Read turkana Ekimar 31 Bible Online

Ekimar 31 - turkana bible

Ekimar 31

²“Kirira Ngimidian kotere ngakiro nakolong asubeta kesi Ngisirael. Ani erumor nguna, itoani iyong.”

³Sodi tolimok Musa ngitunga tama, “Tonyoutu lojie, kitijikis Ngimidian, kirirata kesi kotere ngakiro nakolong asubeta kesi Ekapolon Akuj.

⁴Tolem ekitela a Isirael daang ngitunga abunget apei toloto lojie.”

⁵Sodi apon toseunae ngitunga abunget apei alokitela kadaang, toliwor ekimar a ngitunga kadaang alu anyounito alosit lojie ngitunga ngabunge ngatomon ka ngaarei.

⁶Tomea Musa kesi toloto lojie erikit Pineas lokookeng a Eleasar alo erai emuron a Akuj. Pineas ngesi atingit ngiboro lua Akuj ka ngaburucho na ekusio.

⁷Apot kesi kitijikis Midian, loger lo adungokinitor Ekapolon Akuj Musa, apot taara ngikiliok daang,

⁸taara tani ngikapolok a Ngimidian lukan lu anyaritae, Epi, ka Rekem, ka Sur, ka Hur, ta Reba. Taara kesi tani Balaam lokookeng a Beor.

⁹Todemasi Ngisirael ngaberu a Ngimidian ka ngide, ka ngaatuk, ta ngamesekin, tolemasi ebari kech daang.

¹⁰Sodi kichunyakis ngirerea kech daang, ka ngadakarin.

¹¹Apot kesi tolemasi ngiboro lu angatarete daang lu eraakasi ngitunga ka ngibaren.

¹²Yaasi kesi ngiboro ngulu nia Musa ka Eleasar, ta Ngisirael, lu ayakasi naroatin a Moab, ekwakaye Yorudan alo Yeriko.

¹³Apot Musa ka Eleasar, ta ngikarikok luche daang a Ngisirael topudosi nikalapatan a adakar akisiriamiar ngasigerea.

¹⁴Abu Musa tongoik ngikaweikinak ka ngikarikok a ngajorei ana abongunete alojie.

¹⁵Kingit ngesi kesi tama, “Kotere nyo isidongitotor esi ngaberu daang eyarete?

¹⁶Kitamutu atamar ngaberu kolong ewapete ngakiro a Balaam, sodi kitongero ngitunga Ekapolon Akuj alo Peor. Ibore kolong ngini ngesi ayauni edeke loaronon lotunga a Ekapolon Akuj.

¹⁷Tokona bocha, taara ngide lusapa daang ka aberu daang na eperito ka ekile,

¹⁸nakaneni kimiekisi ngapesur daang ka ngaberu daang na nyepero ka ngikiliok, toliworos ngakus.

¹⁹Ejoikinit tokona itwaan daang ni earit itwaan kori ni etapit itwaan nikatoan, iboikin nikalapatan a adakar a ngirwa a ngikan-kaarei. Akolongit na a ngauni ka na ngakan-kaarei, kitosegas aapei ka ngaberu na ilemasi esi.

²⁰ Ejoikinit esi itosegete tani eworu daang, ka ibore daang nileu, ta nia ngajul a ngaanei, kori nikitoe.”

²¹Tolimok Eleasar lo erai emuron a Akuj ngikiliok lu abongunete alojie tama, “Ngitalio lugu kesi ainaki Ekapolon Akuj Musa.

²²Ngasua make na eraakasi egolit ka akwangat, ka nanyang, ka nakirion, ka nakaabenan, ta naapotion,

²³aapei ka ibore daang ni nyenomiari akim, kesi isitorio kiding akim kitosegae. Ngiboro luche daang lu epedori akim anomiar, ilotario a ngakipi kitosegae.

²⁴Ani akolongit na ngakan-kaarei, kilotasi esi ngiworui kus, toliworotor lu italeuno sodi kitachamun ilomunete nadakar.”

²⁵Tolimok Ekapolon Akuj Musa tama,

²⁶“Esakitae iyong ka Eleasar, ta ngikarikok luche a ngitunga, imarunete ngiboro daang lu angatario, ka ngitunga ta ngibaren.

²⁷Totiaka ngiboro ngulu ngatiaket ngaarei, toliwor atiaket apei aka ngasigerea, toliwor nache aka ngitunga aluche.

²⁸Anatiaket ana a ngasigerea, totiakakisi Ekapolon Akuj ngiboro ngiche. Tolemikisi Ekapolon Akuj asiger apei anasigerea a ngamiae a ngakan, tosuba loger lopei ngolo anaatuk, ka ngisikiria, ka ngamesekin, ta ngaanei.

²⁹Nak ngiboro ngulu Eleasar lo erai emuron a Akuj, toliworos elemikinitae Ekapolon Akuj.

³⁰Aloboro alu etiakakinitae ngitunga luche, tolemutu asiger apei anasigerea a natomwon-kan, tosuba loger lopei ngolo anaatuk, ka ngisikiria, ka ngamesekin, ta ngaanei. Nak ngiboro ngulu Ngilawi lu eweikinito eam a Akuj.”

³¹Tosubakis Musa ka Eleasar ngakiro na adunguni Ekapolon Akuj.

³²Arai ekimar a ngiboro alu angatarete ngasigerea peimaritae lu etiliworete kesi ngikech, arai ngamesekin ka ngaanei 675,000,

³³ka ngaatuk 72,000,

³⁴ka ngisikiria 61,000,

³⁵ta ngaberu 32,000 na aringa nyepero ka ngikiliok.

³⁶Arai ekimar a atiaket ana a ngasigerea ngamesekin ka ngaanei 337,500.

³⁷Arai na alemikinitae Ekapolon Akuj 675.

³⁸Arai ekimar a ngaatuk 36,000, toliworos na alemikinitae Ekapolon Akuj 72.

³⁹Arai ekimar a ngisikiria 30,500, toliworos lu alemikinitae Ekapolon Akuj 61.

⁴⁰Arai ekimar a ngaberu ana aringa nyepero ka ngikiliok 16,000, toliworos na alemikinitae Ekapolon Akuj 32.

⁴¹Sodi abu Musa nak Eleasar alemunet na alemikinitae Ekapolon Akuj, loger losek adungunitor Ekapolon Akuj.

⁴²Ariyan atiaket na a Ngisirael ka atiaket na atiakakini Musa ngasigerea.

⁴³Arai ekimar a ngamesekin ka ngaanei 337,500,

⁴⁴ka ngaatuk 36,000,

⁴⁵ka ngisikiria 30,500,

⁴⁶ta ngaberu 16,000.

⁴⁷Abu Musa tolem anatiaket kangina, itwaan ipei alotunga a ngitomwon-kan, ka ibarasit ipei alobaren a ngitomwon-kan, sodi nak Ngilawi lu arai kesi aweikinito eam a Akuj, loger losek adungunitor Ekapolon Akuj.

⁴⁸Ani erumor, apot ngikaweikinak lusek arikito ngasigerea nia Musa

⁴⁹sodi tolimokis tamasi “Ekapolon, kimaru sua ngasigerea kosi daang, nakaneni eyakasi daang.

⁵⁰Kiyaunit sua ngiboro lu kianyuni lu eraakasi, asir a egolit, ka ngigiel, ka ngasua a ngakan, ka ngikabaabae, ka ngamaritoi, ta ngalagam. Kilemikinit sua Ekapolon Akuj toliworos kesi etachitere akiyar kosi, kiyokio ngesi sua.”

⁵¹Apot Musa ka Eleasar yaut egolit ngolo, lo arai daang asir.

⁵²Arai egolit daang lo alemikinete ngikaweikinak Ekapolon Akuj, ngakiloi ngamiae ngaarei.

⁵³Ngulu, pearai ngikaweikinak, apot kesi totinga ngiboro lu angatarete.

⁵⁴Apot Musa ka Eleasar yaasi egolit ngolo loeam, sodi kiyokio Ekapolon Akuj Ngisirael.