lugu daang a? Kori ayong kolong asubuni kesi ibalar iyong ayong ekok aberu nakadakan ngide, dio atadak kesi loger a ngide, sodi atoriko nakwap na kolong ichikakini iyong taapaakech a?

¹³Aliwae alemunea ayong akiring na ainakini ngitunga lugu daang? Kainyo kegoronokinete kesi ayong ebalasi, ‘Nakinae sua akiring atanyama.’

¹⁴Nyetiri ayong bon etich a ngitunga kalu kadaang, elal noi anikang.

¹⁵Ani kerai ngakiro isaki iyong asubea ayong kesi nugu, kisienoi ayong taarae atipei, sodi nyaarubak ayong etee aboliaro na ikoni naga.”

¹⁶Tolimok Ekapolon Akuj Musa tama, “Tochunak ngitunga ngitomwon-kaarei lu erimae nabo lusek eyenio atamar eraakasi ngikarikok a ngitunga. Toriku kesi loeam kang sodi towaa ka iyong kaina.

¹⁷Atiyaun ayong eruoro ka iyong kaina, alemuni ayong epewae a etau alo kainak ayong iyong, sodi ainak kesi, topedoreta kesi akingarakin iyong etich a ngitunga kalu, nyiisub iyong etich ngolo alopei.

¹⁸Tolimok tokona ngitunga tama, ‘Kitaleunos kotere akolongit naka moi. Iriamunete esi akiring na inyamete. Eira Ekapolon Akuj akigoro kus na ibalatar isakete akiring, nabo ibalasi ajok kolong Misiri. Kiinakini tokona Ekapolon Akuj esi akiring sodi tanyama.

¹⁹Meere akolongit apei inyameta esi akiring ngina, kori ngirwa ngiarei, kori ngikan, kori ngitomon, kori ngitomwon-arei,

²⁰pearai inyamete esi a elap a epei tanang epuruuni alokumes, kitopenik esi. Esubakinosi nguna kainyo ingero esi Ekapolon Akuj lo irukito ka esi nabo iburata esi anikeng ibalasi peajoikinit kolong ipudunete alo Misiri.’ ”

²¹Tolimok Musa Ekapolon Akuj tama, “Abe erai bo ekimar a ngitunga alu arikit ayong kalu 600,000, tarai ibala iyong abe iinakini kesi akiring na enyamete elap epei!

²²Ngaai ngaatuk ka ngamesekin engolio kimwoketa ngitunga lugu? Ngikolea a anam ngiai echunakinio kitemut kesi?”

²³Tatachak Ekapolon Akuj Musa tama, “Eyei ibore dir ni kepiyori ayong asubakin a? Ingolikini tokona iyong kesubakin ngakiro na alimu ayong kori kemam!”

²⁴Sodi topudo Musa nikalapatan tolimok ngitunga ngakiro na alimuni Ekapolon Akuj. Tochunak ngesi ngikarikok ngitomwon-kaarei, sodi kitowo kesi kiriama eam.

²⁵Ani erumor, totiyaun Ekapolon Akuj eyei lodou kisuruorik Musa. Tolem ngesi epewae a etau alosek ainakinit Musa, sodi nak ngikarikok lutomwon-kaarei ngulu. Napei alomarea etau nikech, kisiakis kesi akidwar loger a ngikadwarak a Akuj, ani anipei nabo kaneni, kililinga.

²⁶Edongito sek ngikarikok ngiarei nadakar, pealosito loeam. Anyaritae kesi Elidad ka Medad. Abu etau toloma nikech kaina anadakar, sodi kisiakis kesi dang akidwar loger a ngikadwarak a Akuj.

²⁷Tomotun esorokit epei alimokin Musa ngakiro na asubete Elidad ka Medad anadakar.

²⁸Abu Yochua lokookeng a Nun, losek arai ekengarakinan a Musa napei kolong eringa esorokana, tolimok Musa tama, “Ekapolon kang, kitonger kesi!”

²⁹Tatachu Musa tama, “Iyong ingichit ngakiro kang a? Esibit ayong tani nak Ekapolon Akuj ngitunga daang etau keng sodi kiremasi daang loger a ngikadwarak keng!”

³⁰Ani erumor, tobongosi Musa ka ngikarikok lutomwon-kaarei a Ngisirael nadakar.

³¹Atipei, abu Ekapolon Akuj tomeu ekuwam lo ayauni ngalurui ananam, na aporito ani arai amita apei alokidiama ngalup. Todoto kesi kiriama adakar tanang nikalonan ni erai ngakilomitae nakaalak alowaitin kadaang,[5]

³²Sodi apaaran ngina daang ka nakwaare, ta akolongit na atupit ngina daang, asubete ngitunga etich lo akirum ngalurui. Erumunit itwaan daang ngalurui na anangit apotis kech ngakiloi abunget ka na eporito. Tolokis kesi ngalurui wadaang anadakar sodi tookioto.

³³Ani eringa akiring nanyamat elal, abu Ekapolon Akuj tongoik ngitunga noi sodi taar ngitunga a edeke aloaronon.

³⁴Tolimokinae neni ekiro be Kibiros Atapa (eger keng ngesi atamar “Ngalielin a ekimue aloaronon”), kainyo neni apon tonukakinae ngitunga lukolong emuit akiring.

³⁵Ani enyounete ngitunga alo kibiros Atapa, apot toloto Aseros, sodi toloma neni.