Read turkana Ekimar 26 Bible Online

Ekimar 26 - turkana bible

Ekimar 26

¹Ani kedaun edeke loaronon kerumor, Ekapolon Akuj tolimok Musa ka Eleasar lo arai lokookeng a Aron tama,

²“Kimarutu Ngisirael daang a ngawiyei, daang lu enangito ngikaru ngitomwon-arei kori lu iporito nabo tarai lu epedoreto alosit lojie.”

³Apot Musa ka Eleasar lo arai emuron a Akuj tochunakis ngitunga kisuruoro anaroatin a Moab ekwakaye angolol a Yorudan alo Yeriko.

⁴Tanyaraut kesi ngikiliok lu anangito ngikaru ngitomwon-arei ka lu eporito, loger losek adungokinitor Ekapolon Akuj Musa. Ekimar a Ngisirael alu apudunete alo Misiri ngesi logo.

⁵Alokitela a Reuben (alo arai lokookeng a Yakobo lo ekingaren), kesi ngimacharin a Anok, ka Palu,

⁶ka Esiron, ta Karimi.

⁷Arai ekimar a ngimacharin kangulu ngikiliok 43,730.

⁸Ngalesea a Palu kesi Eliab,

⁹ka talokookeng Nemuel, ka Dasan ta Abiram. (Dasan ka Abiram ngulu kesi lukolong aseunete ngitunga. Angerete kesi ngakiro a Musa ka Aron kimorikinos ka ngitunga a Kora na angerioto Ekapolon Akuj.

¹⁰Apot ngalup tapakakis kilikosi kesi, sodi totoaka kesi ka Kora ta ngitunga keng na amunyarea akim ngitunga 250. Apot kesi toliworos akichikichiket alo Isirael.

¹¹Nakaneni apon talokookeng a Kora nyear.)

¹²Alokitela a Simeon, kesi ngimacharin a Nemuel, ka Yamin, ka Yakin,

¹³ka Sera ta Chaul.

¹⁴Arai ekimar a ngimacharin kangulu ngikiliok 22,200.

¹⁵Alokitela a Gad, kesi ngimacharin a Sepon, ka Agi, ka chuni,

¹⁶ka Osini, ka Eri,

¹⁷ka Arod, ta Areli.

¹⁸Arai ekimar a ngimacharin kangulu ngikiliok 40,500.

¹⁹Alokitela a Yuda, kesi Er ka Onan. Atoakete Er ka Onan lu araakasi talokookeng a Yuda alo Kanaan.

²⁰Araakasi ngimacharin a ekitela a Yuda kesi Chela ka Peres, ka Sera

²¹ka Esiron ta Amul.

²²Arai ekimar a ngimacharin kangulu ngikiliok 76,500.

²³Alokitela a Isakar, kesi ngimacharin a Tola, ka Pua,

²⁴ka Yachub ta Chimuron.

²⁵Arai ekimar a ngimacharin kangulu ngikiliok 64,300.

²⁶Alokitela a Sebulun, kesi ngimacharin a Sered, ka Elon, ta Yaleel.

²⁷Arai ekimar a ngimacharin kangulu ngikiliok 60,500.

²⁸Alokitela a Yosep arai talokookeng ngiarei, lu anyaritae Manase ka Epiraim.

²⁹Alokitela a Manase, ngesi Makiri lo arai lokookeng a Manase alo arai apakeng a Gilead.

³⁰Lugu kesi araakasi ngimacharin kech, Iyeser, ka Elek,

³¹ka Asiriel, ka Chekem,

³²ka Chemida, ta Eper.

³³Amam Selopead lo arai lokookeng a Eper ngide lusapa. Ayakasi ngide lupesur make, kesi Mala, ka Noa, ka Ogila, ka Milika ta Tirisa.

³⁴Arai ekimar a ngimacharin kangulu ngikiliok 52,700.

³⁵Alokitela a Epiraim, kesi ngimacharin a Chutela, ka Becher, ta Taan.

³⁶Esiakini emachar a Eran ani eyei Chutela.

³⁷Arai ekimar a ngimacharin kangulu ngikiliok 32,500. Ngulu araakasi ngimacharin a ngalesea a Yosep.

³⁸Alokitela a Benjamen, kesi ngimacharin a Bela, ka Achibel, ka Airam,

³⁹ka Chepupam, ta Upam.

⁴⁰Esiakinete ngimacharin a Arid ka Naaman ani eyei Bela.

⁴¹Arai ekimar a ngimacharin kangulu ngikiliok 45,600.

⁴²Alokitela a Dan, ngesi emachar a Uchim,

⁴³lo arai ekimar keng ngikiliok 64,400.

⁴⁴Alokitela a Acher, kesi ngimacharin a Imuna, ka Ichipi, ta Beria.

⁴⁵Esiakinete ngimacharin a Eber ka Malikiel ani eyei Beria.

⁴⁶Ayei Acher nakookeng na anyaritae Sera.

⁴⁷Arai ekimar a ngimacharin kangulu ngikiliok 53,400.

⁴⁸Alokitela a Naputal, kesi ngimacharin a Yaseel, ka Guni,

⁴⁹ka Yeser, ta Chilem.

⁵⁰Arai ekimar a ngimacharin kangulu ngikiliok 45,400.

⁵¹ Arai ekimar daang a ngikiliok a Ngisirael 601,730.

⁵²Tolimok Ekapolon Akuj Musa tama,

⁵³“Totiakak ngitela akwap itemem ka etiae kech.

⁵⁴Ekitela loapolon, totiakak akwap na epolot, ani ekitela loochi, totiakak akwap na edit. Etiakakinio ekitela daang akwap itemem ka etiae a ngitunga.

⁵⁵Nakaneni, eramio ekura totiakere akwap, itemem ka ngirora a ngitela.

⁵⁶ Etiakio akwap kech itemem ka ekura a ngitela a luapolok ka luuchik.”

⁵⁷Ngimacharin a ekitela a Lawi kesi Gerichon, ka Koas, ta Merari.

⁵⁸Ngalesea kech kesi Ngatekerin a Libini, ka Eburon, ka Mali, ka Muchi, ta Kora. Arai Koas apakeng a Amuram,

⁵⁹alo eusit nakookeng a Lawi na anyaritae Yokebed, na edounio alo Misiri. Kidou ngesi talokookeng a Amuram ngiarei, lu anyaritae Aron ka Musa ta napese na anyaritae Miriam.

⁶⁰Ayakasi Aron talokookeng nguomwon lu anyaritae Nadab, ka Abiu, ka Eleasar, ta Isamar.

⁶¹Totoaka Nadab ka Abiu na alemikineta Ekapolon Akuj akim na peetaleunitoe.

⁶² Arai ekimar a ngide alusapa a Ngilawi alu anangito elap epei ka lu eporito 23,000. Atiakaritae ekimar kech ani eya Ngisirael luche, kainyo amam ibore ainakinio kesi alo Isirael.

⁶³Musa ka Eleasar emarete ngimacharin ngulu daang na emareta kesi Ngisirael anaroatin a Moab, ekwakaye angolol a Yorudan alo Yeriko.

⁶⁴Alotunga alu kolong emarunete Musa ka Aron alokimar alo kolong a ekingaren, emam tani ipei ni abu kidong nyimaruna.

⁶⁵ Alimunit sek Ekapolon Akuj atamar etoakete kesi daang anariet. Iteni apot daang totoaka pearai Kaleb lokookeng a Yepune ka Yochua lokookeng a Nun.