Read turkana Ekimar 18 Bible Online

Ekimar 18 - turkana bible

Ekimar 18

¹Tolimok Ekapolon Akuj Aron tama, “Iyong ka talokookon ta Ngilawi kesi kirirao erai kesechakin ibore aloeam kang. Nakaneni iyong bon ka talokookon kitingete ngakiro erai kesechakin etich a ngimurok a Akuj.

²Toriku ngiyenet kon lu eraakasi ngitunga a ekitela a Lawi, kiruko ka iyong kingarakis, sodi tosubeta iyong ka talokookon etich aloeam.

³Ejoikinit kesi esubete etich kech lokisubakinito iyong, ka ngitichisio lua eam, nakaneni nyechamitae kesi etapete ngiboro lu italeunitoe lu eyakasi lowae lo italeunitoe kori lokeno a ngakipeyos. Ani ketap kesi ngiboro ngulu, etoakete kesi aapei ka iyong.

⁴Ejoikinit kesi esubete etich ka iyong, nabo tosuba ngitichisio kech daang aloeam, nakaneni emam itwaan iche ni isubete ka iyong etich aapei.

⁵Iyong ka talokookon make isubete etich alowae alo italeunitoe ka ekeno a ngakipeyos, nyaangoikinea ayong Ngisirael.

⁶Ayong ngesi aseu ngiyenet kon lu eraakasi Ngilawi Alo Isirael, etiliwo kesi ainakinet nakainakinitae ayong. Etaleun kesi tarata ngikang sodi tosubeta ngitichisio kech aloeam.

⁷Nakaneni iyong ka talokookon kesi isubete ngitichisio daang iraakasi ngimurok a Akuj alokeno alo ipeyonokinere Akuj ka ewae lo italeunitoe noi. Erai etich lo a ngiboro kangulu ekon kainyo kainak ayong iyong ainakinet na iliworor emuron a Akuj. Itwaan niche cha daang ni ebuni diyete ngiboro lu italeunitoe, eario.”

⁸Tolimok Ekapolon Akuj Aron tama, “Kingolik a, kainakinit ayong iyong ngadekon daang nakalemanakinio ayong, na nyeraakasi ngakipeyos na inomio. Kainakinit ayong iyong ka talokookon ngadekon nguna toliworos nginerin kus jik.

⁹Ngakipeyos na italeunitoe noi daang na nyinomio alokeno a ngakipeyos, eraakasi ngakon. Ngakipeyos nguna kesi ngakipeyos a ngalemet, ka ngakipeyos a akisech, ta ngakipeyos a atachanot. Ibore daang nikalemikinitae ayong erai akipeyos na italeunitoe, erai ikon ka talokookon.

¹⁰Echamitae iyong inyami ngakipeyos nguna ani italeunitoe, nabo ngikiliok make echamakinitae enyamete. Kitiliwosi ngiboro ngulu lu italeunitoe.

¹¹“Nabo dang ngadekon daang nakalemikinito Ngisirael ayong ka ngadekon na iwakiwakio, eliworosi ngakon. Kainakinit ayong iyong ka talokookon, ka tanakookon ngadekon nguna toliworos ngakus. Epedori itwaan a awi kon daang ni italeunitoe akinyam.

¹²“Kainakinit ayong iyong ewae loajokon daang a ngalemet ana isiaunio tolemae ana kalemanakinete Ngisirael ayong ekaru daang, na eraakasi akimiet a ngikito, ka emuna, ta ngikinyam.

¹³Eraakasi daang ngakon. Epedori itwaan a awi kon daang ni italeunitoe akinyam.

¹⁴ “Ibore daang alo Isirael ni italeunio anikang emam itwaan itingakinit itwaan, erai ikon.

¹⁵“Iuriuna ni ekingaren daang kerai alotunga kori alobaren, nikalemikinito Ngisirael ayong erai ikon. Nakaneni ejoikinit iyong ichamuni ibore ni elemunio tobuarea ikoku ni ekingaren, nabo tacham tani ibore ni elemunio tobuarea ibarasit daang ni nyitaleunitoe.

¹⁶Ebuario ngide lu eraakasi elap epei, a ngaropiyae a ngakan itemem ka egielit losek egieleenere.

¹⁷Nakaneni emam itwaan egieli tobua ngiuriuna lua ekingaren a ngaatuk, ka ngamesekin, ta ngaanei, kainyo eraakasi ngikang jik, ejoikinit ipeyeo. Towatak ngaakot kech lokeno a ngakipeyos, sodi topee nikataronon erai akipeyos na epeikinitoe Akuj nakajoikinit ayong akukuny keng.

¹⁸Erai akiring a ngibaren kangulu akon loger lo eraakatar atorobu na iwakiwakio ka amuro nakitalio ngakon.

¹⁹“Kainak ayong iyong ka talokookon, ka tanakookon ngadekon daang na italeunitoe nakalemikinito Ngisirael ayong. Eraakasi ngakus jik. Erai ibore achamunet na nyichwangakin, na kichamakin ayong ka iyong ta ngalesea kon.”

²⁰Tolimok Ekapolon Akuj Aron tama, “Emam ibore ni erai ikiruma daang ni iriamuni iyong, nabo emam akwap a Isirael nakitiakakinio iyong. Ayong Ekapolon Akuj arai ibore ni iitanit iyong daang.”

²¹Tolim Ekapolon Akuj tama, “Ainak ayong Ngilawi alemunet apei anatomon a ngadekon ana kalemanakinete Ngisirael ayong. Erai ibore ngini ngesi etachitere etich lo esubete aloeam kang.

²²Nyejoikinit Ngisirael luche enangete diyete eam kainyo kesubakis kongina ichanyunete akitu.

²³Napei tokona jik, Ngilawi make esubete etich aloeam ka aweikin ngakiro a eam daang. Erai ibore etal lokajik lo iwapete tani ngalesea kus. Emam Ngilawi ibore ni eliwor ikech jik alo Isirael,

²⁴kainyo ainak ayong kesi alemunet apei anatomon a ngadekon anakalemanakinete Ngisirael ayong. Ngakiro nguna abalar ayong kesi emam ibore ni eliwor ikech jik alo Isirael.”

²⁵Todungok Ekapolon Akuj Musa

²⁶atamar tolimok Ngilawi tama, “Ani idiaunete esi alemunet apei anatomon, nakiinakini esi Ekapolon Akuj toliwor akus, ejoikinit esi ilemunete alemunet apei anatomon a ngadekon kanguna tolemikis Ekapolon Akuj.

²⁷Isikwaanikinio ngadekon nguna ka ngadekon na elemuni eketan analemet anakitet, ka emuna lokitetet.

²⁸Aloger kangolo, ilemikinete esi dang Ekapolon Akuj ngadekon na eraakasi ngakeng analemunet kadaang anapei-pei, ani eyakasi natomon-tomon idiauniyete esi alo Isirael. Tolemutu alemunet na a Ekapolon Akuj ngina nakis Aron lo erai emuron a Akuj.

²⁹Tolemutu ngadekon naajokak noi ani eyakasi nguna idiaut esi.

³⁰Ani ilemunete esi na ejokak noi, totinga esi lu idongete loger lo etingeenea eketan dang ibore ni idongi na elemunea ngadekon keng kerumor.

³¹Inyamete esi ka ngitunga a ngawiyei kus akimuj na idongi anicha inyameta, kainyo erai ngesi etachitere etich lo isubete esi aloeam.

³² Nyisechito esi erai kinyam, kainyo ilemikis esi Ekapolon Akuj ewae loajokon noi. Tochoito inyasunete ngainakinet a Ngisirael na italeunitoe, ani inyameta alemunet tani apei eringa nyipotoro ewae loajokon noi. Ani kisubakis esi kongina, kiario.”