Read turkana Ekimar 12 Bible Online

Ekimar 12 - turkana bible

Ekimar 12

¹Eusit sek Musa aberu a akwap a Kuch.[6] Apot Miriam ka Aron kitorono Musa kotere aberu ngina.

²Tolimut kesi tamasi, “Erai mono Musa bon isuruorit Ekapolon Akuj a? Nyisuruoro ngesi ngoni dang a?” Kiira Ekapolon Akuj ngakiro na alimunete kesi. (

³Arai Musa itwaan ni itiditeuna, etiditeun noi akidwang ngitunga daang anakwap.)

⁴Atipei, abu Ekapolon Akuj tolimok Musa, ka Aron, ta Miriam tama, “Topudutu esi luuni lugu aloeam kang.” Sodi topudutu kesi luuni daang.

⁵Totiyaun Ekapolon Akuj eyei napir a edou towo anakituk a eam tama enyara, “Aron! Miriam!” Pot luarei ngulu ngaren.

⁶Tolim Ekapolon Akuj tama, “Topupokisi tokona ngakiro na alimuni ayong! Ani eyakasi ngikadwarak a Akuj irukito ka esi, edodiunun ayong anikech anakisingolikineta nabo esuruori ayong kesi na irujaata.

⁷Etiakak ka eger lo esuruorea ayong Musa lo erai ekasuban etich kang. Ngesi eweikinit Ngisirael daang, lu eraakasi ngitunga kang.[7]

⁸ Kiruoro ayong ka ngesi kikobanakin ngakiro na ilereete meere ngakitadapet, nabo engolik ngesi eger lo ekoni ayong. Ikokinete esi itenikinete ekasuban etich kang Musa kitorono ai?”

⁹Abu Ekapolon Akuj tongoik kesi, sodi torotok.

¹⁰Ani erotokini edou aloeam, tobutokin enomokere nakwaan a Miriam tokwanger kea. Ani ingoliari Aron nia Miriam kingolik atamar kebutakin enomokere.

¹¹Tolimok Aron Musa tama, “Ekapolon kang, nyikirira kare sua kotere akisech nakisubit sua a abangaanut.

¹²Wara ngesi nyiikok itwaan ni edounio etoanit irikarit ibore akwaan epewae.”

¹³ Sodi kikaloik Musa Ekapolon Akuj tama, “Ee Akuj, kitangalek ngesi!”

¹⁴Tatachu Ekapolon Akuj tama, “Arai kimoakinite apakeng ngesi loreet, pekirumito ngesi ngileech kotere ngirwa ngikan-kaarei a? Kotere ngakiro nguna egolorio ngesi nikalapatan a adakar a ngirwa a ngikan-kaarei.”

¹⁵Apon Miriam togoloroe nikalapatan a adakar a ngirwa a ngikan-kaarei, nakaneni apot ngitunga nyeeramakis tanang ni abuunere Miriam tooma nadakar.

¹⁶Ani erumor taramakis ngitunga alo Aseros toloto toloma nariet a Paran.