Read turkana Ekimar 23 Bible Online

Ekimar 23 - turkana bible

Ekimar 23

¹Tolimok Balaam Balak tama, “Todukokinae ayong ngikenoi a ngakipeyos ngikan-kaarei nege, ani erumor kiinu ngimongin ngikan-kaarei ka ngamesekin ngakan-kaarei,”

²Tosubak Balak loger lo alimokinitere. Kipeye Balaam emong ka amesek alokeno a epei kech kadaang.

³Sodi tolimok Balaam Balak tama, “Towo kane alodiyete ngakipeyos kon, sodi atolot engolik chene kianyun ka Ekapolon Akuj kori kemam. Kalimokini ayong iyong ngakiro nakalimokini ngesi ayong daang.” Sodi tolot ngesi bon naita a imukura

⁴taanyunos ka Akuj, tolimok Balaam Akuj tama, “Adukok ayong ngikenoi a ngakipeyos ngikan-kaarei, nabo epeyoo emong ka amesek alokeno a epei kadaang.”

⁵Tolimok Ekapolon Akuj Balaam ngakiro na elimuni, sodi tomea ngesi nia Balak alimokin ngakiro nguna.

⁶Tobongo ngesi toriam Balak eringa ewei anakipeyos keng aapei ka ngikarikok daang a Moab.

⁷Todwar Balaam ngakiro nu tama, “Kayau ayong Balak, ekapolon a Moab, kayau alo Siria, ani a ngimoru a akide. Ebala, ‘Bua kilamakinae Yakobo. Kilamakinae Ngisirael’

⁸Ekokini ayong elami ibore ni nyilama Akuj ai? Kori echien toringa Ekapolon Akuj nyichieno ai?

⁹Etee ayong kesi anaitae a ngimoru, Etee kesi alomukur, erai ebukut lo ibooyi bon. Eyenete atamar kipiaritae kesi akidwang ngibukui luche.

¹⁰Ikote ngalesea a Yakobo apua. Elalak nyimarun. Kimiekinae atotoan arai ipei a ngitunga a Akuj. Kimiekinae atotoan loger alu etenooko.”

¹¹Sodi tolimok Balak Balaam tama, “Anukiro kisubea iyong ayong? Kayauni ayong iyong nege akilam ngimoe kang, nakaneni ipia tokona iyong kesi.”

¹²Tatachu Balaam tama, “Apedori ayong akiruor ngakiro nakalimokini Ekapolon Akuj make.”

¹³Ani erumor tolimok Balak Balaam tama, “Bua apana wache ni ipedorea iyong akingolikin Ngisirael epewae make, lu eapiyete. Kilamakinae kesi kaina.”

¹⁴Toriko ngesi naroatin a Sopim, kidiama emoru a Pisiga. Todukok nabo neni ngikenoi ngikan-kaarei sodi kipeyoe emong ka emesek alokeno a epei kech kadaang.

¹⁵Tolimok Balaam Balak tama, “Towo kane anakipeyos kon, sodi atolot ataanyun ka Akuj kaama.”

¹⁶Taanyun Balaam ka Ekapolon Akuj, tolimok Ekapolon Akuj ngesi ngakiro na elimuni, sodi tomea ngesi nia Balak alimokin ngakiro nguna.

¹⁷Tobongo ngesi toriam ewei anakipeyos keng aapei ka ngikarikok a Moab. Kingis Balak ngakiro na alimu Ekapolon Akuj

¹⁸sodi todwar Balaam ebala, “Bua, Balak lokookeng a Sipor. Topupok ngakiro na asaki alimun.

¹⁹Nyikoni Akuj ngitunga lu ingalaate Nyikoni ngesi itwaan ni ibele ngitamen keng. Itemokini ngesi ngakichiket keng. Esubakinosi na elimuni ngesi.

²⁰Kalimokin ayong atamar atopia. Na epiarea Akuj, nyapedori ayong abuar apiaro ngina.

²¹Engolik ayong na isidiuno alo Isirael, atamar nyeanyunete ekeny aronon kori ngichan. Erukito kesi ka Ekapolon Akuj na erai Akuj kech. Ebalasi ngesi erai Ekapolon kech.

²²Epud Akuj kesi alo Misiri. Ejii ngesi alowae kech loger a ekosowan.

²³Emam asubanot, emam akapel, na epedorio asubea Ngisirael.[18] Iruorotor tokona ngitunga Ngisirael. Ebalasi, ‘Kingolik ngakiro na asubaki Akuj!’

²⁴Ikwaan Isirael ka engatuny lokaadengan. Nyieangari ngesi mati kenyilinyili sodi kirika. Mati kemat ngaakot kangulu aar ngesi.”

²⁵Ani erumor tolimok Balak Balaam tama, “Iwou iyong akilam Ngisirael, aloger kangolo, nyiipia kare kesi!”

²⁶Tatachu Balaam tama, “Petakalimokinit ayong iyong atamar asubi ayong ngakiro daang nakalimokini Ekapolon Akuj a?”

²⁷Tolimok Balak Balaam tama, “Bua tokona, katoriko wache. Tokona ngon kichamakini Akuj iyong ilami kesi kaina kotere ayong.”

²⁸Sodi toriko ngesi Balaam kidiama emoru a Peor, lo erounit ariet.

²⁹Tolimok Balaam ngesi tama, “Todukokinae ayong ngikenoi a ngakipeyos ngikan-kaarei, sodi kiinu ngimongin ngikan-kaarei ka ngamesekin ngakan-kaarei.”

³⁰Tosubak Balak nguna alimokinitae, sodi kipeyoo emong ka emesek alokeno a epei kech kadaang.