Read turkana Ekimar 29 Bible Online

Ekimar 29 - turkana bible

Ekimar 29

¹Akolongit na ekingaren a elap alo a ngikan-kaarei, ejoikinit esi ichunakinosi kilipa, nabo nyiisuba etich. Ekutakinio ngaburucho akolongit ngina.

²Tolemikisi Ekapolon Akuj akipeyos na inomio na ejoikinit akukuny keng Ekapolon Akuj. Tolemutu emong losorokit epei ka emesek epei, ta ngimesekin lukiliok luuchik ngikan-kaarei lua ngikaru a ngipei-pei, tamam daang ni ichwangakina.

³Tolemutu ngakipeyos a ngalemet na itemokino na eraakasi, ngakiria imorikina ka akimiet, tolemutu ngakiloi ngauni kiturukooroe ka emong, ngakiloi ngaarei kiturukooroe ka amesek,

⁴akilo apei kiturukooroe ka imesek ipei kech kadaang.

⁵Tolemutu nabo ekoroe epei toliwor akipeyos a akisech, sodi aloger kangolo, kitaleunere ngitunga tosegeta.

⁶Tolemutu ngakipeyos nguna etiakak ka ngakipeyos napalem inomio akolongit na ekingaren a elap erukito ka ngakipeyos a ngalemet, ka ngakipeyos na inomio akolongit daang erukito ka ngakipeyos ngalemet ta a ngadekon a emuna. Ngamuja na epeikinitoe Akuj nguna, ejoikinit akukuny kech Ekapolon Akuj.

⁷Akolongit na a ngitomon a elap alo a ngikan-kaarei, tochunakinos kilipa. Nyiinyam akimuj nabo nyiisuba etich.

⁸Tolemikisi Ekapolon Akuj akipeyos na inomio, na ejoikinit ngesi akukuny keng. Tolemutu emong epei, ka amesek apei, ta ngimesekin lukiliok ngikan-kaarei lu eraakasi ngikaru ngipei-pei, tamam daang ni ichwangakina.

⁹Tolemutu ngakipeyos a ngalemet na itemokino na eraakasi ngakiria ka akimiet, tolemut ngakiloi ngauni a ngakiria kiturukooroe ka emong, ngakiloi ngaarei kiturukooroe ka amesek,

¹⁰akilo apei kiturukooroe ka imesek ipei kech kadaang.

¹¹ Tolemutu nabo ekoroe epei toliwor akipeyos a akisech, etiakak ka ekoroe lo italeuniyere ngitunga, ka akipeyos na inomio akolongit daang erukito ka ngakipeyos a ngalemet ka emuna.

¹²Akolongit na a ngatomon ka ngakan a elap alo a ngikan-kaarei, kiriamariama wapei kilipa. Tosubakis esukukuu logo irimatar Ekapolon Akuj a ngirwa a ngikan-kaarei, nabo nyiisuba etich.

¹³Akolongit na ekingaren ngina, tolemikis Ekapolon Akuj akipeyos na epeikinio ngesi, ejoikinit akukuny a akipeyos kangina Ekapolon Akuj. Tolemutu ngimongin lusorok ngitomon ka nguuni, ka ngimesekin ngiarei, ta ngimesekin luuchik lukiliok ngitomon ka nguomwon lu eraakasi ngikaru ngipei-pei, tamam ni ichwangakina.

¹⁴Tolemutu ngakipeyos a ngalemet na itemokino na eraakasi ngakiria imorikina ka akimiet, tolemut ngakiloi ngauni a ngakiria kiturukooroe ka emong epei kadaang, ngakiloi ngaarei kiturukooroe ka amesek apei kadaang,

¹⁵akilo apei kiturukooroe ka imesek ipei kadaang. Tolemunae kesi aapei ka ngadekon kech a emuna.

¹⁶Tolemutu nabo ekoroe epei toliwor akipeyos a akisech. Tolemutu ngakipeyos nguna etiakak ka ngakipeyos napalem inomio akolongit daang aapei ka ngakipeyos a ngalemet ka emuna.

¹⁷Akolongit na a ngaarei tolem ngimongin lusorok ngitomon ka ngiarei, ka ngimesekin ngiarei, ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina.

¹⁸Ejoikinit ngimongin, ka ngimesekin, ta ngimesekin luuchik, iturukorio ka ngakipeyos a ngalemet ta emuna loger losek itemitere.

¹⁹Tolemutu tani ekoroe epei toliwor akipeyos a akisech, etiakak ka ngakipeyos napalem inomio aapei ka ngakipeyos a ngalemet ta emuna.

²⁰Akolongit na a ngauni, tolemutu ngimongin lusorok ngitomon ka epei, ka ngimesekin ngiarei ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina.

²¹Ejoikinit ngimongin, ka ngimesekin, ta ngimesekin lukiliok luuchik iturukorio ka ngakipeyos a ngalemet, ta emuna loger losek itemitere.

²²Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang aapei ka ngakipeyos a ngalemet ta emuna.

²³Akolongit na a ngoomwon, tolemutu ngimongin lusorok ngitomon, ka ngamesekin ngaarei, ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina.

²⁴Ejoikinit ngimongin, ka ngimesekin, ta ngimesekin lukiliok luuchik iturukorio ka ngakipeyos a ngalemet, ta emuna loger losek itemitere.

²⁵Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang, aapei ka ngakipeyos a ngalemet ka emuna.

²⁶Akolongit na a ngakan, tolemutu ngimongin lusorok ngikan-koomwon, ka ngimesekin ngiarei, ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina.

²⁷Ejoikinit ngimongin, ka ngimesekin, ta ngimesekin lukiliok luuchik iturukorio ka ngakipeyos a ngalemet ta emuna loger losek itemitere.

²⁸Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang aapei ka ngakipeyos a ngalemet, ta emuna.

²⁹Akolongit na a ngakan-kapei, tolemutu ngimongin lusorok ngikan-kauni, ka ngimesekin ngiarei, ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina.

³⁰Ejoikinit ngimongin ka ngimesekin, ta ngimesekin lukiliok iturukorio ka ngakipeyos a ngalemet ta emuna loger losek itemitere.

³¹Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang aapei ka ngakipeyos a ngalemet, ta emuna.

³²Akolongit na a ngakan-kaarei, tolemutu ngimongin lusorok ngikan-kaarei, ka ngimesekin ngiarei, ta ngimesekin lukiliok ngitomon ka nguomwon lu eraakasi ngikaru ngipei-pei, tamam daang ni ichwangakina.

³³Ejoikinit ngimongin, ka ngimesekin, ta ngimesekin lukiliok luuchik iturukorio ka ngakipeyos a ngalemet, ta emuna loger losek itemitere.

³⁴Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang aapei ka ngakipeyos a ngalemet, ta emuna.

³⁵Akolongit na a ngakan-kauni, kiriamariama wapei kilipa, nabo nyiisuba etich.

³⁶Tolemutu akipeyos na inomio toliwor akimuj na epeikinitoe Ekapolon Akuj, na ejoikinit ngesi akukuny keng. Tolemutu emong losorokit epei, ka amesek apei, ta ngimesekin lukiliok ngikan-kaarei lu eraakasi ngikaru ngipei-pei, tamam ni ichwangakina.

³⁷Ejoikinit emong, ka emesek ta ngimesekin lukiliok luuchik iturukorio ka ngakipeyos a ngalemet, ta emuna loger losek itemitere.

³⁸Tolemutu tani ekoroe epei toliwor akipeyos a akisech, etiakak ka ngakipeyos napalem inomio akolongit daang aapei ka ngakipeyos a ngalemet, ta emuna.

³⁹Ngulu kesi eraakasi ngitalio a ngakipeyos ana inomio, ka ngakipeyos a ngalemet ka ngadekon a emuna, ta ngakipeyos a ekisil. Esakitae esi ilemanakinete Ekapolon Akuj ngakipeyos nguna a ngirwa kech alu aseun. Etiakak ngakipeyos nugu ka ngakipeyos na ikongitor itwaan kori na esaki itwaan alemun.

⁴⁰Sodi abu Musa tolimok Ngisirael ngakiro daang nasek adungokinit Ekapolon Akuj ngesi.