Read turkana Ekimar 16 Bible Online

Ekimar 16 - turkana bible

Ekimar 16

¹Apot Kora lokookeng a Ichar alo a emachar a Koas, alo a ekitela a Lawi, ka ngitunga a ekitela a Reuben nguuni lu araakasi Dasan ka Abiram lu araakasi talokookeng a Eliab, ta On lokookeng a Peles,

²tongero eger lo arikitor Musa ngitunga. Apot kesi tonyoikis Musa imorikina ka ngikarikok 250 a ngitunga aluyenan alu aseunete ngitunga.

³ Apot kesi tochununos nia Musa ka Aron tolimokis tamasi, “Eporo ngakiro kus napalem esakitae. Eraakasi ngitunga daang ngika Ekapolon Akuj, nabo kirukit ngoni daang ka Ekapolon Akuj. Nyo bo itopolounokotor esi alotunga a Ekapolon Akuj?”

⁴Ani iirari Musa ngakiro nguna, abu ngesi tadakakin nalup kilip.

⁵Ani erumor tolimok Musa Kora ka ngirukitos keng tama, “Idodiuni Ekapolon Akuj moi nataparach atamar ngae erai ikeng. Ngini erai ikeng, ngesi atamar ngini aseu ngesi, imiekini taapiya lokeno a ngakipeyos.

⁶Iyong Kora ka ngitunga kon tolemutu moi nataparach ngabelekeke nalemet akim,

⁷kiwaakis akim ka emitina yaasi ngaren Ekapolon Akuj, ataanyutu itwaan ni eseunit Ekapolon Akuj aniyok. Esi Ngilawi kesi eporo ngakiro kus napalem esakitae!”

⁸Torubak Musa isuruori Kora ebala, “Topupokisi esi Ngilawi!

⁹Kiditeikinit esi eger lo kitaleunio esi Akuj a Ngisirael ani eyakasi ngitunga luche sodi taapuuneta esi diyete keng, tosuba etich aloeam keng, ka akisub etich a ngitunga a?

¹⁰Kiinak ngesi esi ka Ngilawi luche arimatoi ngina. Nakaneni isakete tokona esi aliwor tani ngimurok!

¹¹Ngae sek Aron lo isuburaate esi? Erai Ekapolon Akuj ngesi ingerito esi ka ngirukitos kus.”

¹²Ani erumor tomea Musa itwaan anyarare Dasan ka Abiram, nakaneni apot kesi tolimut tamasi, “Nyikiponi sua!

¹³Nyitemokino tani eger lokolong kipudunio iyong sua alo Misiri, anakwap ana ileleba ngakile ka akimiet a ao, sodi kiyau aarakin nege nariet a? Isaki tokona nabo iyong aliwor ekapolon kosi a?

¹⁴Eringa iyong tani nyeyauna sua nakwap na ileleba ngakile ka akimiet a ao, kori eringa tani nyeinakina sua ngamanat, ka ngamanat a ngimusabib, tarai iyong logo kingalae sua. Nyikiponi sua!”

¹⁵Tongo Musa noi sodi tolimok Ekapolon Akuj tama, “Nyiicham ngakipeyos daang nacha elemunete ngitunga lugu. Nyesechakina ayong tani ipei kech. Emam esikiria kech tani epei lo alema ayong.”

¹⁶Tolimok Musa Kora tama, “Moi, echamit iyong ka ngirukitos kon lu eraakasi 250 ipote loeam a Akuj. Emini Aron dang neni.

¹⁷Elemuni ipei kus daang abelekeke keng nalemet akim kiwaak emitina, sodi yau lokeno lo a ngakipeyos.”

¹⁸Abu itwaan dang tolem abelekeke keng nalemet akim, kiwaak akim ka emitina sodi towo anakituk a eam aapei ka Musa ta Aron.

¹⁹Ani erumor tochunak Kora ngitunga daang towaa ingoliarito lowae lo a Musa ka Aron anakituk a eam. Atipei apot ngitunga kingolikis akwangis naakwaan kea a Ekapolon Akuj.

²⁰Tolimok Ekapolon Musa ka Aron tama,

²¹“Tachadaros alotunga kalu, sodi atomunya ayong kesi atipei.”

²²Nakaneni apot Musa ka Aron toriediko tatapa ngireetin kech ngalup, tamasi, “Ee Akuj, na irai alope a akiyar kadaang, na esechea itwaan ipei, ingoikini iyong ngitunga daang a?”

²³Tolimok Ekapolon Akuj Musa tama,

²⁴“Tolimok ngitunga tachadaros aloeaman a Kora, ka Dasan, ta Abiram.”

²⁵Sodi toloto Musa ka ngikarikok a Ngisirael nia Dasan ka Abiram.

²⁶Tolimok Musa ngitunga tama, “Tonyoutu tachadaros aloeaman a ngitunga aluaronok kalu, nabo nyiitap ibore cha daang ni erai ikech, nyikimunyar aapei ka kesi kotere ngasechesea kech daang.”

²⁷Apot ngitunga tachadaros aloeaman a Kora, ka Dasan, ta Abiram. Apudunito Dasan ka Abiram awaasi alodorin a ngieaman kech, aapei ka ngaberu kech ta ngide kech.

²⁸Tolimok Musa ngitunga tama, “Eger logo ngesi iyeneta esi atamar Ekapolon Akuj ngesi kameunit ayong akisub ngakiro nugu daang, nabo meere ngakiro kang a ilope asubi ayong.

²⁹Ani ketoaka ngitunga lugu make kona etoakeeneta ngitunga luche, totoaka emam erot eche irirator Akuj, ikwa meere Ekapolon Akuj kameunit ayong.

³⁰Nakaneni ani kesubaki Ekapolon Akuj ngakiro na nyeanyuna a ache, tapakas ngalup kilikosi kesi, sodi toloto kesi eyarete ni eyakasi ngikatoak, iyenunete esi atamar engerito ngitunga lugu Ekapolon Akuj.”

³¹Ani napei arumorea Musa akiruoro, apot ngalup na awaatar Dasan ka Abiram tapakas,

³²kilikosi kesi ka ngitunga a ngawiyei kech daang, aapei ka ngirukitos a Kora daang, ta ngiboro kech.

³³Toloto kesi eyarete ka ngiboro kech, kwap ni eyakasi ngikatoak. Tobunakin nabo ngalup alokidiama kech, tongopiasi kesi.

³⁴Tamataros Ngisirael luche daang lu ayakasi neni na eirareta kesi igorosi. Kiremasi Ngisirael tamasi, “Tamataros! Epedorete ngalup kilikosi ngoni dang!”

³⁵Ani erumor yau Ekapolon Akuj akim na arirauni tonomia ngitunga lu araakasi 250, lu ayaunito emitina akinom.

³⁶Ani erumor tolimok Ekapolon Akuj Musa tama,

³⁷“Tolimok Eleasar lokookeng a Aron alo erai emuron a Akuj atamar tolem ngabelekeke nanyangayek nalemet akim alotunga alu amunya akim, sodi kieala ngatotol tachada anabelekeke, kainyo italeunitoe ngabelekeke nguna.

³⁸Etaleunio kesi na ayaunere lokeno lo ipeyonokinere Akuj. Tolem ngabelekeke nalemet akim a ngitunga alu atoaka kotere akisech kech kalu, kitiek toliworos ngatubwae nabeleny nakaabenak, toliworos ngaburet ekeno a ngakipeyos. Eliwor ibore ngini akichikichika alo Isirael.”

³⁹Sodi tolem Eleasar lo arai emuron ngabelekeke nalemet akim nanyangayek nguna, kitiekae toliworos ngatubwae nabeleny nakaabenak naburet ekeno a ngakipeyos.

⁴⁰Arai ibore ngini akichikichika ani a Ngisirael atamar emam itwaan ni nyerai ales a Aron ni echamit ebuni lokeno a ngakipeyos, akinom emitina ani a Ekapolon Akuj. Ani kesub itwaan kongina, emunyario loger a Kora ka ngitunga keng. Asubasi ngakiro nugu daang loger losek adungokinitor Ekapolon Akuj Eleasar kisitoru ngakiro nguna nia Musa.

⁴¹Ani akolongit nache, apot ngitunga daang kisuburata Musa ka Aron tamasi, “Iara esi ngitunga a Ekapolon Akuj ngiche.”

⁴²Ani kechunun ngitunga akisuburare Musa ka Aron kerumor, apot kesi torearos lowae lo a eam kingolikis edou keburuchia eam, nabo kingolikis akwangis naakwaan kea a Ekapolon Akuj.

⁴³Toloto Musa ka Aron towaa alongaren eam,

⁴⁴sodi tolimok Ekapolon Akuj Musa tama,

⁴⁵“Tachadaros alotunga kalu, atomunya kesi atipei!” Apot Musa ka Aron toriediko tatapa ngireetin ngalup.

⁴⁶Abu Musa tolimok Aron tama, “Tolem abelekeke kon nalemet akim, tolem akim alokeno a ngakipeyos kiwaak, sodi kiwaak emitina nakim. Tamataror lotunga sodi kitaleu kesi. Kiburuburak! Angoiki Akuj ngitunga nabo esiak edeke loaronon.”

⁴⁷Abu Aron kiwap ngakiro nguna sodi tamataror abelekeke keng kiding ngitunga lu achunakina. Ani ingolikini ngesi atamar keting edeke loaronon ngitunga, abu ngesi kiwaak emitina nakim sodi kitaleu ngitunga.

⁴⁸Ani ikokini ngesi neni, tadaun edeke ngolo. Abu ngesi towo alokiding ngitunga lu atoakito ka lu ayerete.

⁴⁹Arai ekimar a ngitunga alu atoakete 14,700, peimarunitae lu atoakete anakisech a Kora.

⁵⁰Ani edaun edeke loaronon ngolo, abu Aron tobong nia Musa ani ayei, anakituk a eam.