Read turkana Ekimar 15 Bible Online

Ekimar 15 - turkana bible

Ekimar 15

¹Abu Ekapolon Akuj tolimok Musa tama,

²“Tolimok Ngisirael kona, ani inangete nakwap na kainakini ayong esi,

³epedori itwaan alemikin Ekapolon Akuj emong kori emesek, kori amesek, kori akine erai akipeyos na inomio, kori akipeyos na ikongit itwaan alemun, kori akipeyos na esaki itwaan alemun, kori akipeyos a esukukuu a Ekapolon Akuj. Ejoikinit akukuny a ngakipeyos kanguna Ekapolon Akuj.

⁴Itwaan daang nicha elemikini Ekapolon Akuj akipeyos na inomio, na erai amesek kori akine, ejoikinit imoriuni ka akipeyos a ngalemet na erai ngakiria naajokak akilo apei ka akimiet a ngikito alita apei,

⁵tolem nabo alemunet a emuna alita apei.

⁶Ani ipeyeo emesek, ejoikinit elemunio ngakiloi ngaarei a ngakiria anaajokak imorikina aapei ka akimiet a ngikito alita apei ka anus, toliworos akipeyos a ngalemet,

⁷kimorikinae aapei ka alemunet a emuna alita apei ka anus. Ejoikinit akukuny a ngakipeyos kanguna Ekapolon Akuj.

⁸Ani kelemikin Ekapolon Akuj emong erai akipeyos na inomio, kori akipeyos na ikongitere, kori akipeyos a ekisil,

⁹ejoikinit elemunio ngakiloi ngauni a ngakiria anaajokak imorikina aapei ka akimiet a ngikito ngalitae ngaarei, toliworos akipeyos a ngalemet,

¹⁰kimorikinae aapei ka ngalitae ngaarei a emuna. Ejoikinit akukuny a ngakipeyos kanguna Ekapolon Akuj.

¹¹“Ngiboro ngulu kesi ejoikinit imoriuniyo ka emong, kori emesek, kori amesek, kori akine.

¹²Ani elemunio ngibaren lu iporito ipei toliworos ngakipeyos, ejoikinit ekimar a ngiboro iatakinio itemem ka ngibaren ngulu.

¹³Ejoikinit Esiraelit daang esubi ngakiro nguna na elemunea akipeyos na epeikinio Akuj, na ekukunyikinit Ekapolon Akuj.

¹⁴Nakaneni ani keyei itwaan a akwap a ache ni irukito ka esi, kerai ekaloton kori ekeboyon, tasaki ngesi alemun akipeyos na epeikinio Akuj, na ekukunyikinit Ekapolon Akuj, ejoikinit ngesi iwapi ngakiro napei nguna.

¹⁵Napei tokona jik, ikwaan ngitalio[10] lu iwapete esi ka lu iwapete ngitunga lua ngakwapea anache, lu irukito ka esi. Ikwaan esi ka kesi anakonyen a Ekapolon Akuj.

¹⁶ Ikwaan ngitalio ka ngakiro na iwapete esi ka na iwapete kesi.”

¹⁷Tolimok Ekapolon Akuj Musa tama,

¹⁸“Tolimok Ngisirael kona, ani inangete esi nakwap nakainakini ayong esi,

¹⁹sodi tanyama esi akimuj na a akwap kangina, ejoikinit epewae itegeliario toliwor alemunet na elemikinitae Ekapolon Akuj.

²⁰Ani esaa lo imaata esi ngamugati a akim, ejoikinit amugati na ekingaren na elemunio analemet anakitet, elemunio toliwor alemunet a Ekapolon Akuj. Elemunio ngadekon nguna loger a ngadekon a ngikinyam alu iriatae.

²¹Irichakinete esi jiik alemanakin Ekapolon Akuj alemunet ngina anamugati ana imaate esi a akim.

²²“Nakaneni epedori itwaan iche tosech peiyechakinit, sodi nyiirichak ngitalio ngiche alotalio alu alimoki Ekapolon Akuj Musa.

²³Nabo epedorete ngitunga daang moi ekisidi akisech, sodi nyiirichakis ngakiro daang na adungokini kesi Ekapolon Akuj kisitoru nia Musa.

²⁴Ani kolong kesubito ngitunga akisech ngina peiyechakinito, ejoikinit kesi elemunete emong toliwor akipeyos na inomio, na ejoikinit akukuny keng Ekapolon Akuj, tolemut aapei ka akipeyos keng a ngalemet, ta na a emuna na itemokino. Ejoikinit nabo elemunete ekoroe toliwor akipeyos a akisech.

²⁵Italeuni emuron a Akuj kesi, sodi torimakinae kesi kainyo peeyechakinete kesi akisech, nabo apot tolemikis Ekapolon Akuj akipeyos a akisech kech toliwor akipeyos na epeikinitoe Ekapolon Akuj.

²⁶Erimakinio Ngisirael daang aapei ka ngitunga a ngakwapea anache lu erukito ka kesi, kainyo apot daang tosecha.

²⁷“Ani kesech itwaan peiyechakinit, ejoikinit elemuni akine na erai aka ekaru a epei toliwor akipeyos a akisech.

²⁸Italeuni emuron a Akuj ngesi alokeno alo ipeyonokinere Akuj, kitaleu itwaan ngini anakisech keng, sodi torimakinae.

²⁹ Erai etal ngolo lo iwapi itwaan daang ni esechi peiyechakinit, kerai Esiraelit kori itwaan a akwap a ache ni elomit neni.

³⁰“Nakaneni itwaan daang ni esechi iyechakinit, kerai Esiraelit kori itwaan a akwap a ache, asechaki ngesi Ekapolon Akuj emenya, nakaneni ejoikinit ngesi eario,

³¹kainyo anger ngesi ngakiro a Ekapolon Akuj, nabo asech etal a Akuj. Erai akitu keng aka akiding keng a ilope.”

³²Akolongit ache na ayakatar Ngisirael nariet, apot kesi toriamut itwaan ikeyeni ngakito akolongit a Sabato.

³³Apon itwaan ngini torikoroe nia Musa ka Aron, ta ngitunga luche daang.

³⁴Apon ngesi kiratakinae kainyo aringa kesi nyeyena ngakiro na esubakinere ngesi.

³⁵Sodi tolimok Ekapolon Akuj Musa tama, “Echamit itwaan ngini eario. Epote ngitunga kimasa ngesi a ngamoru anikalapatan adakar.”

³⁶Sodi apot ngitunga daang yaasi ngesi nikalapatan adakar, kimasa a ngamoru totoan, loger losek adungokinitor Ekapolon Akuj Musa.

³⁷Todungok Ekapolon Akuj Musa tama,

³⁸“Tolimok Ngisirael kona, tosubakisi ngatoron na isanisanitae kiwaakis lokwaasea a ngiworui kus, sodi kiwaakis auno napus natorosit daang. Ejoikinit esi isubete kongina jiik analesea kus kadaang.

³⁹Eliworosi ngatoron nguna ngakisitamunet a ngitalio. Ani ingolikinete esi kesi, kitamut ngitalio kang daang kiwapa, sodi nyiirearotor esi anikang kiwapa ngakiro na isakete esi ngikulepek nakiminarito.

⁴⁰Kisitamunete esi ngatoron nguna akirichakin ngitalio kang sodi toliworos esi ngikang jik.

⁴¹ Arai ayong Ekapolon Akuj na arai Akuj kus. Kepuduni kolong ayong esi alo Misiri atoliwor Akuj kus. Arai ayong Ekapolon Akuj.”