Read turkana Ekimar 22 Bible Online

Ekimar 22 - turkana bible

Ekimar 22

¹Torotokis Ngisirael toloma naroatin a Moab kide Yorudan, ni ekienyikina ka Yeriko.

²Ani iirari Balak lokookeng a Sipor lo arai ekapolon a Moab, ngakiro na asubeta Ngisirael ekapolon a Ngiamor ka eger lo alalakiata Ngisirael,

³tobul ngesi noi ka ngitunga keng daang.

⁴Tolimokis Ngimoab ngikarikok a Ngimidian tamasi, “Irigaari ajore naga ibore daang kane atipei, loger a emong alo irigae nginyia edak.” Sodi abu Balak ekapolon a Moab

⁵tomea ngitunga anyarare Balaam lokookeng a Beor lo ayei Pesor, diyete angolol a Eupurate anakwap a Amau. Tolimokis kesi Balaam ngakiro a Balak na abalasi, “Asaki ayong iyong toyen atamar abu ebukut etia ni etia alo Misiri. Apetakin ngitunga keng wadaang esakete alemar akwap yok.

⁶ Elalak kesi kidwangito ngoni. Bua kare kilamakinae ngitunga lugu, ejok bo atopedosi ngoni akidwang kesi ka akiritar anakwap. Ayeni ayong atamar ani kilimu iyong apiaro, epiario ngitunga. Ani kilimu iyong ngilam, ilamio ngitunga.”

⁷Sodi apot ngikarikok a Ngimoab ka Ngimidian yaasi atachanot a ngilam nakis Balaam, tolimokis tani ngakiro a Balak.

⁸Tolimok Balaam kesi tama, “Topero nege ani moi katolimok ngakiro na kalimokini ayong Ekapolon Akuj.” Sodi topero ngikapolok a Ngimoab ngulu neni ka Balaam.

⁹Bu Akuj nia Balaam kingit tama, “Tangae ngitunga lu irukitotor iyong lugu?”

¹⁰Tatachu Balaam tama, “Balak lo erai ekapolon a Moab ngesi emeunit kesi alimokin ayong

¹¹atamar apetakin ngitunga ngiche apote alo Misiri akwap wadaang. Esaki Balak ayong elam ngitunga ngulu, topedorea akitojwore kesi ka akiritar.”

¹²Tolimok Akuj Balaam tama, “Nyiirukosi ka ngitunga lugu, nabo nyiilam Ngisirael kainyo apiarit ayong kesi.”

¹³Ani enyouni Balaam nataparach tolimok ngitunga a Balak tama, “Toloto nakwap kus. Anger Ekapolon Akuj ayong kirukori ka esi.”

¹⁴Sodi tobongosi kesi nia Balak tolimokis tamasi, “Awouni Balaam akirukun ka sua.”

¹⁵Tomea nabo Balak ngikarikok ngiche lukaalak nabo topolok kidwangito lu ekingaren.

¹⁶Toloto kesi tolimokis Balaam ngakiro a Balak na abalasi, “Wara kare ibore iche nyikiratak iyong abunere nikang!

¹⁷Katachi ayong iyong lokojokon nabo kasubakinea daang na isaki iyong. Bua kare kilamakinae ngitunga lugu.”

¹⁸Nakaneni tatachu Balaam tama, “Tani kainaki Balak ayong ngaropiyae daang ka egolit lo eyei kai keng, nyapedori ayong echwangak tani wadiochichi ngakiro na adungu Ekapolon Akuj na erai Akuj kang.

¹⁹Topero nege kare, loger lokolong aperioto luche, sodi atoyenea keya ngakiro ngache kalimokini Ekapolon Akuj ayong kori kemam.”

²⁰Bu Akuj nia Balaam nakwaare tolimok tama, “Ani keponito ngitunga lugu anyarare iyong kirukosi ka kesi, tonyou, tolot kirukosi ka kesi, nakaneni tosub nguna kalimokini ayong iyong make.”

²¹Ani enyouni Balaam nataparach, todoka losikiria keng kirukosi ka ngikarikok lu a Ngimoab ngulu.

²²Abu Akuj tongo ani alosio Balaam. Ani na ametor Balaam esikiria keng, arukito ngesi ka ngikedalak keng ngiarei. Bu emalaikat a Akuj towo alorukudi kiratak ngesi nyiitor.

²³Ani ingolikini esikiria emalaikat ewey totingite ekileng, abu torei toisik erukudi tolot namanat. Taram Balaam esikiria tobuu lorukudi.

²⁴Sodi towo emalaikat alorot aloochi alo angichakina kiding ngamanat ngaarei, toya ngawasea lowaitin daang.

²⁵Na engolikinea esikiria emalaikat, tolot tatapakin nawas, sodi tokiritoo awas akeju a Balaam. Taram nabo Balaam esikiria.

²⁶Tolot nabo emalaikat ngaren. Tolot towo anikaadingan ani amam ni itorio alowaitin kadaang.

²⁷Ani ingolikini esikiria emalaikat nabo, kinapakin nalup. Tongo Balaam kisiak akidet esikiria a aburo keng.

²⁸Kisuruorik Ekapolon Akuj esikiria, sodi tolimok esikiria Balaam tama, “Nyo kasubakinea ayong iyong? Nyaanu ngakiro kiramea iyong ayong ngaramet nauni nugu?”

²⁹Tatachu Balaam tama, “Kainyo kitabangaan iyong ayong! Arai atotingite ayong ekileng, kaar ayong iyong.”

³⁰Tatachu esikiria tama, “Meere ayong esikiria kon a, lo kimeat iyong ngirwa daang lu iyarea iyong a? Kasubea ayong iyong nakanuan loger logo a?” Tatachu Balaam tama, “Mam.”

³¹Ani erumor kisingolik Ekapolon Akuj Balaam emalaikat ewei etingit ekileng. Tadakakin Balaam kwap tatap ereet keng ngalup.

³²Kingis emalaikat tama, “Kotere nyo iramea iyong esikiria kon ngaramet ngauni kona? Abu ayong akiratakin iyong kainyo nyechamitae iyong iyei nalotoru naga.

³³Abu esikiria kon kengolik ayong torei ngareet ngauni. Arai nyeerei esikiria ngolo anikang, kimasit iyong ekileng sodi emiek esikiria toyar.”

³⁴Tatachu Balaam tama, “Asech ayong. Peayeni ayong atamar iwei iyong alorukudi akiratakin ayong. Nakaneni ani kironikinit iyong alosi ayong ngaren, abongori ayong nawi.”

³⁵Tolim emalaikat tama, “Kirukosi ka ngitunga lugu, sodi kiruor ngakiro nakalimokini ayong iyong make.” Sodi torotokis Balaam ka kesi.

³⁶Ani iirari Balak atamar ebunit Balaam, abu tolot akisiriamiar ngesi alore a Ari, alo eyei lokwaas a angolol a Arinon, lokukuor a Moab.

³⁷Tolimok Balak ngesi tama, “Nyo kolong peibunio iyong na ameunitor ayong ngitunga ekingaren? Itamit iyong atamar nyapedori ayong akitach iyong lokojokon a?”

³⁸Tatachu Balaam tama, “Abu ayong tokona! Nakaneni agogongu ani eyei ayong? Apedori ayong alimun ngakiro nakalimokini Akuj make.”

³⁹Sodi toloto Balaam ka Balak lore a Usos.

⁴⁰Tongol Balak ngaatuk ka ngamesekin kaina sodi nak Balaam ka ngikarikok lu arukitotor akiring.

⁴¹Ani ataparach nache, toriko Balak Balaam ni enyaritae Bamos Baal. Neni ngesi apedorea Balaam akingolikin Ngisirael epewae lu aapiyete.