Read turkana Ekimar 19 Bible Online

Ekimar 19 - turkana bible

Ekimar 19

¹Tolimok Ekapolon Akuj Musa ka Aron tama,

²“Eger a etal alo adungu Ekapolon Akuj ngesi logo. Tolimokisi Ngisirael atamar kitorujakis esi aite naarengan na emam ni ichwangakina tarai na nyitusubitae etich a ache,

³sodi taramut nia Eleasar alo erai emuron a Akuj. Taramarae aite ngina nikalapatan a adakar taarae alongaren Eleasar.[11]

⁴Ani erumor tolem Eleasar ngaakot ngache a ekimoin keng kiteraterak ngakiteraterakinet ngakan-kaarei lowae loa eam.

⁵Tolemunae aite daang etia ni etia, eleu, ka akiring, ka ngaakot, ta ngiboro a akook, kinomae alongaren Eleasar.

⁶Ani erumor tolem ngesi ngakito a echekereng ka isopo,*g** ta auno naarengan, tachakak kesi nakim.

⁷Ani kesubaki nguna kerumor, kilota ngesi ngiworui keng ka akwaan keng, nakaneni eliwor ngesi lo eringa nyitaleuno tanang ebong.

⁸Ejoikinit itwaan ni inomi aite dang ilotari ngiworui keng ka akwaan keng, nakaneni eliwor ngesi lo eringa nyitaleuno tanang ebong.

⁹Ani erumor tolem itwaan ni italeunitoe ekuron a aite kangina sodi kiwaak lowae lo italeunitoe a adakar. Iwaakinio ekuron ngolo neni toliworos Ngisirael imorenakinete ka ngakipi na italeununotor. Eliwor akitaleuno ngina alemaret akisech.

¹⁰ Ejoikinit itwaan ni alemuni ekuron ilotari ngiworui keng, nakaneni eliwor ngesi lo eringa nyitaleuno tanang ebong. Eliwor etal logo lokajik ani a Ngisirael ka ngitunga a ngakwapea anache lu elomito kiding kech.

¹¹“Itwaan cha daang ni etapi itwaan nikatoan, eliwor ni nyitaleuno a ngirwa a ngikan-kaarei.

¹²Italeun ngesi a ngakipi ana italeununere, akolongit na a ngauni ka na a ngakan-kaarei, sodi toliwor ngesi ni etaleun. Nakaneni ani pekilotar ngesi a ngakipi ana itosegare, akolongit na a ngauni ka na a ngakan-kaarei, nyitaleun ngesi.

¹³Itwaan cha daang ni etapi itwaan nikatoan sodi nyiitoseg, eliwor ni nyitaleuno kainyo emam itwaan awataki ngesi ngakipi na itesegare. Inyasuni ngesi eam a Ekapolon Akuj nabo nyimarunio ngesi atamar erai ipei a ngitunga a Akuj.

¹⁴“Ani ketoaniki itwaan loeam, eliwor itwaan cha daang ni eyei loeam esaa ngolo, kori ni elomari loeam, ni nyitaleuno a ngirwa a ngikan-kaarei.

¹⁵Achupa cha daang ka amot na emam apukenit[12] enikenikinitoe, eliwor na nyitaleuno.

¹⁶Itwaan cha daang ni etapi itwaan ni aario, kori ni atoani bon anikalapatan, kori itwaan cha daang ni etapi akoit a itwaan kori aliel, eliwor ni nyitaleuno a ngirwa a ngikan-kaarei.

¹⁷“Ani esakio akitaleun itwaan ni nyitaleuno, elemunio ekuron a aite anaarengan ana kolong enomio toliwor akipeyos a akisech, kiwaakinae natubwa sodi kiatakinae ngakipi nakaliwak.

¹⁸Kotere itwaan ni ekingaren, elemuni itwaan ni italeuno akitoe a ekitoe alobe isopo,*g** kirepak nakipi sodi kiteraterak loeam ka ibore daang ni eyei loeam, ka ngitunga lu eyakasi neni. Kotere itwaan nia ngiarei, elemuni itwaan ni italeuno ngakipi kiteraterak nitwaan ni atapit akoit a itwaan, kori atapit itwaan nikatoan, kori atapit aliel.

¹⁹Elemuni itwaan ni italeuno ngakipi kiteraterak nitwaan ni nyitaleuno akolongit na a ngauni ka na a ngakan-kaarei. Ani akolongit na a ngakan-kaarei, kitoseg ngesi itwaan. Ilotari ngesi ngiworui keng sodi kilotar anakipi, ani edooyori akolong toliwor ni italeuno.

²⁰“Itwaan daang ni aliwor ni nyitaleuno, ni nyitosega, idongi ngesi erai ni nyitaleuno kainyo emam itwaan abukoki ngesi ngakipi na itosegare. Inyasuni ngesi eam a Ekapolon Akuj nabo nyimarunitae atamar erai ipei a ngitunga a Akuj.

²¹Kirichakisi etal logo jik. Ejoikinit tani itwaan ni iteriteri ngakipi ilotari ngiworui keng. Itwaan cha daang ni etapi ngakipi nguna eliwor ni nyitaleuno tanang ebong.

²²Ibore daang ni cha etapi itwaan ni nyitaleuno, nabo itwaan daang ni cha etapi ibore ngini eliwor ni nyitaleuno tanang ebong.”