Read turkana Ekimar 5 Bible Online

Ekimar 5 - turkana bible

Ekimar 5

¹Tolimok Ekapolon Akuj Musa tama,

²“Todungok Ngisirael atamar kitwarakis anadakar itwaan daang ni edeak a enomokere, ka ni elelee ibore niaronon anakwaan keng, ta itwaan daang ni nyitaleunitoe ani atapea itwaan nikatoan.

³Kitwarakisi ngitunga lu nyitaleunitoe ngulu daang nikalapatan anadakar sodi nyiinyasut adakar, ni erai ngesi ebooyo ayong alotunga kang,”

⁴Apot Ngisirael kiirasi ngakiro nguna, sodi kitwarakis kesi daang anadakar

⁵Tolimok Ekapolon Akuj Musa tama,

⁶“Tolimok Ngisirael kona, ani kesechaki itwaan Ekapolon Akuj sodi tosubakinea itwaan niche naaronok,

⁷ejoikinit ngesi elimori akisech keng, tatach amicha a akisech kangina kadaang, kiatak nabo alemunet apei anakan ni eyei ibore ni etachitor ngesi amicha, sodi nak itwaan ni esechakinit ngesi.

⁸Nakaneni ani ketoanit itwaan ni esechakinit ngesi, tarai emam eyenet keng lo eyei diyete lo epedorio atachakin ibore ngini, einakinio Ekapolon Akuj ibore ngini toliwor ika emuron a Akuj. Eliwor ibore ngini ni iatakinio lomesek lo italeunere itwaan nikasechan ngini.

⁹Ani nabo dang, alemunet daang na iwakiwakio na elemanakinete Ngisirael Ekapolon Akuj, eliwor aka emuron alo elemikinete kesi.

¹⁰ Ejoikinit emuron a Akuj daang ikachakini ngadekon na einakinio ngesi.”

¹¹Todungok Ekapolon Akuj Musa tama,

¹²“Tolimok Ngisirael kona, epedori aberu a itwaan toroner toliwor akaloman alongaren ekile keng,

¹³sodi topero ka ekile eche, nakaneni nyeeyen lokile keng ngakiro nguna, nabo nyeetakanu akisech a aberu kangina ani emamakar ekaanyunan lokolong erumuni ngesi ka ekile eche eperete.

¹⁴Kori epedori tani lokile keng toting etereku, tama kori esechit aberu keng, tarai bo nyesechit aberu, kori tani epedori toliwor esechit aberu.

¹⁵Anakiro kanguna kadaang, esakitae ekile ngolo toriko aberu keng lomuron a Akuj. Esakitae tani yaa alemunet na esakitae, na erai akilo apei a ngakiria a erau, nakaneni nyiidokak akimiet a ngikito nakiria nguna kori nyiiwaak tani emitina, kainyo erai alemunet a ekile alo engayat ngakiro a aberu keng, nabo erai alemunet na elemunitae kisileereu ngakiro na a iteni.

¹⁶“Erikuni emuron aberu ngina kitowo alongaren ekeno a ngakipeyos.

¹⁷Elemuni ngesi ngakipi na italeunitoe tobukok nagulu, sodi tolem ngalup na alotooma eam a Akuj kiwaak nakipi nguna todwaraketa.

¹⁸Elachari ngesi ngitim a aberu kangina sodi kiwaak alemunet na a ngakiria ngina nakan keng. Etingi emuron atubwa na eyakasi ngakipi naadwarak na eyaunete ngilam.

¹⁹Sodi kisikong emuron aberu ngina. Elimuni emuron tama, ‘Ani pekilomit iyong nyikiwanete iyong ngilam a ngakipi anaadwarak kanu.

²⁰Nakaneni ani kilomit iyong,

²¹kitiliwori iyong Ekapolon Akuj itwaan nilamam alokiding ngitunga kon. Echikini ngesi ngakalokidingo kon nabo kisiwuk akook[2] kon.

²²Kimiek ngakipi nugu tolomasi nakook kon sodi kisiwukis nabo tochikis ngakalokidingo kon.’ Etachuni aberu ngina tama, ‘Acham. Tosubak Ekapolon Akuj loger ngolo.’

²³“Ani erumor, igirakini emuron ngilam ngulu nakitab sodi kikisak ngagiran nguna natubwa na eyakasi ngakipi naadwarak.

²⁴Ani eringa ngesi nyitamata aberu ngakipi na epedorete ainakin ngesi nikaapilan,

²⁵elemari emuron alemunet a ngakiria na eyakasi nakan a aberu, sodi kiwaak lokeno a ngakipeyos.

²⁶Ani erumor emukuni emuron ngakiria a akan a apei ileleba toliwor akipeyos nakisitamunet, sodi kinom alokeno a ngakipeyos. Ani erumor kitamat ngesi aberu ngina ngakipi nguna.

²⁷Ani kelomit ngesi einakinete ngesi ngakipi nguna nikaapilan. Iwukini akook keng nabo echikin ngakalokidingo keng. Eliwor ekiro keng lo ilamam alokiding ngitunga keng.

²⁸Nakaneni ani pekesechit ngesi, nyewana ngesi nabo epedori akidoun ngide.

²⁹“Erai etal ngolo eka ngakiro a etereku kotere aberu na eroner tolom tarai na iusitae.

³⁰Erai nabo kotere na etingea ekile etereku ani engayar ngakiro a aberu keng. Esakitae emuron itowei aberu ngina alongaren Ekapolon Akuj, sodi tosub emuron etal logo daang anaberu kangina.

³¹Eliwor ekile lo emam akisech na esubit, nakaneni ani kesech aberu, ejoikinit irirao.”