Read turkana Ekimar 30 Bible Online

Ekimar 30 - turkana bible

Ekimar 30

¹Abu Musa nak ngikarikok a ngitela a Ngisirael ngitalio lugu.

² Ani kikong itwaan atamar ainakini Ekapolon Akuj ibore, kori kikong itwaan atamar apalikini ibore, nyechamitae ngesi ichwangakini ngakiro nguna, nakaneni ejoikinit ngesi esubakini ngakiro nguna loger lokolong alimunio ngesi.

³Ani kikong apese ekingaren eyei nawi a apakeng atamar ainakini Ekapolon Akuj ibore, kori kikong atamar apalikini ibore,

⁴ejoikinit ngesi esubakini ngakiro na ekong ngesi mati kitonger apakeng ngesi, na eirarea apese ngina ikongi.

⁵Nakaneni ani kitenger apakeng ngesi asubakin ngakiro nguna, na eirarea ngesi ikongi, nyechamitae ngesi irichakini ngakiro na ekong ngesi nguna. Erimakini Ekapolon Akuj ngesi.

⁶Ani kikong aberu na nyiusitae, sodi tolim ngakiro iyechakinit, kori peemisit, kori tolim atamar apalikini ibore, nabo ani ekisidi kiutae,

⁷echamitae ngesi esubakini ngakiro na ekong ngesi nguna, mati kitenger lokile keng na iirarea ikongi.

⁸Nakaneni ani kitenger lokile keng ngesi asubakin ngakiro nguna, na eirarea ngesi ikong, nyechamitae ngesi irichakini ngakiro na ekong nguna. Erimakini Ekapolon Akuj ngesi.

⁹Echamitae apuserut ka aberu na alaka irichakini ngakiro daang na ekong ngesi, ka na alimu atamar apalikini.

¹⁰Ani kikong aberu na iusitae kori tolim atamar apalikini ibore,

¹¹echamit ngesi esubakini ngakiro na ekongok ngesi, mati kitonger lokile keng na iirarea ngesi ikongi.

¹²Nakaneni ani kitonger lokile keng ngesi asubakin ngakiro nguna, na eirarea ngesi ikongi, nyechamitae ngesi irichakini ngakiro na ekong. Erimakini Ekapolon Akuj ngesi, kainyo etengeri lokile keng ngesi akirichakin ngakiro na ekong nguna.

¹³Epedori lokile keng achamun kori akinger ngakiro daang na ekong ngesi kori na alimu atamar asubakini.

¹⁴Nakaneni ani pekenger ekile ngolo ngakiro nguna akolongit na eirarea ngesi aberu ikongi, echamitae aberu esubakini ngakiro daang na ekong ngesi kori na alimu atamar asubakini. Achamu ekile ngakiro nguna kainyo nyengero ngesi akwaar na eirarea ngakiro nguna.

¹⁵Nakaneni ani kenger ngesi ngakiro nguna ekisidi, ekile ngolo eriamuni naaronok erai pekirichakin ngakiro nguna.

¹⁶Ngitalio ngulu kesi ainakini Ekapolon Akuj Musa kotere ngakiro na ikongi aberu na nyiusitae, na eringa eyei nawi a apakeng kori aberu na iusitae.