Read turkana Ekimar 36 Bible Online

Ekimar 36 - turkana bible

Ekimar 36

¹Aloose ngikapolok a ngawiyei a emachar a Gilead, alo arai lokookeng a Makiri tarai etatait a Manase alo erai lokookeng a Yosep, toloto nia Musa ka ngikarikok luche.

²Tolimut kesi tamasi, “Kidungokini kolong Ekapolon Akuj esi atiakanakin Ngisirael akwap a akiram ekura. Kidungokini kolong esi tani ainakin tanakookeng a Selopead alo erai eyenet kesi, ibore nikolong arai ikeng.

³Nakaneni ani kiuta kesi ngikiliok a ekitela a eche, eliworosi ngiboro ngulu ngika ekitela kangolo, sodi toditeu ibore nikitiakakinitae sua.

⁴ Ani enangi ekaru lo ebuarere ngiboro daang lukolong agielio lokulepek, iatakinio ngiboro a tanakookeng a Selopead lokitela lo iusitere kesi, sodi tolemarae alokitela yok.”

⁵Sodi tolimok Musa Ngisirael ngakiro nugu na adunguni Ekapolon Akuj. Tolim ngesi tama, “Iyookino ngakiro na iruorosi ngitunga a ekitela a Manase.

⁶Adungu tokona Ekapolon Akuj atamar epedorete tanakookeng a Selopead achamun ngikiliok cha daang ajoikinete kesi, sodi kiutas, nakaneni ejoikini erai lua ekitela kech make.

⁷Emam ngiboro a Ngisirael lu eloose lokitela loche. Eliwor ibore a Esiraelit kadaang ika ekitela keng.

⁸Aberu na irumi ibore alokitela a Isirael, ejoikinit echamuni ekile a ekitela keng kiutas. Erot ngolo ngesi irumea Esiraelit daang ibore a taapaakeng

⁹nakaneni nyipori ibore alokitela a epei tolot lokitela loche. Etingi ekitela daang ibore keng a ilope.”

¹⁰Apot tanakookeng a Selopead tosuba loger lo adungokinitor Ekapolon Akuj Musa.

¹¹Apot Maala, ka Tirisa, Ogila, ka Milika ta Noa na araakasi tanakookeng a Selopead, tachamut talokaapakech kiutas.

¹²Apon kesi kiutae alomacharin a ekitela a Manase alo erai lokookeng Yosep, sodi kidongo ngiboro kech erai ngika ekitela a apakech.

¹³Ngitalio ngulu kesi ainakini Ekapolon Akuj Ngisirael, isitorunit nia Musa, anaroatin a Moab ekwakaye angolol a Yorudan alo Yeriko.