Read turkana Ekimar 35 Bible Online

Ekimar 35 - turkana bible

Ekimar 35

¹Anaroatin a Moab, ekwakaye Yorudan alo Yeriko, tolimok Ekapolon Akuj Musa tama,

²“Tolimok Ngisirael atamar anakwapea ana elemarete kesi, ejoikinit etiakakinete Ngilawi ngirerea lu elomete ka ni edakasi ngibaren, ni iriamit ngirerea ngulu.

³Eliworosi ngirerea ngulu ngika Ngilawi, toloma kesi neni. Eliwor ni edakasi ngibaren ika ngaatuk kech, ka ngibaren kech daang.

⁴Esakitae ni edakasi ngibaren itemio napei alore elosi nikalapatan ngamitae 450 alowaitin kadaang,

⁵sodi min ni eriyan ngiwaitin daang, erai ewae epei ngamitae 900, toyei ere kiding.

⁶Esakitae esi iinakinete Ngilawi ngirerea ngikan-kapei lu eyuunotor ngitunga, lu epedori itwaan adukia erai kear niche peiyechakinit. Ani erumor, nakis kesi nabo ngirerea ngiche ngitomwon-omwon ka ngiarei,

⁷aapei ka ni edakasi ngibaren, toliworos daang ngirerea ngitomwon-omwon ka ngikan-kauni.

⁸ Ejoikinit ekimar a ngirerea a Ngilawi, lu elemuni ekitela daang, itemio ka etiae a akwap kangina.”

⁹Tolimok Ekapolon Akuj Musa

¹⁰atamar tolimok Ngisirael tama, “Na idokareta esi ekwakaye angolol a Yorudan tolomasi nakwap a Kanaan,

¹¹esakitae esi iseunete ngirerea lu eloose ngitunga na edokinioto, lu epedori itwaan amatar erai kear niche peiyechakinit.

¹²Neni ngesi edukea ngesi anitwaan ani esaki atachakin akitu a eyenet keng alo atoana. Itwaan ni ititakinio atamar earit niche, nyejoikinit eario mati keyaun lokies alongaren ngitunga daang.

¹³Toseutu ngirerea ngikan-kapei,

¹⁴nguuni alo kide Yorudan ka nguuni anakwap a Kanaan.

¹⁵Eliworosi ngulu ngirerea lu edokinete Ngisirael ka ngitunga a ngakwapea anache lu eraakasi ngikalotok ka lu elomito neni. Itwaan daang ni eari itwaan peiyechakinit epedori alosit ni eyei epei a ngirerea kangulu toduk.

¹⁶“Nakaneni ani keram itwaan niche a ibore anisuat, totoan, aliwor ngesi ekaaran, eario ngesi.

¹⁷Ani kimas ngesi itwaan a amoru taar, aliwor ngesi ekaaran, eario ngesi.

¹⁸Kori ani keram ngesi itwaan a akitoe, taar, aliwor ngesi ekaaran, eario ngesi.

¹⁹Epedori eyenet a itwaan anikatoan taar ekaaran ngolo. Ani keanyu eyenet ngolo ngesi, ejoikinit eari.

²⁰“Ani keremokin itwaan niche sodi taar ani emasakinea ngesi nalup, kori emasea a ibore

²¹kori ani elulungikinea akan, aliwor ngesi ekaaran, eario ngesi. Epedori eyenet a itwaan anikatoan kangini taar ekaaran ngolo. Ani keanyu eyenet ngolo ngesi, ejoikinit eari.

²²“Ani bo kear itwaan niche peiyechakinit ani ejukarea kimasak nalup kori ani emasea a ibore.

²³Kori ani bo kimasa itwaan amoru peitee, tolot amoru ngina taar itwaan nipeasaki ngesi akiwan kori pearai emoit keng.

²⁴Ani kikokis ngakiro neni ejoikinit ngitunga etiakete ngakiro nguna, sodi toikis itwaan nikaaran, meere eyenet a itwaan anikatoan, lo esaki atachakin.

²⁵Ejoikinit ngitunga eyuunete itwaan nikaaran aloyenet a itwaan anikatoan, sodi tobuasi lore lo adokinit lokolong sek alosit ngesi adukia. Ejoikinit ngesi iboikin neni tanang ni etoanea itwaan ni erai emuron loapolon a Akuj a ngirwa kangulu, ani erumor tobongo nawi.

²⁶Ani kerotoki itwaan ni aari niche peiyechakinit alore alosek alosit adukia,

²⁷sodi taanyu ngesi eyenet a itwaan ani kolong aari ngesi, taar ekatachakinan akitu keng ngesi, nyerai itwaan ni atachakini akitu ngini ekaaran.

²⁸Ejoikinit itwaan ni aari niche peiyechakinit elomi lore lo edukitor tanang emuron loapolon etoani, ani ekisidi a akitu a emuron kangolo, tobongo ngesi nawi keng.

²⁹ Erai ngitalio lugu ngikus ka ngalesea kus awadaang ani ilomito.

³⁰“Itwaan ni ititakinitae atamar earit niche, epedori atamar esechit, sodi taarae erai keya ngikaanyunak ngiarei kori lukaalak. Nyepedorete ngakiro a ekaanyunan a epei akitemokin etitas ngolo.

³¹Ejoikinit ekaaran eario. Nyepedori ngesi abuchar aloriras kalo kotere akitach ngaropiyae.

³²Ani kedoki itwaan tolot lore lo eyuunere, nyiichamu ngesi etachi ngaropiyae tobongunio nawi eringa emuron loapolon Akuj nyetoana.

³³Ani kisubakis esi kongina, inyasunete esi akwap na ibooyoto. Inyasuni akiar ngitunga akwap. Mati kear itwaan ni eari niche ngesi italeunor akwap na earere itwaan.

³⁴Nyiinyasut akwap na ibooyoto esi, kainyo arai ayong Ekapolon Akuj, nabo ebooyi alokiding Ngisirael.”