Read turkana Ekimar 34 Bible Online

Ekimar 34 - turkana bible

Ekimar 34

¹Abu Ekapolon Akuj tolimok Musa

²ngakiro nugu kotere Ngisirael, “Na ilomareta esi Kanaan, nakwap na kainak ayong esi, ikokinete ngikukuorea a akwap kus nege.

³Isiakini ekukuor lo alokuju anariet a Sin, kitor lokukuor a Edom. Isiakini alo kide alosal alo alokwap anam a Amakat.

⁴Ani erumor torei kuju lowae lo a apak a Akirabim, tolot kitor Sin tanang kadech Barinea alokuju. Ani erumor torei kwap tanang Asar Adar ka Simon,

⁵ni erear tanang nadipo na eyei lokukuor a Misiri, tasalu alo Mediterenian.

⁶“Anam a Mediterenian ngesi eliwor ekukuor alo too.

⁷“Idiri ekukuor lo alokwap napei alo Mediterenian tanang moru a Nor,

⁸ani enyouni kaneni tolot napak a Amas. Torotok ngaren tanang Sedad

⁹ka Sipiron, tasalu alo Asar Enan.

¹⁰“Idiri ekukuor lo alo kide napei alo Asar Enan tanang Chepam.

¹¹Ani erumor tolot tanang Abel alokuju, kide Ain, tanang lomukur lua lokide anam a Galilaya,

¹²ani erumor kiwapak angolol a Yorudan alokuju tanang nanam a Amakat. “Ngulu kesi eliworosi ngikukuorea luomwon a akwap kus.”

¹³Sodi tolimok Musa Ngisirael tama, “Akwap naga ngesi ilemarete esi kotere akiram ekura, akwap na ainaki Ekapolon Akuj ngitela lukan-koomwon ka epewae a ekitela a Manase.

¹⁴Ngitela a Reuben ka Gad, ta epewae a ekitela a Manase, ariamut akwap kech, etiakitae itemem ka ngawiyei kech.

¹⁵ Einakinitae kesi akwap alowae alo alo kide Yorudan alo ekienyikina ka Yeriko.”

¹⁶Tolimok Ekapolon Akuj Musa tama,

¹⁷“Eleasar lo erai emuron a Akuj, ka Yochua lokookeng a Nun, kesi etiakakinete ngitunga akwap.

¹⁸Tolem nabo ekarikon epei alokitela kadaang kingarakinos ka kesi akitiak akwap.”

¹⁹Ngirora a ngitunga alu aseuni Ekapolon Akuj kesi lugu. Alokitela a Yuda, aseunio Kaleb lokookeng a Yepune.

²⁰Alokitela a Simeon, aseunio Chelumiel lokookeng a Amiud.

²¹Alokitela a Benjamen, aseunio Elidad lokookeng a Kilison.

²²Alokitela a Dan, aseunio Buki lokookeng a Yogili.

²³Alokitela a Manase, aseunio Aniel lokookeng a Epod.

²⁴Alokitela a Epiraim, aseunio Kemuel lokookeng a Chipitan.

²⁵Alokitela a Sebulun, aseunio Elisapan lokookeng a Parinak.

²⁶Alokitela a Isakar, aseunio Palitiel lokookeng a Asan.

²⁷Alokitela a Acher, aseunio Aiud lokookeng a Chelomi.

²⁸Alokitela a Naputal, aseunio Pedael lokookeng a Amiud.

²⁹Ngulu kesi aseuni Ekapolon Akuj atiakakin Ngisirael akwap a Kanaan.