Read turkana Ekimar 14 Bible Online

Ekimar 14 - turkana bible

Ekimar 14

¹Nakwaare a akolongit kangina, apot ngitunga kigoro noi iuteete.

²Apot kesi kisuburata Musa ka Aron tamasi, “Arai bo kolong atotoaka alo Misiri dang, kori kane anariet!

³Nyo kiyaaritor Ekapolon Akuj ngoni nakwap ngina? Kiario ngoni alojie sodi torikoe ngaberu yok ka ngide yok kitodemar. Nyejoikinit ngoni kibongori Misiri a?”

⁴Apot kesi tolimonokinos make tamasi, “Potu atoseutu ekarikon, sodi atobongosi Misiri!”

⁵Ani erumor toriediko Musa ka Aron alongaren Ngisirael daang.

⁶Sodi apot Yochua lokookeng a Nun ka Kaleb lokookeng a Yepune, lusek arukito ka ngikarebok luche, tochilichilaasi ngiworui kech ialolongete,

⁷tolimokis ngitunga tamasi, “Akwap nakolong kilosit sua akireb erai akwap ajokon noi.

⁸Ani kejoikinito Ekapolon Akuj ngakiro yok, kiyaari ngesi ngoni inaa, sodi kiinak akwap naajokon ngina, na ileleba ngakile ka akimiet a ao ngina.

⁹Nyiingero Ekapolon Akuj nabo nyieam ngitunga a akwap kangina. Kidwangi ngoni kesi dir. Nyieam kesi kainyo kirukit ngoni ka Ekapolon Akuj nabo edwang ngesi ngakujo na igienosi ngitunga ngulu.”

¹⁰ Asakete ngitunga daang akimas Yochua ka Kaleb a ngamoru taara, nakaneni apot kesi atipei kingolikis akwangis naakwaan kea a Ekapolon Akuj alo kidiama eam.

¹¹Tolimok Ekapolon Akuj Musa tama, “Kangerete ngitunga lugu ayong tanang ori? Ewounete kesi akinup ngakiro kang tanang ori, tani kasub ayong ngakitoodikinet nakailiilok anikech?

¹²Ameuni ayong ngidekesinei luaronok atomunya kesi, nakaneni ketiliwori ayong iyong apakeng a ebukut aloapolon, alokajwon noi akidwang kesi!”

¹³Nakaneni tatachak Musa Ekapolon Akuj tama, “Ipuduni kolong iyong ngitunga lugu alo Misiri a agogongu kon. Ani na iirareta Ngimisiri ngakiro na isubakinea iyong ngitunga kon,

¹⁴elimokinete kesi ngitunga lu eyakasi nakwap naga. Nakaneni eirasi kolong ngitunga lugu atamar iyong Ekapolon Akuj kirukit ka sua, nabo kingolenakinio iyong na ewaar edou kon alokidiama kosi. Eirasi nabo atamar kirikit iyong sua a apir a edou naparan, ani nakwaare kitorik a apir a akim.

¹⁵Ani tokona kiar iyong ngitunga kon daang, etamarete ngibukui lukolong eirasi ekipur kon kona,

¹⁶‘Erikak Ekapolon Akuj ngitunga keng nariet kainyo akuruwori ngesi akitanang kesi nakwap nakolong echikakini ngesi atamar ainakini.’

¹⁷Tokona bocha, Ekapolon Akuj, kelipit atamar kidodiu agogongu kon sodi tosubak ngakiro nakolong kichikakini iyong sua ibala,

¹⁸‘Ayong Ekapolon Akuj, nyangoyeene atipei, nabo edodiununi ayong amina naationon, atarai nakamunoi, nabo arimanakini akisech ka aronis. Tani kikoni neni, nyamamakini ayong akirirare ngide ka ngitatae tanang nalesea na a ngauni ka na ngoomwon, kotere ngasechesea a ngikauriak kech.’

¹⁹ Tokona bocha, Ekapolon Akuj, kelipit atamar torimak akisech a ngitunga kalu, itemem ka ationis a amina kon ana nyilocho, loger lokolong irimanakinea iyong kesi napei arotokinioto alo Misiri tanang tokona.”

²⁰Tatachu Ekapolon Akuj tama, “Arimakini ayong kesi loger lokilipea iyong ayong.

²¹Nakaneni ekong ayong atamar, ani kona ayarea ayong dir, ka ni ayakar ayong nakwap wadaang,

²²emam tani ipei a ngitunga kalu ni elomari nakwap ngina. Engolikis kesi akwangis kang naakwaan kea, ka ngakitoodikinet nakailiilok nakolong asubi ayong alo Misiri ka nariet, nakaneni apot kesi keningo ayong ngakininget nakaalak, nabo towout akiwap ngakiro kang.

²³Nyelomarete kesi jik nakwap nakolong echikakini ayong taapaakech. Emam tani ipei kangulu kangero ayong ni elomari nakwap ngina jik.

²⁴Nakaneni etananguni ayong Kaleb lo erai ekasuban etich kang ka ngalesea keng nakwap nakolong alosit ngesi akireb, sodi toliwor akech, kainyo nyikote ngakiro keng nakus, nabo ewap ngesi ngakiro kang lokojokon.

²⁵ Tokona bocha, ani kona elomitotor Ngiamalek ka Ngikanaan nadipoe, toreas moi jik toloto nariet kitoro lowae lo a apas a Akaba.”

²⁶Tolimok Ekapolon Akuj Musa ka Aron tama,

²⁷“Kesuburaate ngitunga luaronok lugu ayong tanang ori? Kaup ayong eburas a ngitunga kalu!

²⁸Tolimok tokona kesi atamar abala ayong Ekapolon Akuj kona, ‘Ekongi ayong atamar ani kona ayarea ayong, kasubea esi ngakiro na isakete, ayong Ekapolon Akuj ngesi alimu nguna.

²⁹Itoakete esi sodi kiealakin ngawat kus nariet naga. Ani kona kisuburaata esi ayong, esi lu eraakasi ngikaru kus ngitomwon-arei ka lu iporito, emam tani ipei ni elomari nakwap ngina.

³⁰Kechikakini kolong ayong esi atamar ilomete inaa, nakaneni tokona, emam tani ipei kus ni elomari neni mati Kaleb ka Yochua.

³¹Ilimunete kolong esi atamar be kidemario ngide kus torikoe, nakaneni etananguni ayong kesi nakwap na ingero esi sodi toliwor awi kech.

³²Itoakete esi anariet kana.

³³Eliworosi ngide kus ngikeyokok anariet a ngikaru a ngitomwon-omwon, tanang esi daang itoakete. Eriamunete kesi ngichan ngulu kotere aronis kus.

³⁴Iriamunete esi ngichan kotere akisech kus a ngikaru a ngitomwon-omwon. Eliwor ekaru epei itemitoe ka akolongit apei a ngirwa alu kolong tomwon-omwon irebioto esi akwap. Iyenunete esi eger a aronis ana karemokinor ayong esi!

³⁵ Ekongi ayong atamar asubakini nguna alotunga aluaronok alu apupokin akinger ayong kalu. Itoakete esi daang kane anariet. Ayong Ekapolon Akuj ngesi alimu nguna.’ ”

³⁶Ngitunga lukolong ameari Musa akireb akwap kesi ayaunete ngakiro naaronok, sodi kisuburata ngitunga Ekapolon Akuj.

³⁷Abu Ekapolon Akuj inu kesi edeke loaronon, sodi totoaka.

³⁸Alotunga alutomon ka ngiarei kangulu, Yochua ka Kaleb make kesi apot toyara.

³⁹Ani elimokini Musa Ngisirael ngakiro na alimuni Ekapolon Akuj, apot kesi kigoro noi tosutonokis.

⁴⁰Ani iwalari, tonyout kesi nataparach elilim toloto akirem akwap na a ngimukur ebalasi, “Kinyou tokona sua alosit nakwap nakolong kichikakini sua Ekapolon Akuj. Kicham sua atamar kisechit.”

⁴¹Nakaneni tolim Musa tama, “Ani toliwor nyo peiwapeta esi ngakiro a Ekapolon Akuj? Kipiyori esi ibore daang!

⁴²Nyiilot. Kidwangete esi ngimoe kus kainyo nyirukito esi ka Ekapolon Akuj.

⁴³Ani itijikinete esi Ngiamalek ka Ngikanaan, itoakete esi alojie. Nyirukete esi ka Ekapolon Akuj kainyo ingero esi akiwap ngesi.”

⁴⁴Nakaneni apot kesi jik todokasi kidiama, toloto nakwap na a ngimukur, tarai bo tani nyenyouno asaduku a achamunet a Ekapolon Akuj ka Musa anadakar.

⁴⁵Sodi apot Ngiamalek ka Ngikanaan lu alomito neni, kitijikis kesi kidwanga, kiritasi jik tananga Orima.