Read turkana Ekimar 25 Bible Online

Ekimar 25 - turkana bible

Ekimar 25

¹Na alomitotor Ngisirael nadipo a Awoi, apot ngikiliok kisiakis akiper ka ngaberu a Ngimoab na ayakasi neni.

²Apot ngaberu nguna tanyaraasi kesi ni epeyonokinere akuj a Moab. Kimuja Ngisirael akimuj ngina, nabo kilipa akuj ngina,

³na anyaritae Baal na a Peor. Tongoik Ekapolon Akuj kesi

⁴sodi tolimok Musa tama, “Tolem ngikarikok a Ngisirael daang, taar kesi anakonyen a itwaan kadaang, sodi nyaangoikinea ayong nabo ngitunga.”

⁵Tolimok Musa ngikatubok ngakiro a Ngisirael tama, “Echamitae ipei kus daang eari itwaan daang alokitela keng ni aliwor ilipit Baal na a Peor.”

⁶Abu Esiraelit epei yau aberu na arai Amidianit kilomak loeam keng iteete Musa ka ngitunga daang. Esaa ngolo, egorosi Ngisirael anakituk a eam a Akuj.

⁷Pineas lo arai lokookeng a Eleasar tarai etatait a Aron alo arai emuron a Akuj, na engolikinea ngakiro nguna abu tonyou torotok alotunga. Tolem ngesi akwara,

⁸kiwapak ekile ka aberu aloeam, sodi kichum a akwara daang kwasiarei akichumet apei. Eger ngolo ngesi atuboror edeke loaronon lo abu tomunya Ngisirael.

⁹Nakaneni aarit sek edeke ngolo ngitunga ngabunge ngatomwon-arei ka ngoomwon.

¹⁰Tolimok Ekapolon Akuj Musa tama,

¹¹“Kotere ngakiro na asubaki Pineas, nyeringa ayong angoikinit Ngisirael. Angeri Pineas anaikin akitere akuj ache ilipitae pearai ayong. Ngakiro nguna ngesi peamunyarea ayong kesi a angoit kang.

¹²Aloger kangolo, tolimok ngesi atamar kichamakin ayong ka ngesi jik.

¹³Eliworosi ngesi ka ngalesea keng ngimurok a Akuj jik, kainyo angeri ngesi ngakujo nache pearai ayong, nabo ayau ngesi arimakino a ngasechesea lotunga.”

¹⁴Anyaritae Esiraelit lo aario erukito ka aberu a Midian Simri lokookeng a Salu alo arai ekapolon awi alokitela a Simeon.

¹⁵Anyaritae ekiro a aberu Anamidianit kangina Kosibi nakookeng a Sur alo arai ekatukon a ngitunga a emachar a eche alo Midian.

¹⁶Todungok Ekapolon Akuj Musa tama,

¹⁷“Torem Ngimidian sodi tomunya kesi,

¹⁸kotere ngakiro naaronok kisubeta kesi esi nakingalaata esi alo Peor, nabo kotere ngakiro a Kosibi ana aario alo Peor, ngirwa lu ayakar edeke loaronon.”