Read turkana Ekimar 21 Bible Online

Ekimar 21 - turkana bible

Ekimar 21

¹Na eirarea ekapolon a Ngikanaan lo a Arad, lo alomit Negeb atamar eponito Ngisirael iwapito erot lo a Asarim abu ngesi kitijik kesi sodi torik ngiche.

²Apot Ngisirael kikongo ani a Ekapolon Akuj ebalasi, “Ani kimiek iyong sua atoremo ngitunga lugu, kitiliwori sua kesi ka ngirerea kech ngikon jik, sodi enyasutu ngirerea kech.”

³ Abu Ekapolon Akuj kiira ngakiro kech, sodi kingarak kesi akirem Ngikanaan. Apot Ngisirael tomunyasi kesi nabo kinyasut ngirerea kech, sodi tolimokis akwap ngina ekiro be Orima.[14]

⁴Torotokis Ngisirael alomoru a Hor, kiwapa erot lo elosi napak a Akaba sodi kirimieto akwap a Edom. Apot kibunyakinos analotoru kech,

⁵sodi kisuburata Akuj ka Musa, ebalasi, “Nyo kolong kipudunio iyong sua alo Misiri atotoanikisi nariet na emam akimuj ka ngakipi naga? Nyikinaikini sua nabo akimuj naaronon naga!”

⁶Abu Ekapolon Akuj tomeu ngimunio luadwarak lotunga, tokonyakonyaasi Ngisirael lukaalak totoaka.

⁷Potu ngitunga nia Musa tamasi, “Kisech sua ani kisuburaa Ekapolon Akuj ka iyong. Kilip tokona Ekapolon Akuj tolema ngimunio lugu.” Sodi abu Musa kilipak ngitunga.

⁸Ani erumor tolimok Ekapolon Akuj Musa atamar tosubak emun a asuat kiwaak napir, sodi itwaan daang ni ekonyi emun, kingolik emun lo a asuat tojoker.

⁹ Abu Musa tosubak emun a asuat ananyang sodi kiwaak napir. Itwaan cha daang ni akonyi emun, abu kingolik emun lo a asuat ananyang, sodi tojoker.

¹⁰Torotokis Ngisirael toloma Obos.

¹¹Ani erotokinete kaneni, toloma Abarim anariet ana eyei kide akwap a Moab.

¹²Ani erumor toloma nadipo a Sered.

¹³Ani enyounete kaneni, toloto toloma kwap angolol a Arinon, anariet ana enangit nakwap a Ngiamor. (Arai Arinon ekukuor a Ngimoab ka Ngiamor.)

¹⁴Ngakiro nguna ngesi igiritere nakitab a ngijiesinei a Ekapolon Akuj atamar, “Ere a Waeb anakwap a Supa, ka ngadipoe a Arinon,

¹⁵ka ngakokoriyoret a ngadipoe, na enangito lore a Ari, tanang lokukuor a Moab.”

¹⁶Ani enyounete kaneni toloto ni enyaritae Ngakare, ni alimokinea Ekapolon Akuj Musa tama, “Tochunak ngitunga daang wapei ainak ngakipi.”

¹⁷Sodi toeokis Ngisirael eeos logo. “Ngakare yautu ngakipi kus. Sodi atoeonokisi sua ngakipi.

¹⁸Akar na abokete ngikarikok a ngitunga, ka ngikajakaanak. Ebokio a aburo a apolou, ka ngakito kech.” Torotokis kesi anariet tananga Matana.

¹⁹Ani enyounete kaneni, toloto Naaliel, ani enyounete kaneni toloto Bamos,

²⁰ani enyounete kaneni toloto nadipo a akwap a Ngimoab, kwap aita a emoru a Pisiga, na erounit ariet.

²¹Ani erumor tomeasi Ngisirael ngitunga nia Sion alo arai ekapolon a Ngiamor tamasi,

²²“Kimiekinae sua etoro nakwap kon. Kiwapi sua ka ngaatuk kosi erukudi jik, nyikinachari namanat kus ka namanat a ngimusabib, nabo nyikimasi ngakipi a ngakare kus. Kitori sua lorukudi loapolon[15] jik tanang kipudori anakwap kon.”

²³Nakaneni abu Sion tonger Ngisirael itorete nakwap keng. Abu ngesi tochunak ngasigerea keng toloto Yaasa anariet kitijikis Ngisirael.

²⁴Nakaneni apot Ngisirael taara ngimoe kech lukaalak alojie, sodi todemasi akwap kech napei anangolol a Arinon tanang kwap Yabok, nia Ngiamon, kainyo eyokiyo ekukuor a Ngiamon lokojokon.[16]

²⁵Apot Ngisirael todemasi Ngiamor ngirerea daang a aapei ka ere a Echibon ka ngadakarin keng daang, sodi toloma neni.

²⁶Echibon arai ere apolon a Sion alo arai ekapolon a Ngiamor, losek etijit ekapolon longorot a Ngimoab, sodi tolema akwap keng daang tanang nangolol a Arinon.

²⁷Ngakiro nguna kesi ebalatar ngikaitak eeosi, “Potu Echibon, lore a Sion alo erai ekapolon! Kisaki engolikisi edukio, tobong loger longorot.

²⁸Kolong alore alo a Echibon kalo, anyouniyete ngasigerea a Sion loger a akim. Kinyasut ere a Ari alo Moab, kirikasi[17] ngimukur alowae alo alokidiama Arinon.

²⁹ Oitiakoi! Abe etioko nginyas ianyunete esi ngitunga a Moab! Esi lu ilipito Chemoch, Kimunyar esi! Emiekini kolong akuj kus ngikiliok edokinete nakwap ache. Kimiek ngaberu eliwor ngarikon a ekapolon a Ngiamor.

³⁰Nakaneni amunyar tokona ngalesea kech. Napei alo Echibon tanang Dibon. Napei alo Nachim tanang Nopa, diyete Medeba.”

³¹Sodi apot Ngisirael toloma nakwap a Ngiamor.

³²Tomea Musa ngitunga akireb Yaser. Tolemasi Ngisirael ere ngolo ka ngadakarin keng, sodi kitwarakis Ngiamor lu alomito neni.

³³Ani erumor toreas Ngisirael kiwapakis erot lo elosi Bachan. Abu Ogu lo arai ekapolon a Bachan potu ka ngasigerea keng akitijikin Ngisirael alo Edirei.

³⁴Tolimok Ekapolon Akuj Musa tama, “Nyiem ngesi. Kainakini ayong iyong agogongu na idwangea ngesi, ka ngitunga keng daang, ta akwap keng. Tosubakinea ngesi ngakiro nakolong isubakinea iyong Sion, lo arai ekapolon a Ngiamor lo apolokinit ere a Echibon.”

³⁵Sodi apot Ngisirael taara Ogu, ka talokookeng, ta ngitunga keng daang. Emam tani ipei ni abu topuun toyar. Ani erumor toloma kesi nakwap a Ogu.