Read turkana Ekimar 20 Bible Online

Ekimar 20 - turkana bible

Ekimar 20

¹Tanangut Ngisirael daang nariet a Sin elap loa ekingaren, sodi toloma Kadech. Totoan Miriam kaina sodi tonukakinae neni.

²Amam ngakipi ani alomito kesi kaneni. Tochunun ngitunga kiriama Musa ka Aron

³sodi kiburakis ebalasi, “Arai bo kolong atotoaka alongaren eam a Akuj na atoaketa Ngisirael luche dang.

⁴Nyo kolong kiyauneta esi sua nariet naga? Isakete esi atotoaka sua ka ngibaren kosi a?

⁵Nyo kolong kipudunioto esi sua alo Misiri kiyaut nakwap naaronon na emam ibore erupununi naga? Emam ngikinyam, emam ngameyana, emam ngamusabib, emam ngalam. Emam tani nia ngakipi anamatan!”

⁶Torotokis Musa ka Aron alotunga sodi towaa anakituk a eam. Kijuuruoto kesi tatapa ngireetin ngalup, sodi kingolikis akwangis naakwaan kea a Ekapolon Akuj.

⁷Tolimok Ekapolon Akuj Musa tama,

⁸“Tolem aburo na eyei ngaren asaduku a achamunet, ani erumor tochunakis iyong ka Aron ngitunga. Kisuruorik ataaba yaga iteete kesi daang, sodi iyesunosi ngakipi anataaba, tamata ngitunga ka ngibaren kech.”

⁹Tolot Musa tolem aburo loger losek adungokinitor Ekapolon Akuj.

¹⁰Tochunakis ngesi ka Aron ngitunga ngaren ataaba, tolim Musa tama, “Topupokisi esi ngikechanak lugu! Esakitae sua kilemikini esi ngakipi anataaba kana?”

¹¹Ani erumor kikea Musa aburo taram ataaba ngaramet ngaarei, sodi kiyesun ngakipi elalak, tamata ngitunga daang ka ngibaren.

¹²Nakaneni kikilak Ekapolon Akuj Musa ka Aron tama, “Aloger emamakar esi anupit anagogongu kang ana italeuno alongaren Ngisirael, nyirikete esi kesi tolomasi nakwap na kolong echikakini ayong kesi.”

¹³Asubasi ngakiro nguna alo Meriba,[13] ani kolong esuburaata Ngisirael Ekapolon Akuj, sodi kidodik Ekapolon Akuj kesi atamar etaleuno ngesi.

¹⁴Tomea Musa ngitunga alo Kadech toloto lokapolon a Edom. Tolimokis ngesi tamasi, “Ebunit akiroit naga ani eya ngiyenet kon, lu eraakasi ngitela a Ngisirael. Iyeni iyong ngichan lu kiriamu sua,

¹⁵ka eger lokolong alooso taapaakosi Misiri, nikolong kibooyo sua ngikaru lukaalak. Aboliatar Ngimisiri taapaakosi ka sua

¹⁶sodi ekaloikisi sua Ekapolon Akuj atamar kingarak. Abu ngesi kiira akigoro kosi, sodi tomeu emalaikat lo kipuduni sua alo Misiri. Kiya tokona sua lore a Kadech lo eyei lokukuor a akwap kon.

¹⁷Tachamakinae kare sua kitori nakwap kon. Nyikinachari sua alorukudi atoloto namanat kus kori namanat a ngimusabib, nabo nyikimasi ngakipi a ngakare kus. Kitori sua lorukudi loapolon jik tanang kipudori anakwap kon.”

¹⁸Nakaneni tatachut Ngiedomae tamasi, “Kinger sua esi itorete nakwap kosi! Ani kisak esi akitorun, kiponi sua etijikisi esi.”

¹⁹Tolimut Ngisirael tamasi, “Kitori sua lorukudi loapolon nakaneni ani kimat sua kori ngibaren kosi ngakipi kus, kitachi sua. Akitor bon kisaki sua.”

²⁰Tolimut nabo Ngiedomae tamasi, “Kinger sua!” Tolot ajore a ngasigerea natikajwon akitijikin Ngisirael.

²¹Ani aloger angerioto Ngiedomae Ngisirael itorete nakwap kech, apot Ngisirael toreas kitoro lorot eche.

²²Torotokis Ngisirael daang alo Kadech tanangut moru a Hor,

²³lokukuor a Edom. Tolimok Ekapolon Akuj Musa ka Aron kaina tama,

²⁴“Nyelomari Aron nakwap nakolong echikakini ayong Ngisirael. Etoani ngesi kainyo iwounete kolong esi luarei akiwap etal kang alo Meriba.

²⁵Toriko Aron ka lokookeng Eleasar moru a Hor,

²⁶ani enangi inaa, tobut ngiworui lu enapit Aron eraakar emuron a Akuj sodi kitanap Eleasar. Etoanikini Aron inaa.”

²⁷Tosubak Musa nguna adungokinit Ekapolon Akuj. Todokasi kesi kidiama emoru a Hor iteete ngitunga daang.

²⁸ Tobut Musa ngiworui a Aron lu eraakar emuron a Akuj kitanap Eleasar. Totoan Aron kaina alokidiama emoru, sodi totiyaunos Musa ka Eleasar alokidiama emoru.

²⁹Apot ngitunga daang toyena atamar atoana Aron, sodi tosutonokis a ngirwa a ngitomwon-uni kotere akitu keng.