Read turkana Ekimar 3 Bible Online

Ekimar 3 - turkana bible

Ekimar 3

¹Ngirwa lu esuruorea Ekapolon Akuj Musa alomoru a Sinai, lugu kesi araakasi ngitunga a awi a Aron ka Musa.

²Ayakasi Aron talokookeng nguomwon. Anyaritae loapolon Nadab. Anyaritae luche Abiu, ka Eleasar, ta Isamar.

³Ewasakinio sek kesi akimiet na etal sodi kitaleunoe toliworos ngimurok a Akuj.

⁴ Nakaneni apot Nadab ka Abiu totoaka esaa lo alemikinitotor Ekapolon Akuj akim na peetaleunitoe anariet a Sinai. Amam kesi ngide. Aloger kangolo, apot Eleasar ka Isamar tosuba etich eraakasi ngimurok a Akuj ngirwa daang lu ayarea Aron.

⁵Tolimok Ekapolon Akuj Musa tama,

⁶“Toriku ngitunga a ekitela a Lawi diyete, sodi toseu kesi toliworos ngikasubak etich a Aron alo erai emuron a Akuj.

⁷Esubete kesi etich lo echamakina esubio aloeam kang, nabo tosuba etich a ngimurok a Akuj, ta etich a ngitunga kadaang.

⁸Eweikinete kesi ngiboro daang lu eyakasi loeam nabo tosuba etich kotere Ngisirael luche daang.

⁹Etich loteno esubete Ngilawi ngesi loa Aron ka talokookeng.

¹⁰Toseu Aron ka talokookeng tosuba etich eraakasi ngimurok a Akuj. Itwaan niche daang ni ebuni diyete neni, eario.”

¹¹Tolimok Ekapolon Akuj Musa tama,

¹²“Alemu ayong Ngilawi alo Isirael toliworos ngikang, akidwang alemanar iuriuna ni ekingaren daang ani a Ngisirael. Nakaneni eliworosi Ngilawi ngikang

¹³ kainyo eraakasi ngiuriuna lua ekingaren daang ngikang. Akwaar nakolong aarea ayong ngiuriuna lu ekingaren a Ngimisiri, abu ayong etaleu iuriuna ni ekingaren daang ni arai ikile anawiyei kadaang a Ngisirael, alotunga ka ngibaren. Eliworosi ngikang. Ayong arai Ekapolon Akuj.”

¹⁴Abu Ekapolon Akuj todungok Musa anariet a Sinai

¹⁵atamar kimaru Ngilawi a ngimacharin ka ngawiyei, sodi kigir itwaan nikile daang ni arai elap epei kori ni iporit elap epei.

¹⁶Abu Musa kimaru kesi loger lo adungokinitor Ekapolon Akuj.

¹⁷Ngirora a talokookeng a Lawi kesi Gerichon, ka Koas, ta Merari.

¹⁸Ngirora a talokookeng a Gerichon kesi Libini ka Chimei. Anyaritae ngawiyei kech a ngirora kangulu.

¹⁹Anyaritae ngide a Koas Amuram, ka Ichar, ka Eburon, ta Usiel. Anyaritae ngawiyei kech a ngirora kangulu.

²⁰Ngirora a talokookeng a Merari kesi Masi ka Muchi. Anyaritae ngawiyei kech a ngirora kangulu. Nguna eraakasi ngawiyei a Ngilawi a ngimacharin kech.

²¹Ngawiyei a emachar a Gerichon kesi na Libini ka Chimei.

²²Arai ekimar daang a ngitunga alu egiritae, alukiliok alu araakasi elap epei kori lu eporito elap epei, arai 7,500.

²³Asakitae ngitunga a emachar kangolo elomete lowae loa lotoo, naabor a eam.

²⁴Eliasap lokookeng a Lael ngesi arai ekapolon kech.

²⁵Kesi aweikinito eam ka ewae lo alotooma, ka alaar, ka awaru na arapitere akituk a eam,

²⁶ka ngawarui na iriamito eam, ka ekeno a ngakipeyos ta ngaunoi. Kesi aweikinito etich daang a ngiboro kangulu.

²⁷Ngawiyei a emachar a Koas kesi na a Amuram, ka Ichar, ka Eburon, ta Usiel.

²⁸Arai ekimar daang a ngitunga alu egiritae, alukiliok alu araakasi elap epei kori lu eporito elap epei, arai 8,600.

²⁹Asakitae ngitunga a emachar kangolo elomete lowae loa lokuju a eam.

³⁰Eliasapan lokookeng a Usiel ngesi erai ekarikon kech.

³¹Aweikinito kesi asaduku a achamunet, ka emeesa, ka ni esipor ataa, ka ngikenoi a ngakipeyos, ka ngiboro lukimujet a ngimurok a Akuj, lu esubere etich ani italeuno, ta awaru na erapit niasegan noi. Kesi aweikinito etich daang a ngiboro kangulu.

³²Ekapolon a Ngilawi ngesi Eleasar lokookeng a Aron alo arai emuron a Akuj. Ngesi aweikinit ngulu asubete etich ani italeunitoe.

³³Ngawiyei a emachar a Merari kesi na Mali ka Muchi.

³⁴Arai ekimar daang a ngitunga alu egiritae, alukiliok alu araakasi elap epei kori lu eporito elap epei, arai 6,200.

³⁵Asakitae ngitunga a emachar kangolo elomete lowae loa lokwap a eam. Suriel lokookeng a Abiyail ngesi arai ekarikon kech.

³⁶Kesi aweikinito ngakito na egangito eam, ka ngasua na igangito eam, ka ngapirio, ka ewae lo a ngalup, ta ngiboro keng daang. Kesi aweikinito etich daang a ngiboro kangulu.

³⁷Kesi nabo aweikinito ngapirio, ka ewae lo a ngalup, ka ngakito natikokinet, ta ngaunoi na anikalapatan.

³⁸Asakitae Musa ka Aron ka talokookeng a Aron elomete ngaren eam alowae alo alo kide alo ipiripiruunea akolong. Kesi aweikinito ngitichisio lu asubio ani italeunitoe, kotere Ngisirael. Itwaan niche daang ni ebuni diyete neni, eario.

³⁹Arai ekimar daang a Ngilawi alukiliok, alu eraakasi elap epei kori lu eporito elap epei 22,000. Emarete Musa ka Aron kesi kigira a ngimacharin loger lokolong adungunitor Ekapolon Akuj.

⁴⁰Tolimok Ekapolon Akuj Musa tama, “Kimaru ngiuriuna a Ngisirael daang lu ekingaren lukiliok lu eraakasi elap epei kori lu iporito elap epei, kigir ngirora kech.

⁴¹Nakaneni tosekinae ayong Ngilawi toliworos ngikang, pena nados a ngiuriuna alu ekingaren a Ngisirael! Ayong arai Ekapolon Akuj! Asaki nabo ngaatuk a Ngilawi daang pena nados a ngitak alu ekingaren a ngaatuk a Ngisirael.”

⁴²Abu Musa kimaru ngiuriuna lu ekingaren daang lukiliok loger losek adungokinitor Ekapolon Akuj ngesi,

⁴³lu araakasi elap epei kori lu eporito elap epei. Toliwor ekimar kech daang 22,273.

⁴⁴Tolimok Ekapolon Akuj Musa tama,

⁴⁵“Kitaleu Ngilawi toliworos ngikang pena nados a ngiuriuna alu ekingaren alusapa a Ngisirael. Nabo kitaleu ngaatuk a Ngilawi pena nados a ngitak alu ekingaren a ngaatuk a Ngisirael. Ayong arai Ekapolon Akuj!

⁴⁶Aloger elalakeata ngiuriuna lu ekingaren a Ngisirael, idwangitotor Ngilawi kotere 273, ejoikinit iyong igieli ngide lu idongito.

⁴⁷Kotere ikoku nisapat ipei, tolem ngaropiyae ngakan itemitoe ka eger lopalem itemeenere.

⁴⁸Nak Aron ka talokaatokeng ngaropiyae nguna.”

⁴⁹Tosubak Musa loger lo alimokinitae sodi tolem

⁵⁰ngaropiyae 1,365,

⁵¹nak Aron ka talokookeng loger lo adungokinitor Ekapolon Akuj.