Read turkana Ekimar 13 Bible Online

Ekimar 13 - turkana bible

Ekimar 13

¹Tolimok Ekapolon Akuj Musa tama,

²“Toseu ngikarikok ngitomon ka ngiarei, epei alokitela a epei, sodi tomea torebo akwap a Kanaan na ainakini ayong Ngisirael.”

³Abu Musa tomea kesi anariet a Paran loger losek adungunitor Ekapolon Akuj. Araakasi ngitunga ngulu daang ngikarikok a Ngisirael.

⁴Ngirora kech kesi lugu, Chamua lo arai lokookeng a Sakur ngesi aseunio alokitela a Reuben.

⁵Chapat lo arai lokookeng a Ori ngesi aseunio alokitela a Simeon.

⁶Kaleb lo arai lokookeng a Yepune ngesi aseunio alokitela a Yuda.

⁷Igal lo arai lokookeng a Yosep ngesi aseunio alokitela a Isakar.

⁸Ochea lo arai lokookeng a Nun ngesi aseunio alokitela a Epiraim.

⁹Paliti lo arai lokookeng a Rapu ngesi aseunio alokitela a Benjamen.

¹⁰Gadiel lo arai lokookeng a Sod ngesi aseunio alokitela a Sebulun.

¹¹Gadi lo arai lokookeng a Susi ngesi aseunio alokitela a Manase.

¹²Amiel lo arai lokookeng a Gemali ngesi aseunio alokitela a Dan.

¹³Sesur lo arai lokookeng a Mikael ngesi aseunio alokitela a Acher.

¹⁴Nabi lo arai lokookeng a Popisi ngesi aseunio alokitela a Naputal.

¹⁵Geuel lo arai lokookeng a Maki ngesi aseunio alokitela a Gad.

¹⁶Ngulu kesi araakasi ngikarebok lu ameari Musa akireb akwap. Kiloch ngesi ekiro a Ochea alo arai lokookeng a Nun, toliwor Yochua.

¹⁷Ani na amearea Musa kesi akireb akwap a Kanaan, abu tolimok tama, “Kapesi lowae lo alokwap, napei kane kitoro Negeb,[8] kiporosi tolomasi nakwap na ngimukur.

¹⁸Taanyutu eger lo ikoni akwap ngina, taanyut kejwoko ngitunga kori kemam, nabo kelalak kori kekidioko.

¹⁹Taanyutu nabo kejok akwap kech kori kerono, kori kedukitoe ngirerea kech ngawasea kori kemam.

²⁰Taanyutu keraakasi ngalup kech naketurupunak ngikinyam kori pekerai. Taanyutu nabo kemutono akwap kori kemam. Totitinyeketo, yaut ageor adio a akwap kangina.” (Araakasi ngirwa ngulu lu akokitotor ngamusabib.)

²¹Apot ngitunga ngulu toloto lowae lo alokwap, napei anariet a Sin alokuju tanang Reob, ni ayei diyete napak a Amas alowae alo alokwap.

²²Toloto kesi mono Negeb, ani erumor tanangut Eburon ni alomito ngimacharin a Aiman, ka Chechai, ta Talimai lu araakasi ngalesea a ngitunga alulangir-kooyak noi anyaritae Ngianak. (Esiaunio Eburon todukoe ngikaru ngikan-kaarei eringa ere a Soan lo eyei Misiri nyeduko.)

²³Pot kesi tanangut nadipo a Echikol, sodi totubut kaneni ateni na ayakasi ngamusabib. Kotere apotis a ateni kangina, arai ngitunga ngiarei apedorete akilepelep ateni a akitoe. Apot kesi yaut tani ngalam ka ngameyana. (

²⁴Alimokinio neni ekiro be adipo a Echikol[9] kotere ateni a ngamusabib na atubunete Ngisirael kaneni.)

²⁵Apot ngikarebok ngulu tobongut arumoret a akireb akwap a ngirwa a ngitomwon-omwon.

²⁶Pot kesi nia Musa ka Aron ta Ngisirael daang anibe Kadech ani eyei nariet a Paran. Tolimosi kesi ngakiro na aanyunete nabo kidodikis ngitunga ageor na agerunete.

²⁷Tolimokis kesi Musa tamasi, “Kireb sua akwap nakolong kimeari iyong sua. Ileleba ngakile ka akimiet a ao. Ageor kech dang ache naga.

²⁸Nakaneni ejwoko ngitunga lu elomito nakwap ngina, nabo ngirerea kech edukitoe ngawasea nabo topolok. Ani eyakasi nguna daang, kingolik sua tani ngalesea a ngitunga alulangir-kooyak noi kaina.

²⁹Ngiamalek kesi elomito Negeb. Ngiiti ka Ngiebus, ta Ngiamor kesi elomito nakwap na a ngimukur. Ngikanaan kesi elomito lokwaas a anam a Mediterenian ka lokwaas a angolol a Yorudan.”

³⁰Nakaneni kisililing Kaleb ngitunga lu esuburaate Musa, sodi tolim tama, “Potu apana tokona jik atoremo akwap atoloma. Kipedori ngoni alemar.”

³¹Sodi tolimut ngitunga lusek erukorito ka Kaleb tamasi, “Mam, nyikipedori ngoni alosit akitijwore ngitunga ngulu, kainyo ejwoko kesi kidwangito ngoni.”

³²Sodi apot kesi tokeikis lotunga a Ngisirael ngakiro naaronok a akwap ana alosito kesi akireb. Tolimut kesi tamasi, “Erono akwap ngina emam akimuj na itemokino tani ngitunga lu elomito inaa. Nabo araakasi ngitunga lu kingolikini sua daang lukokooyak.

³³ Kipotu tani engolikisi kaina ngitunga lulangir-kooyak noi lu eraakasi ngalesea a Anak. Atoditeutu sua anikech ekokisi ngidete.”