Read turkana Ekimar 6 Bible Online

Ekimar 6 - turkana bible

Ekimar 6

¹Todungok Ekapolon Akuj Musa tama,

²“Tolimok Ngisirael kona, itwaan cha daang kerai ikile kori iberu, ni ikongi atamar etaleun atoliwor ika Ekapolon Akuj,

³ejoikinit peemasi emuna lo epuritoe kori epurot. Nyejoikinit ngesi emasi emuna lo epuritoe cha daang lo esubunitae anageor a ngamusabib, kori nyeenyam ageor a ngamusabib kori nyeenyam ngarinyo a ngamusabib.

⁴ Ngirwa daang lu eraakar ngesi ikitaleuno ani Ekapolon Akuj, nyejoikinit enyami ibore daang ni elemunitae alokito a ngimusabib, kerai tani ngichok kori ngapocho a ngimusabib.

⁵“Ngirwa daang lu eringaakar iwapit akikong na eraakar ikitaleuno ani a Ekapolon Akuj, nyejoikinit ngesi etubi ngitim keng kori ebanyi akou. Irichakini ngesi akikongiet ngina ngirwa daang lu eringaakar ngesi itegeliara ani a Ekapolon Akuj. Ejoikinit ngesi imiekini ngitim lua akou ka ngajul na abokony toruput tooyaketa.

⁶Nyejoikinit ngesi eapiyari diyete itwaan nikatoan ngirwa daang lu italeunookor ngesi eraakar ika a Ekapolon Akuj.

⁷Nyejoikinit ngesi eapiari nitwaan nikatoan tani kerai apakeng kori itiokeng, kori lokaatokeng, kori nakaatokeng kainyo ngitim keng erai emachar lo idodiunit atamar erai ngesi ika Ekapolon Akuj.

⁸Ngirwa daang lu italeunookor ngesi, eliwor ngesi ika Ekapolon Akuj.

⁹“Ani ketoana itwaan atipei alodiyete ikitaleuno Akuj, sodi tosech etal lo a ngitim, ejoikinit ngesi idari ani adaunet a ngirwa a ngikan-kaarei, tabany akou keng ka abokony keng. Erot ngolo ngesi italeunor ngesi.

¹⁰Ani akolongit na ngakan-kauni, ejoikinit eyauni ngakurio ngaarei kori takidomelio ngaarei nak emuron a Akuj, anakituk a eam a Akuj.

¹¹Elemuni emuron akuuri apei toliwor akipeyos a akisech, sodi tolem nache toliwor akipeyos na inomio. Erot ngolo ngesi italeunio emuron itwaan ngini anakisech keng ani aapikinea diyete itwaan nikatoan. Akolongit napei ngina, esakitae ngesi italeuni nabo ngitim keng,

¹²sodi kitaleun ani a Ekapolon Akuj. Nyimarunitae ngirwa luche a ekingaren, kainyo abu ngesi tosech etal a ngitim keng alusek etaleunitoe. Ejoikinit ngesi eyauni imesek ni erai ekaru epei toliwor akipeyos a atachanot.

¹³“Ani edaun ngirwa lukolong ekongitor itwaan ngini aliwor ika Akuj, ejoikinit iwapi etal logo, elosi ngesi nakituk a eam,

¹⁴sodi tolemik Ekapolon Akuj imesek nikile ipei ni erai ekaru epei tamam ni ichwangakina, toliwor akipeyos na inomio. Tolem nabo imesek niberu ipei ni erai ekaru epei tamam ni ichwangakina toliwor akipeyos a akisech. Tolem nabo emesek epei lo emam ni ichwangakina toliwor akipeyos a ekisil.

¹⁵Elemuni ngesi nabo akikap apei na eyakasi ngamugati ngalooso ngauni na emam ekitoe lo itubui, ka ngamugati nalangir na esubitae a ngakiria anaajokak ka akimiet, ta ngabisikutio, aapei ka ngadekon a ngalemet ka emuna lo epuritoe.

¹⁶“Eyauni emuron kesi daang nia Ekapolon Akuj sodi kipeyo akipeyos a akisech ka na inomio.

¹⁷Ipeyokini ngesi Ekapolon Akuj imesek toliwor akipeyos a ekisil. Elemikini tani akikap na a ngamugati ana emam ekitoe lo itubui. Elemikini tani ngadekon a ngikinyam ka emuna lo epuritoe.

¹⁸Ebanyari itwaan ni italeuno ani a Akuj ngitim keng anakituk a eam sodi yaa kiwaak nakim na epeyere akipeyos a ekisil.

¹⁹Nakaneni elemuni emuron eseget a emesek kitukulaun kerumor, tolem nabo anakikap amugati nalangir a apei ka abisikut, sodi kiwaak nakan a itwaan ani itegeliar aliwor ika a Akuj.

²⁰Iwakawakakini emuron ngakipeyos nguna toliworos ngakipeyos na iwakiwakio ani a Ekapolon Akuj. Eraakasi kesi ngakipeyos na italeunitoe toliworos ngaka emuron, imorikina aapei ka atorobu na iwakiwakio, ta amuro nakitalio na erai aka emuron. Arumoret kanguna, echamakinio itwaan ni italeuno ani a Akuj emasi emuna lo epuritoe.

²¹ “Eraakasi ngulu ngitalio a itwaan ani ikongit akitaleun ani a Akuj. Nakaneni ani kelimu ngesi atamar alemuni alemunet ache na nyerai nakolong ekongio ngesi, ejoikinit ngesi elemuni loger lokolong sek alimunio.”

²²Todungok Ekapolon Akuj Musa tama,

²³“Tolimok Aron ka talokookeng atamar tolimuunut kona na epiareta Ngisirael.

²⁴‘Kitopia Ekapolon Akuj esi kitochoik.

²⁵Kiinak Ekapolon Akuj esi ajokis keng ka ajakaanut.

²⁶Kitominak Ekapolon Akuj esi sodi kiinak ekisil.’ ”

²⁷Sodi tolim Ekapolon Akuj tama, “Ani kepiasi kesi Ngisirael a ekiro kang, apiari ayong kesi.”