Read turkana Ekimar 28 Bible Online

Ekimar 28 - turkana bible

Ekimar 28

¹Todungok Ekapolon Akuj Musa

²atamar tolimok Ngisirael tolemanakis Akuj ngakipeyos na epeyo, na ejoikinito ngesi. Tolemuunut a ngirwa alu eseunitae tolemuunere.

³Ngakipeyos nugu kesi elemikinio Ekapolon Akuj erai ngakipeyos na epeikinitoe Akuj. Ngakipeyos na inomio akolongit daang kesi ngimesekin lukiliok ngiarei lu erai ngikaru ngipei-pei, tamam ni ichwangakina,

⁴kipeye imesek ni ekingaren nataparach, kipeye niche ebong

⁵erukito daang ka ngakipeyos a ngalemet na eraakasi ngakiria akilo apei, imorikina ka alita apei a akimiet anaajokon.

⁶Erai akipeyos ngina aka akolongit kadaang, na inomio tonomia, ngesi nakolong epeyeo ekingaren alomoru a Sinai erai akipeyos na epeikinitoe Akuj. Ejoikinit akukuny keng Ekapolon Akuj.

⁷Akipeyos a emuna na erukito ka imesek ni ekingaren, ejoikinit idokakinio alita apei a emuna lokeno a ngakipeyos.

⁸Ani ebong, kipeye imesek nia ngiarei loger a akipeyos ana ataparach, aapei ka akipeyos keng na emuna. Erai ngesi dang akipeyos na epeikinitoe Akuj. Ejoikinit Ekapolon Akuj akukuny keng.

⁹Ani akolongit na a Sabato, kipeye ngimesekin lukiliok ngiarei, lua ngikaru a ngipei-pei, tamam ni ichwangakina, ka ngakipeyos a ngalemet na eraakasi ngakiloi ngaarei a ngakiria imorikina ka akimiet, ta alemunet a emuna.

¹⁰Echamitae akipeyos na inomio naga, ka alemunet keng a emuna, elemuununio akolongit na a Sabato daang, etiakak ka ngakipeyos na elemuununio ngirwa daang.

¹¹Tolemanakisi Ekapolon Akuj akipeyos na inomio akisiakinet a elap kadaang. Tolemutu ngimongin ngiarei, ka emesek epei, ta ngimesekin lukiliok ngikan-kaarei lu eraakasi ngikaru ngipei-pei, tamam ni ichwangakina.

¹²Tolemutu ngakipeyos a ngalemet na eraakasi ngakiria imorikina ka akimiet, ngakiloi ngauni a ngakiria kiturukooroe ka akipeyos a emong a epei kech kadaang, ka ngakiloi ngaarei a ngakiria kiturukooroe ka akipeyos a emesek.

¹³Ani ngimesekin luuchik, kiturukooroe epei daang ka akilo apei a ngakiria. Ngakipeyos na inomio nguna epeikinitoe Akuj. Ejoikinit Ekapolon Akuj akukuny kech.

¹⁴Ngadekon a emuna na itemokino kesi ngalitae ngaarei kiturukooroe ka emong epei kech kadaang, ka anus a alita kiturukooroe ka emesek, ta alita apei kiturukooroe ka imesek nikile ipei kech kadaang. Erai ngolo etal a ngakipeyos ana inomio akolongit na ekingaren a ngilapio kadaang alokaru.

¹⁵Kipeyoto ekoroe epei toliwor akipeyos a akisech aapei ka ngakipeyos na ipeyeo jiik imorikina ka alemunet a emuna.

¹⁶Esukukuu a Adeparet lo erimare Ekapolon Akuj, isiakini akolongit na a ngatomon ka ngoomwon a elap alo a ekingaren.

¹⁷Akolongit na a ngatomon ka ngakan, ngesi isiakineta ngisukukui a Ekapolon Akuj lu irikarete ngikaru ngikan-kaarei, ngirwa ngulu tanyamae ngamugati na emam ekitoe lo itubui make.

¹⁸Akolongit na ekingaren a esukukuu, ejoikinit esi ichunakinosi kilipa nabo nyiisuba etich.

¹⁹Tolemikisi Ekapolon Akuj akipeyos na epeyo. Tolemutu ngimongin lusorok ngiarei, ka amesek apei, ta ngimesekin lukiliok ngikan-kaarei lua ngikaru a ngipei-pei, tamam ni ichwangakina.

²⁰Tolemutu ngakipeyos a ngalemet na itemokino na eraakasi ngakiria imorikina ka akimiet, tolemut ngakiloi ngauni kiturukooroe ka emong epei kadaang, ngakiloi ngaarei kiturukooroe ka emesek,

²¹akilo apei kiturukooroe ka imesek ipei kech kadaang.

²²Tolemutu nabo ekoroe epei toliwor akipeyos a akisech, sodi aloger kangolo, kitaleunere ngitunga tosegeta.

²³Tolemutu ngakipeyos nguna etiakak ka ngakipeyos napalem inomio ataparach daang.

²⁴Aloger alopei kangolo, a ngirwa a ngikan-kaarei, tolemanakis Ekapolon Akuj akipeyos na epeyo, na ejoikinit ngesi akukuny keng. Tolemutu akipeyos ngina etiakak ka akipeyos na inomio ka alemunet a emuna na elemuununio ngirwa daang.

²⁵ Kiriama akolongit na a ngakan-kaarei kilipa, nabo nyiisuba etich.

²⁶Akolongit na ekingaren a esukukuu a ngalemet, na ilemikineta esi Ekapolon Akuj ngikinyam lukitet, ejoikinit esi ichunakinosi kilipa, nabo nyiisuba etich.

²⁷Tolemutu akipeyos na inomio na ejoikinit akukuny keng Ekapolon Akuj. Tolemutu ngimongin lusorok ngiarei, ka emesek epei, ta ngimesekin lukiliok ngikan-kaarei lua ngikaru a ngipei-pei, tamam daang ni ichwangakina.

²⁸Tolemutu ngakipeyos a ngalemet na itemokino na eraakasi ngakiria na imorikina ka akimiet, tolemut ngakiloi ngauni kiturukooroe ka emong epei kadaang, ngakiloi ngaarei kiturukooroe ka emesek,

²⁹akilo apei kiturukooroe ka imesek ipei kech kadaang.

³⁰Tolemutu tani ekoroe toliwor akipeyos a akisech, sodi alorot kangolo, kitaleunere ngitunga tosegeta.

³¹ Tolemuunutu ngakipeyos nguna ka alemunet a emuna etiakak ka ngakipeyos na inomio ka na a ngalemet na elemuununio ngirwa daang. Toliworos daang lu emam ni ichwangakina.