Read turkana Ekimar 2 Bible Online

Ekimar 2 - turkana bible

Ekimar 2

¹Tolimok Ekapolon Akuj Musa ka Aron tama,

²“Ani edukete Ngisirael adakar, toduk itwaan daang adakar a ngitunga keng a ilope, ni eyei abendera a emachar keng. Edukio adakar sodi kiriam eam kang.

³Ngulu elomete lowae lo alo kide, lo ipiripiruunea akolong, kesi lua abendera a adakar a Yuda, a ngalooso kech. Ekarikon kech ngesi Nachon lo erai lokookeng a Aminadab.

⁴Arai ekimar a ngitunga keng 74,600.

⁵Ngulu elomete diyete ngesi, kesi lua ekitela a Isakar. Ekarikon kech ngesi Nesanel lo erai lokookeng a Suar.

⁶Arai ekimar a ngitunga keng 54,400.

⁷Totupak ekitela a Sebulun. Eliab lo erai lokookeng a Elon ngesi erai ekarikon kech.

⁸Arai ekimar a ngitunga keng 57,400.

⁹Arai ekimar a ngalooso kadaang a ngitunga a Yuda 186,400. Kesi isiaunete torotokis.

¹⁰“Ewae lo alokuju ngesi elomete ngitunga a adakar a Reuben a ngalooso. Ekarikon kech ngesi Elisur lo erai lokookeng a Chedeur.

¹¹Arai ekimar a ngitunga keng 46,500.

¹²Ngulu elomete diyete ngesi, kesi lua ekitela a Simeon. Ekarikon kech ngesi Chelumiel lo erai lokookeng a Surichadai.

¹³Arai ekimar a ngitunga keng 59,300.

¹⁴Totupak ekitela a Gad. Ekarikon kech ngesi Eliasap lo erai lokookeng a Deuel.

¹⁵Arai ekimar a ngitunga keng 45,650.

¹⁶Arai ekimar a ngalooso kadaang a ngitunga a Reuben 151,450. Kesi araakasi lua ngaarei erotokinete.

¹⁷“Sodi epete Ngilawi edakito eam kiding ngalooso naarei ingarenikinete ka ngalooso naarei isidiyete. Erotokinete ngalooso daang etupup loger lo elometa nakwap, etingit daang abendera keng.

¹⁸“Ewae lo alo too ngesi elomete ngitunga a adakar a Epiraim a ngalooso kech. Ekarikon kech ngesi Elichama lo erai lokookeng a Amiud.

¹⁹Arai ekimar a ngitunga keng 40,500.

²⁰Ngulu elomete diyete ngesi, kesi lua ekitela a Manase. Ekarikon kech ngesi Gamaliel lo erai lokookeng a Pedasur.

²¹Arai ekimar a ngitunga keng 32,200.

²²Totupak ekitela a Benjamen. Ekarikon kech ngesi Abidan lo erai lokookeng a Gideon.

²³Arai ekimar a ngitunga keng 35,400.

²⁴Arai ekimar a ngalooso kadaang a ngitunga a Epiraim 108,100. Kesi araakasi lua nguuni erotokinete.

²⁵“Ewae lo alokwap ngesi elomete ngitunga a Dan a ngalooso kech. Ekarikon kech ngesi Ayeser lo erai lokookeng a Amichadai.

²⁶Arai ekimar a ngitunga keng 62,700.

²⁷Ngulu elomete diyete ngesi, kesi lua ekitela a Acher. Ekarikon kech ngesi Pagiel lo erai lokookeng a Okiran.

²⁸Arai ekimar a ngitunga keng 41,500.

²⁹Totupak ekitela a Naputal. Ekarikon kech ngesi Aira lo erai lokookeng a Enan.

³⁰Arai ekimar a ngitunga keng 53,400.

³¹Arai ekimar a ngalooso kadaang a ngitunga a Dan 157,600. Kesi araakasi lua esal erotokinete.”

³²Ekimar a Ngisirael kadaang alu emario a ngalooso a ngawiyei, arai 603,550.

³³Peemarunitae Ngilawi aapei ka Ngisirael luche loger lo kolong sek adungokinitor Ekapolon Akuj Musa.

³⁴Apot Ngisirael tosuba ngakiro daang na adungokinit Ekapolon Akuj Musa. Toduko kesi adakar, itwaan daang ni ayei abendera keng. Torotokis kesi, itwaan daang erukito ka ngitunga a emachar keng.