Read turkana Ekimar 4 Bible Online

Ekimar 4 - turkana bible

Ekimar 4

¹Tolimok Ekapolon Akuj Musa ka Aron tama,

²“Kimarutu ngitunga a emachar a Koas alo a ekitela a Lawi. Kimarutu a ngatekerin ka ngawiyei,

³nabo kimaru ngikiliok lu eraakasi ngikaru kech ngitomwon-uni tanang ngitomwon-kan, lu epedorete akisub etich aloeam a Akuj.

⁴Esubete kesi etich lo erai eka ngiboro alu italeunitoe noi.

⁵“Ani enangi esaa lo eramakinere, elomarete Aron ka talokookeng loeam talachut awaru na eyei ngaren asaduku a achamunet sodi tarapeta asaduku.

⁶Tolemut eleu lokaanokan tarapakis, sodi kimukokis awaru napus alokidiama, ani erumor kirepakis ngakito nakilepilepiet.

⁷“Elemunete kesi awaru napus topetakis lomeesa loa ngamugati ana elemanakinio Ekapolon Akuj sodi kidokokis ngatubwae nabeleny, ka ngatubwae na emitina alo inomeeneo, ka ngatubwae na a ngadekon, ta ngachupae na a ngadekon a emuna. Epete ngamugati lomeesa jiik.

⁸Imukokinete kesi awaru naarengan loboro ngulu daang, tarapakis eleu lokaanokan, ani erumor kirepakis ngakito nakilepilepiet.

⁹“Elemunete kesi awaru napus tarapeta ni esipor ataa, ka ngataae keng, ka ngasua nakitudungeet akim, ka ngiboro lu ikachanakinio kesi, ta ngiboro daang lutinget akimiet a ngikito.

¹⁰Emukeikinete kesi ka ngiboro keng daang loleu lokaanokan kimuko sodi kidokokis nakito nakilepilepiet.

¹¹“Ani erumor tolemut awaru napus tarapeta ekeno a ngakipeyos lo erai eka egolit, kimukokis eleu lokaanokan alokidiama, ani erumor kirepakis ngakito nakilepilepiet.

¹²Elemunete kesi ngiboro daang lupalem eyakasi ni italeunitoe tomukeikis nawaru napus, sodi tarapakis eleu lokaanokan alokidiama, ani erumor kirepakis ngakito nakilepilepiet.

¹³Emudarete kesi ekuron lo itilit alokeno alo a ngakipeyos sodi kimukokis awaru napus kidiama.

¹⁴Iwaakinete kesi ngiboro lupalem esubere etich alokeno a ngakipeyos kidiama neni. Ngiboro ngulu kesi, ngasua na elemere ngatotol anakim ka ngikodo, ka ngakalobochio nawadet ngalup, ta ngatubwae. Ani erumor kimukokis eleu lokaanokan kidiama, sodi kirepakis ngakito nakilepilepiet.

¹⁵Ani enangi esaa lo eramakinere, esakitae ngitunga a emachar a Koas edakete ngiboro lu italeunitoe ngulu, erai kerumosi Aron ka talokookeng akimuk ngiboro ngulu daang. Nyechamitae ngitunga a emachar a Koas etapete ngiboro lu italeunitoe ngulu, kainyo ani kikokis neni, etoakete. “Etich ngolo ngesi esakitae ngitunga a emachar a Koas esubete na eyatarere eam kang yaarae wache.

¹⁶“Eleasar lokookeng a Aron alo erai emuron a Akuj, ngesi eweikini eam kang daang, ka akimiet a ngataae, ka emitina, ka ngadekon a ngalemet, ka akimiet na idokanakinio ngimurok a Akuj nakies, ta ibore daang ni eyei loeam ni etaleun toliwor ika Ekapolon Akuj.”

¹⁷Tolimok Ekapolon Akuj Musa ka Aron tama,

¹⁸“Warasi ngitunga a emachar a Koas

¹⁹nyear ani eapikineta ngiboro lu italeunitoe noi. Ani esakio akiratakin kesi nyeetoaka, esakitae Aron ka talokookeng tolomasi tooma sodi totiakakis itwaan daang etich keng, nabo kidodikis ibore ni edaki.

²⁰Nakaneni etoakete ngitunga a Koas, kelomasi kesi loeam sodi kingolikis ngimurok a Akuj ngulu esubete ngiboro lu italeunitoe ngulu sodi tadakere.”[1]

²¹Tolimok Ekapolon Akuj Musa

²²tama, “Kimaru ngitunga a emachar a Gerichon alo a ekitela a Lawi, kimaru a ngatekerin ka ngawiyei,

²³nabo kimaru ngikiliok a ngikaru a ngitomwon-uni tanang ngitomwon-kan, lu epedorete akisub etich aloeam a ekapolon Akuj.

²⁴Etich kech ngesi akidak ngiboro lugu,

²⁵eam ka ngiboro lu eburitere tooma ka nikalapatan, ka alaar, ka eleu lokaanokan lo imukokinitae kidiama, ka awaru na erapitere akituk a eam

²⁶ka ngawarui aapei ka ngaunoi na anikalapatan a eam ani elukakina eam ka ekeno a ngakipeyos, ka awaru na a ekidor a alaar, ta ngiboro luche daang lu itoweyere ngiboro ngulu. Esubete kesi ngitichisio daang lua ngiboro kangulu.

²⁷Ejoikinit Musa ka Aron ingolikinete atamar asubakis Ngigerichon ngitichisio daang lusek atiakakinete Aron ka talokookeng kesi.

²⁸Ngitichisio ngulu kesi esubete ngitunga a emachar a Gerichon aloeam kang. Esubete kesi ngitichisio ngulu iwapito ngakiro a Isamar alo erai lokookeng a Aron, alo erai emuron a Akuj.”

²⁹Tolimok Ekapolon Akuj Musa tama, “Kimaru ngitunga a emachar a Merari, alo a ekitela a Lawi, kimaru a ngatekerin ka ngawiyei,

³⁰sodi kigir ngikiliok a ngikaru a ngitomwon-uni tanang ngitomwon-kan, lu epedorete akisub etich aloeam a Ekapolon Akuj.

³¹Eliwor etich kech ngesi akiwok ngakito nakiganget eam kang, ka ngasua nakapisa, ka ngapirio, ta ngiwaitin lua ngalup a eam.

³²Etich kech nabo tani kesi ngapirio ka ngiwaitin lua ngalup, ka ngakito na itoweito eam, ka ngaunoi na anikalapatan ani irimit eam, ka ngiboro luche daang lukitoweet eam. Etiakakinio itwaan daang ngiboro lu iwoki.

³³Ngitichisio ngulu kesi esubete ngitunga a emachar a Merari. Esubete kesi ngitichisio ngulu iwapito ngakiro a Isamar alo erai lokookeng a Aron, alo erai emuron a Akuj.”

³⁴Apot Musa ka Aron ta ngikarikok, kimarut ngitunga a emachar a Koas, a ngatekerin ka ngawiyei kech,

³⁵kimarut ngikiliok lu anangito ngikaru kech ngitomwon-uni tanang ngitomwon-kan, daang lu cha apedorete akisub etich aloeam a Akuj.

³⁶Toliwor ekimar lo emarere kesi a ngawiyei kech, ngitunga 2,750.

³⁷Ngolo ngesi arai ekimar a ngitunga emachar a Koas. Araakasi ngulu daang lu asubete etich aloeam a Ekapolon Akuj, lu emarunete Aron ka Musa loger lokolong adungokinitor Ekapolon Akuj Musa.

³⁸Emarunio ngitunga a emachar a Gerichon a ngatekerin ka ngawiyei kech.

³⁹Emarunio lu enangito ngikaru kech ngitomwon-uni tanang ngitomwon-kan, daang lu apedorete akisub etich aloeam a Ekapolon Akuj,

⁴⁰toliwor ekimar lo emarere kesi a ngawiyei kech, ngitunga 2,630.

⁴¹Ngolo ngesi erai ekimar a ngitunga a emachar a Gerichon. Araakasi ngulu daang lu asubete etich aloeam a Ekapolon Akuj, lu emarunete Musa ka Aron loger lokolong adungunitor Ekapolon Akuj.

⁴²Emarunio ngitunga a emachar a Merari a ngatekerin ka ngawiyei kech.

⁴³Emarunio lu anangito ngikaru kech ngitomwon-uni tanang ngitomwon-kan, daang lu apedorete akisub etich aloeam a Ekapolon Akuj,

⁴⁴toliwor ekimar lo emarere kesi a ngawiyei kech, ngitunga 3,200.

⁴⁵Ngolo ngesi erai ekimar a ngitunga a emachar a Merari, lu emarunete Musa ka Aron loger lokolong adungokinitor Ekapolon Akuj Musa.

⁴⁶Apot Musa ka Aron, ta ngikarikok a Ngisirael, kimara ngitunga a ekitela a Lawi a ngatekerin ka ngawiyei kech.

⁴⁷Kimarut lu anangito ngikaru kech ngitomwon-uni tanang ngitomwon-kan, daang lu apedorete akisub etich aloeam a Ekapolon Akuj,

⁴⁸toliwor ekimar kadaang alu emarunio, ngitunga 8,580.

⁴⁹Apon itwaan daang kimarunae loger losek adungokinitor Ekapolon Akuj Musa. Apon nabo totiakakinae itwaan daang etich keng lo esubi, ka ibore ni edaki, loger losek adungokinitor Ekapolon Akuj Musa.