Read turkana Ekimar 24 Bible Online

Ekimar 24 - turkana bible

Ekimar 24

¹Abu Balaam toyen atamar esaki Ekapolon Akuj ngesi topia Ngisirael. Abu ngesi nyeelot akisak ekeny loger losek asubeene ekingaren. Torei ngesi kingolia lowae lo a ariet

²sodi kingolik Ngisirael elomito ngadakarin a ngitela. Bu etau a Akuj nikeng

³sodi todwar ngesi ebala, “Akiroit a Balaam alokookeng a Beor. Ngakiro a itwaan ani itee lokojokon.[19]

⁴Ngae iirari ngakiro na iruoro Akuj. Iteete ngakonyen kang anaju, akisingolikinet na ebunit ani Akuj Naationon.

⁵Ibuseak ngieaman a Isirael,

⁶Ikote ngingolea erekina, kori ngamanat alokwaas a angolol, Ikote ngichuchuk lu itakinit Ekapolon Akuj, kori ngichekereng alokwaas a ngakipi.

⁷Eriamunete kesi akiru nakaalan. Kitata ngikinyam kech nalup na eupito ngakipi. Epoloor ekapolon kech kidwang Agag, nabo ekeikin apolou keng wadaang.

⁸Epuduni Akuj kesi alo Misiri. Ejii ngesi alowae kech loger a ekosowan. Emunyarete kesi ngimoe kech, kiroborobaasi ngakoyo kech, tobilibilaar ngimalea kech.

⁹ Ikoni Isirael engatuny lokaadengan. Na ejotoo, emam itwaan itekienyuni. Itwaan daang ni epiari Isirael, epiario ngesi dang. Itwaan daang ni ilami Isirael, ilamio ngesi dang.”

¹⁰Tongo Balak noi, taramanak ngakan keng. Tolimok Balak Balaam tama, “Kanyarauni ayong iyong akilam ngimoe kang, nakaneni ipia iyong kesi ngapiaret ngauni.

¹¹Kape tokona nawi kon! Abala kolong ayong katachi iyong, nakaneni kitonger Ekapolon Akuj iyong atachanot ngina.”

¹²Tatachu Balaam tama, “Alimokini kolong ayong ngitunga lukolong imeuni iyong nikang atamar

¹³tani kiinak iyong ayong ngaropiyae daang ka egolit lo eyei kai kon, nyapedori ayong echwangak ngakiro na adungu Ekapolon Akuj sodi atosub ngakiro kang a ilope. Eruoro ayong ngakiro nakalimokini Ekapolon Akuj atamar tolim make.”

¹⁴Tolimok Balaam Balak tama, “Abongori tokona ayong lotunga kang, nakaneni ani eringa nyerotokino, kechikichiki ayong iyong anakiro anamoi esubakineta Ngisirael ngitunga kon.”

¹⁵Ani erumor todwar ngesi tama, “Akiroit a Balaam a lokookeng a Beor. Ngakiro a itwaan ani itee lokojokon.

¹⁶Ngae iirari ngakiro na iruoro Akuj sodi toriam aosou a Akuj Naationon. Iteete ngakonyen kang anaju, akisingolikinet na ebunit ani a Akuj Namerikanyer.

¹⁷Engolik ayong na isidiuno, nabo aanyunga Isirael. Elomuni ekapolon lo ikoni ekanyerit lokariran alo Isirael. Elomuni ngesi alo Isirael loger a etop. Itijikini ngesi ngikarikok a Moab, nabo kidwang ngitunga a Set[20] daang.

¹⁸Idwangi ngesi ngimoe keng alo Edom. Sodi kitiliwo akwap kech akeng, tarai Isirael cha erai ekedwangan.

¹⁹Ipudaari Isirael kesi, tomunyasi tani lu epuunosi.”

²⁰Ani erumor kingolik Balaam Ngiamalek anakisingolikinet keng, sodi todwar tama, “Amalek kolong ajwono alobukui kadaang, nakaneni ani ekisidi, emunyario ngesi jik.”

²¹Abu ngesi kingolik Ngikenis anakisingolikinet keng sodi todwar tama, “Emam ni ilomito esi ibore eemitae. Ikwaan ka akai a ikeny na engichakina nataaba,

²²nakaneni kimunyario esi Ngikenis nakirikio Asiria esi toliworos ngirikon.”

²³Todwar nabo Balaam tama, “Tangae ngitunga lu echunakina kwap lugu?

²⁴Epote ngikaremok alo Kupuro kitorut nanam. Eremete kesi Asiria ka Eber, nakaneni emunyario ngikaremok ngulu jik.”

²⁵Tonyou Balaam tobong nawi keng, sodi tolot Balak dang lowae keng.