Read turkana Ekimar 32 Bible Online

Ekimar 32 - turkana bible

Ekimar 32

¹Ayakasi ngitela a Reuben ka Gad ngaatuk nakaalak noi. Na engolikineta kesi atamar ejok akwap a Yaser ka Gilead anaatuk,

²apot kesi toloto nia Musa ka Eleasar ta ngikarikok luche a ngitunga tamasi,

³“Ngakwapea a Ataros, ka Dibon, ka Yaser, ka nimura, ka Echibon, ka Eleale, ka Sibima, ka Nebo, ta Beon,

⁴nakolong etiliwori Ekapolon Akuj ngaka Ngisirael, eraakasi ngakwapea ajokak kotere ngaatuk, tarai eya sua ngaatuk nakaalak,

⁵Nakinae kare sua akwap ngina toliwor akosi, nyikiyaasi sua ekwakaye Yorudan.”

⁶Tatachak Musa kesi tama, “Eloose Ngisirael luche lojie, kibooyete esi kane a?

⁷Kotere nyo edikino esi itengerioto Ngisirael adokar ekwakaye Yorudan toloma nakwap na einakinit kesi Ekapolon Akuj?

⁸Ngakiro nakolong asubete taapakus nguna nakolong amearea ayong kesi alo Kadech Barinea alosit akireb akwap.

⁹Toloto kesi tananga nadipo a Echikol kingolikis akwap, nakaneni ani ebongunete, apot kesi tasaka akitenger ngitunga alomar nakwap na ainakinit kesi Ekapolon Akuj.

¹⁰Abu Ekapolon Akuj tongo akolongit ngina tolim akichikakinet ebala,

¹¹‘Ekongi ayong atamar, aloger awouneta akiwap ngakiro kang, emam itwaan nikolong apuduni alo Misiri daang ni erai ngikaru ngitomwon-arei kori ni iporit ni elomari nakwap na kolong echikakini ayong atamar ainakini Aburaam, ka Isaka, ta Yakobo.’

¹²Arai ngakiro nguna ngaka ngitunga kadaang pearai Kaleb lokookeng a Yepune alo erai Ekenisit, ka Yochua lokookeng a Nun, lu ewapete ngakiro a Ekapolon Akuj.

¹³Abu Ekapolon Akuj tongoik ngitunga kisirim ariet a ngikaru a ngitomwon-omwon tanang ngitunga daang a alesit ana kolong etongoi ngesi etoakete.

¹⁴Isubakis tokona esi ngakiro nakolong kata apakus, iliworosi alesit nakitetet a ngitunga alukasechak, lu isakete ayauni angoit a Ekapolon Akuj nia Isirael nabo.

¹⁵ Ani kiwout esi ngitunga a Reuben ka Gad akiwap ngesi tokona, engeri ngesi nabo ngitunga lugu daang anariet, nabo eliwor esi imunyarito ngitunga lugu daang.”

¹⁶Pot kesi nia Musa tolimokis tamasi, “Tachamakinae mono sua atoduko nganokin na a ngamoru nege kotere ngamesekin kosi, ka ngirerea lu edukitoe ngawasea kotere ngitunga kosi.

¹⁷Ani erumor atonyoutu atoloto ka Ngisirael luche lojie, tanang ni kitanangea kesi nakwap na eliwor akech. Ani tokona, iboikinosi ngitunga kosi nege lorerea lu edukitoe ngawasea toyuunotor alotunga a akwap kana.

¹⁸Nyikibonguni sua nawiyei kosi mati keriamut Ngisirael luche daang ngakwapea na einakinitae kesi.

¹⁹Emam ibore kilemari sua anikech alowae alo a ekwakaye Yorudan, kainyo kiriam sua ibore ni erai ikosi kane alo kide Yorudan.”

²⁰Tatachu Musa tama, “Ani kerai ngakiro na iruorosi esi ngaka iteni, tonyoutu tokona kona kane alongaren Ekapolon Akuj toloto lojie.

²¹Tonyout ngikiliok kus daang lu a ejie todokasi ekwakaye Yorudan, torik Ekapolon Akuj, sodi toremo ngimoe tanang ni idwangea Ekapolon Akuj kesi,

²²sodi tolema akwap. Ani erumor, tobongut esi, kainyo irumosi etich kus ani a Ekapolon Akuj ka Ngisirael luche, sodi toliworor akwap na alo kide Yorudan naga akus alongaren Ekapolon Akuj.

²³Nakaneni ani pekirichakis esi akichikakinet kus, kechikichiki atamar isechakinito esi Ekapolon Akuj. Warasi nyiichwangakis nguna. Kirirao esi kotere akisech kus.

²⁴Toduko robo ngirerea kus ka nganokin a ngamesekin kus, nakaneni tosubakis nguna ilimut!”

²⁵Tolimut ngikiliok a ngitela a Gad ka Reuben tamasi, “Ekapolon, kisubakini sua loger lo idunguni iyong.

²⁶Idongete ngaberu kosi, ka ngide, ka ngaatuk, ta ngamesekin nege lorerea a Gilead.

²⁷Nakaneni kinyounit sua daang alosit lojie kitorik Ekapolon Akuj. Kidokari sua ekwakaye Yorudan atojwoto loger lo ilimunio iyong.”

²⁸Sodi abu Musa todungok Eleasar ka Yochua ta ngikarikok luche a Ngisirael tama,

²⁹“Ani kenyout ngikiliok a Gad ka Reuben todokasi ekwakaye Yorudan, toloto lojie, erikit Ekapolon Akuj, ani kingarakis kesi esi toremo akwap, nakis kesi akwap a Gilead toliwor akech.

³⁰Nakaneni ani pekedokasi kesi ekwakaye Yorudan kirukosi ka esi lojie, etiakakinio kesi akwap kech alo Kanaan loger lopei kus.”

³¹Tatachut ngikiliok a Gad ka Reuben tamasi, “Ekapolon, kisubakini sua loger lo edungunitor Ekapolon Akuj.

³² Kiriki sua Ekapolon Akuj atoloto ekwakaye nakwap a Kanaan, atojwoto, sodi toliworor akwap na alo kide Yorudan akosi.”

³³Abu Musa totiakak ngitela a Gad ka Reuben, ta epewae a ekitela a Manase, akwap daang a Sion alo arai Ekapolon a Ngiamor, ka Ogu lo apolokinit Bachan, aapei ka ngirerea ta ngakwapea na eriamito kesi.

³⁴Apot ngitunga a Gad toduko nabo ngirerea lusek adukitoe ngawasea lu araakasi, Dibon, ka Ataros, ka Aroer,

³⁵ka Atiros, Chopan, ka Yaser, ka Yogibea,

³⁶ka Bes Nimura, ta Bes Aran.

³⁷Toduko ngitunga a Reuben ngirerea a Echibon, ka Eleale, ka Kiriasaim,

³⁸ka Nebo, ka Baal-meon (apon ekiro ngolo kilochoi). Apot kesi tanyarata ngirerea lu adukete a ngirora alukitet.

³⁹Apot ngitunga a emachar a Makiri alo arai lokookeng a Manase toremo akwap a Gilead, toloma, kiritasi Ngiamor lusek alomito neni.

⁴⁰Sodi abu Musa nak ngitunga a emachar a Makiri akwap a Gilead, toloma neni.

⁴¹Abu Yair lo arai eka ekitela a Manase torem ka alemar ngadakarin ngache, sodi tanyara ekiro be “Ngadakarin a Yair.”

⁴²Abu Noba torem ka alemar Kenas ka ngadakarin keng sodi tanyara Noba, a ekiro keng a ilope.