Read turkana Ekimar 27 Bible Online

Ekimar 27 - turkana bible

Ekimar 27

¹Mala ka Noa, ka Ogila, ka Milika, ta Tirisa kesi araakasi tanakookeng a Selopead alo arai lokookeng a Eper, alo arai lokookeng a Gilead, alo arai lokookeng a Makiri, alo arai lokookeng a Manase, alo arai lokookeng a Yosep.

²Aloose kesi towaa alongaren Musa ka Eleasar lo arai emuron a Akuj, ka ngikarikok, ta ngitunga daang, alokidor a eam a Akuj. Tolimut kesi tamasi,

³“Atoanikini kolong apakosi nariet. Amam ngesi ngide lusapa. Amam ngesi alotunga a Kora alu kolong angerete Ekapolon Akuj. Atoani ngesi kotere akisech keng a ilope.

⁴ Kotere nyo eraakar amamau a ngide alusapa engopitor ekiro a apakosi alo Isirael? Totiakakinae sua ngiboro ani eya ngiyenet a apakosi.”

⁵Yaa Musa ngakiro a tanakookeng a Selopead nia Ekapolon Akuj,

⁶sodi tolimok Ekapolon Akuj ngesi tama,

⁷“Ngaka iteni ngakiro na ingitasi tanakookeng a Selopead. Totiakak kesi ngiboro ani eya ngiyenet a apakech. Kimiek kesi kiruma ngiboro a apakech.

⁸Tolimok Ngisirael atamar, ani ketoana itwaan tamam idia nisapat, ejoikinit nakookeng napese irumi ngiboro keng.

⁹Ani kemam ngesi ikoku nipese, ejoikinit talokaatokeng irumete ngiboro keng.

¹⁰Ani kemam ngesi talokaatokeng, ejoikinit talokaatokeng a apakeng irumete ngiboro.

¹¹Ani kemam talokaatokeng a apakeng, ejoikinit eyenet keng lo alo diyete irumi ngiboro, kitiliwo ngikeng. Ejoikinit Ngisirael irichunete etal ngolo loger lokadungokinea ayong, Ekapolon Akuj iyong.”

¹²Tolimok Ekapolon Akuj Musa tama, “Todoka moru a Abarim sodi kingolik akwap na ainakinit ayong Ngisirael.

¹³Ani kingolik iyong kerumor, itoani iyong loger lo kolong atoanea lokaatokon Aron,

¹⁴ kainyo ingerete kolong esi ngakiro na adungunit ayong anariet a Sin. Nakolong kesuburaata ngitunga daang ayong alo Meriba, ipot esi towout akidodiun agogongu kang alongaren kech.” (Erai Meriba elelea alo Kadech, anariet a Sin.)

¹⁵Kilip Musa tama,

¹⁶“Ekapolon Akuj, Namerikanyer, na irai alope a akiyar kadaang, kelipit atamar toseu itwaan ni epedori akirik ngitunga,

¹⁷ nabo ni epedori akirik kesi alojie, sodi nyiikokineta ngitunga kon ngamesekin na emam ekeyokon.”

¹⁸Tolimok Ekapolon Akuj Musa tama, “Tolem Yochua lokookeng a Nun, lo erai itwaan ni epedori etich, sodi kidokok ngakan kon nakou keng.

¹⁹Kitowo ngesi alongaren Eleasar lo erai emuron, ka ngitunga daang, sodi tolim alongaren ngitunga ngulu daang atamar Yochua ilunyokin lotich kon.

²⁰Kiwaak apolou kon epewae nikeng sodi kiwapeta Ngisirael daang ngakiro keng.

²¹Eleasar lo erai emuron ngesi eweikini Yochua alotich keng. Elemuni Eleasar Urim ka Sumim*g** toyeneenea ngakiro na asaki ayong. Erot ngolo ngesi erikio Eleasar Yochua ka Ngisirael daang anakiro kech kadaang.”

²²Tosubak Musa loger lo adungokinitor Ekapolon Akuj ngesi. Kitowo ngesi Yochua alongaren Eleasar alo erai emuron, ka ngitunga daang.

²³ Kidokok Musa ngakan keng nakou a Yochua, sodi tolim atamar Yochua ilunyokin lotich keng, loger losek adungunitor Ekapolon Akuj.