Read turkana Ekimar 17 Bible Online

Ekimar 17 - turkana bible

Ekimar 17

¹Tolimok Ekapolon Akuj Musa tama,

²“Tolimok Ngisirael kiinakis iyong ngakito ngatomon ka ngaarei, tolemut ngikarikok a ngitela kadaang ngakito ngapei-pei. Kigir ekiro a ekarikon kadaang nakitoe keng,

³sodi kigir ekiro a Aron nakitoe a ekitela a Lawi. Emini ekarikon a ekitela daang akitoe keng.

⁴Yaa ngakito nguna loeam kang kiwaak ngaren asaduku a achamunet, ni kiriamunor ayong ka iyong.

⁵Nakaneni erupuni akitoe a itwaan ani aseuni ayong. Aloger kangolo atubori ayong eburas lokisuburaate esi Ngisirael jiik.”

⁶Abu Musa kisuruor Ngisirael. Apot ngikarikok daang nakis Musa ngakito. Arai daang ngakito ngatomon ka ngaarei, akitoe apei arai aka ekitela a epei, sodi apon kimorikinae ka akitoe a Aron dang.

⁷Ani erumor kiwaak Musa ngakito daang tooma eam, ngaren asaduku a achamunet a Ekapolon Akuj.

⁸Ani akolongit nache, elomari Musa loeam, abu ngesi kingolik akitoe a Aron, na arai aka ekitela a Lawi kerupu. Kebu topukia ka akilikiluun, nabo akoniunit ageor na ikoni engoomo.

⁹Abu Musa tolem ngakito daang kidodik Ngisirael. Apot kesi kingolikis nguna kesubakin, sodi abu ekarikon daang tolema akitoe keng a ilope.

¹⁰Tolimok Ekapolon Akuj Musa tama, “Tobua akitoe a Aron ngaren asaduku a achamunet. Ikachakinio akitoe ngina neni toliwor akichikichiket Ngisirael lukasechak. Idodikini kesi atamar etoakete pekepalikis eburas.”

¹¹ Tosubak Musa nguna loger lo adungokinitor Ekapolon Akuj.

¹²Tolimokis Ngisirael Musa tamasi, “Ikwa esal bo kosi ngolo!

¹³Ani ketoani itwaan daang ni ebuni diyete eam, ikwa ngikatoak bo sua daang!”