Read turkana Ekimar 7 Bible Online

Ekimar 7 - turkana bible

Ekimar 7

¹Akolongit na arumorea Musa akiduk eam a Akuj, abu ngesi kitaleu eam ka ngiboro keng daang, ta ekeno a ngakipeyos ka ngiboro keng daang.

²Ngikarikok a ngimacharin, lu araakasi ngikarikok a ngitela a Ngisirael, lu araakasi nabo ngitunga lupei kolong aweikinito ekimar,

³kesi apot yaut ngadekon nia Ekapolon Akuj. Araakasi ngadekon nguna ngaurukukui na irito ngimongin ngikan-kapei, ka ngimongin ngitomon ka ngiarei. Arai aurukuk na irito ngimongin apei aka ngikarikok a ngiarei, tarai emong epei eka ekarikon a epei. Ani kipotosi kesi ngiboro ngulu kerumor,

⁴abu Ekapolon Akuj tolimok Musa tama,

⁵“Kidiau ngiboro ngulu tosubere etich aloeam. Tokorak Ngilawi ngiboro ngulu, itemem ka etich lo esubi ipei kech daang.”

⁶Sodi abu Musa tolem ngaurukukui nguna ka ngimongin nak Ngilawi.

⁷Abu ngesi tolem ngaurukukui ngaarei ka ngimongin nguomwon nak talokookeng a Gerichon itemem ka etich kech.

⁸Tolem nabo ngaurukukui ngoomwon ka ngimongin ngikan-kauni nak talokookeng a Merari itemem ka etich kech. Asubete kesi daang etich kech iwapito ngakiro a Isamar alo arai lokookeng a Aron, alo arai emuron a Akuj.

⁹Nakaneni emam ngaurukukui kori ngimongin abu Musa nak talokookeng a Koas, kainyo kesi asubete etich a ngiboro alukitaleuno alu araakasi ngidakan alosegeta.

¹⁰Apot nabo ngikarikok tolemut ngadekon na etaleunere ekeno a ngakipeyos. Ani enangi ni elemuneta kesi ngadekon kech,

¹¹abu Ekapolon Akuj tolimok Musa tama, “Elemunete kesi ngadekon ekarikon epei akolongit apei, a ngirwa a ngitomon ka ngiarei, kotere akitaleun ekeno a ngakipeyos.”

¹²Nachon lo arai lokookeng a Aminadab alo a ekitela a Yuda ngesi alemuni ngadekon keng akolongit na a ekingaren,

¹³araakasi ngadekon keng atubwa nakwangat, na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak imorikina aapei ka akimiet na a ngakipeyos a ngalemet.

¹⁴Tolem nabo itubwa a egolit ni arai apotis keng ngagiramea 110, ni elelebitae emitina.

¹⁵Tolem nabo itaok ka emesek, ka imesek nia ekaru a epei ni arai akipeyos na inomio,

¹⁶ka ekoroe lo erai akipeyos a akisech.

¹⁷Tolem nabo ngakipeyos a ekisil na araakasi ngimongin ngiarei, ka ngimesekin ngikan, ka ngikora ngikan, ta ngimesekin lukiliok ngikan lu araakasi ngikaru ngipei-pei. Ngadekon a Nachon alo arai lokookeng a Aminadab kesi nguna.

¹⁸Nesanel lo arai lokookeng a Suar alo a ekitela a Isakar ngesi alemuni ngadekon keng akolongit na a ngaarei.

¹⁹Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemenere. Elelebitae ngatubwae nguna daang ngakiria naajokak imorikina aapei ka akimiet na a ngakipeyos a ngalemet.

²⁰Tolem nabo itubwa a egolit ni arai apotis keng ngagiramea 110, ilelebitae emitina.

²¹Tolem nabo itaok, ka emesek, ka imesek ni erai ekaru epei ni arai akipeyos na inomio,

²²ka ekoroe lo arai akipeyos a akisech,

²³ta ngakipeyos a ekisil na araakasi ngimongin ngiarei, ka ngamesekin ngakan, ka ngikora ngikan, ta ngimesekin lukiliok ngikan lu araakasi ngikaru ngipei-pei. Ngadekon a Nesanel alo arai lokookeng a Suar kesi nguna.

²⁴Eliab lo arai lokookeng a Elon alo a ekitela a Sebulun ngesi alemuni ngadekon keng akolongit na a ngauni.

²⁵Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwaangat na arai apotis keng ngagiramea 800, itemem ka eger losek itemeenere. Elelebitae ngatubwae nguna daang ngakiria naajokak imorikina ka akimiet na a ngakipeyos a ngalemet.

²⁶Tolem nabo itubwa a egolit ni arai apotis keng ngagiramea 110, elelebitae emitina,

²⁷ka itaok, ka emesek, ka imesek nikile ni erai ekaru epei ni erai akipeyos na inomio,

²⁸ka ekoroe lo arai akipeyos a akisech.

²⁹Tolem nabo ngakipeyos a ekisil na araakasi ngimongin ngiarei, ka ngimesekin ngikan, ka ngikora ngikan, ta ngimesekin lukiliok ngikan lu araakasi ngikaru ngipei-pei. Ngadekon a Eliab alo arai lokookeng a Elon kesi nguna.

³⁰Elisur lo arai lokookeng a Chedeur alo a ekitela a Reuben ngesi alemuni ngadekon keng akolongit na a ngoomwon.

³¹Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak imorikina aapei ka akimiet na a ngakipeyos a ngalemet.

³²Tolem nabo itubwa a egolit ni arai apotis keng ngagiramea 110, ilelebitae emitina.

³³Tolem nabo itaok, ka emesek, ka imesek nikile ni erai ekaru epei toliwor akipeyos na inomio,

³⁴ka ekoroe toliwor akipeyos a akisech,

³⁵ta ngakipeyos a ekisil na araakasi ngimongin ngiarei, ka ngimesekin ngakan, ka ngikora ngikan ta ngimesekin lukiliok ngikan lua ngikaru a ngipei-pei. Ngadekon a Elisur alo arai lokookeng a Chedeur kesi nguna.

³⁶Chelumiel lo arai lokookeng a Surichadai alo a ekitela a Simeon ngesi alemuni ngadekon keng akolongit na a ngakan.

³⁷Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak imorikina ka akimiet na a ngakipeyos a ngalemet.

³⁸Tolem nabo itubwa a egolit ni arai apotis keng ngagiramea 110, ilelebitae emitina.

³⁹Tolem nabo itaok ka emesek, ka imesek nikile ni erai ekaru epei toliwor akipeyos na inomio,

⁴⁰ka ekoroe lo arai akipeyos a akisech,

⁴¹ta ngakipeyos a ekisil na araakasi ngimongin ngiarei, ka ngimesekin ngikan, ka ngikora ngikan, ta ngimesekin lukiliok ngikan lu eraakasi ngikaru ngipei-pei. Ngadekon a Chelumiel alo arai lokookeng a Surichadai kesi nguna.

⁴²Eliasap lo arai lokookeng a Deuel alo a ekitela a Gad ngesi alemuni ngadekon keng akolongit na a ngakan-kapei.

⁴³Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak ka akimiet na ngakipeyos a ngalemet.

⁴⁴Tolem nabo itubwa a egolit ni arai apotis keng ngagiramea 110, elelebitae emitina.

⁴⁵Tolem nabo itaok, ka emesek, ka imesek nikile ni erai ekaru epei toliwor akipeyos na inomio,

⁴⁶ka ekoroe lo erai akipeyos a akisech,

⁴⁷ta ngakipeyos a ekisil na araakasi ngimongin ngiarei, ka ngamesekin ngakan, ka ngikora ngikan, ta ngimesekin ngikan lukiliok lu araakasi ngikaru ngipei-pei. Ngadekon a Eliasap alo arai lokookeng a Deuel kesi nguna.

⁴⁸Elichama lo arai lokookeng a Amiud alo a ekitela a Epiraim ngesi alemuni ngadekon keng akolongit na a ngakan-kaarei.

⁴⁹Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak ka akimiet na a ngakipeyos a ngalemet.

⁵⁰Tolem nabo itubwa a egolit ni arai apotis keng ngagiramea 110, ilelebitae emitina.

⁵¹Tolem nabo itaok, ka emesek, ka imesek nikile, ni arai ekaru epei toliwor akipeyos na inomio,

⁵²ka ekoroe lo erai akipeyos a akisech,

⁵³ta ngakipeyos a ekisil na araakasi ngimongin ngiarei, ka ngamesekin ngakan, ka ngikora ngikan, ta ngimesekin lukiliok ngikan lu araakasi ngikaru ngipei-pei. Ngadekon a Elichama alo arai lokookeng a Amiud kesi nguna.

⁵⁴Gamaliel lo arai lokookeng a Pedasur alo a ekitela a Manase ngesi alemuni ngadekon keng akolongit na a ngakan-kauni.

⁵⁵Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe loger losek itemeenere. Elelebitae ngatubwae nguna daang ngakiria naajokak ka akimiet na a ngakipeyos a ngalemet.

⁵⁶Tolem nabo itubwa a egolit ni arai apotis keng ngagiramea 110, ilelebitae emitina.

⁵⁷Tolem nabo itaok, ka emesek, ta imesek nikile ni arai ekaru epei toliwor akipeyos na inomio,

⁵⁸ka ekoroe toliwor akipeyos a akisech,

⁵⁹ta ngakipeyos a ekisil na araakasi ngimongin ngiarei, ka ngimesekin ngikan ka ngikora ngikan, ta ngimesekin lukiliok ngikan araakasi ngikaru ngipei-pei. Ngadekon a Gamaliel alo arai lokookeng a Pedasur kesi nguna.

⁶⁰Abidan lo arai lokookeng a Gideon alo a ekitela a Benjamen ngesi alemuni ngadekon keng akolongit na a ngakan-koomwon.

⁶¹Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak ka akimiet na a ngakipeyos a ngalemet.

⁶²Tolem nabo itubwa a egolit ni arai apotis keng ngagiramea 110, ilelebitae emitina.

⁶³Tolem nabo itaok ka emesek, ta imesek ni arai ekaru epei toliwor akipeyos na inomio,

⁶⁴ka ekoroe toliwor akipeyos a akisech,

⁶⁵ta ngakipeyos a ekisil na araakasi ngimongin ngiarei, ka ngamesekin ngakan, ka ngikora ngikan, ta ngimesekin lukiliok ngikan lu eraakasi ngikaru ngipei-pei. Ngadekon a Abidan alo arai lokookeng a Gideon kesi nguna.

⁶⁶Ayeser lo arai lokookeng a Amichadai alo a ekitela a Dan ngesi alemuni ngadekon keng akolongit na a ngatomon.

⁶⁷Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak ka akimiet na a ngakipeyos a ngalemet.

⁶⁸Tolem nabo itubwa a egolit ni arai apotis keng ngagiramea 110, ilelebitae emitina.

⁶⁹Tolem nabo itaok, ka emesek, ta imesek nikile ni arai ekaru epei toliwor akipeyos na inomio,

⁷⁰ka ekoroe toliwor akipeyos a akisech,

⁷¹ta ngakipeyos a ekisil na eraakasi ngimongin ngiarei, ka ngimesekin ngikan, ka ngikora ngikan, ta ngimesekin lukiliok ngikan lu eraakasi ngikaru ngipei-pei. Ngadekon a Ayeser alo arai lokookeng a Amichadai kesi nguna.

⁷²Pagiel lo arai lokookeng a Okiran alo ekitela a Acher ngesi alemuni ngadekon keng akolongit na a a ngatomon ka apei.

⁷³Araakasi ngadekon keng atubwa nakwangat na arai apotis keng ngakiloi 1.5, ka ateger naachi nakwangat na arai apotis keng ngagiramea 800, itemitoe loger losek itemeenere. Elelebitae ngatubwae nguna daang ngakiria naajokak ka akimiet na akipeyos a ngalemet.

⁷⁴Tolem nabo itubwa a egolit ni erai apotis keng ngagiramea 110, ilelebitae emitina.

⁷⁵Tolem nabo itaok, ka emesek ta imesek nikile ni erai ekaru epei toliwor akipeyos na inomio,

⁷⁶ka ekoroe lo arai akipeyos a akisech,

⁷⁷ta ngakipeyos a ekisil na araakasi ngimongin ngiarei, ka ngimesekin ngikan, ka ngikora ngikan, ta ngimesekin lukiliok ngikan lu eraakasi ngikaru ngipei-pei. Ngadekon a Pagiel alo arai lokookeng a Okiran kesi nguna.

⁷⁸Aira lo arai lokookeng a Enan alo a ekitela a Naputal ngesi alemuni ngadekon keng akolongit na a ngatomon ka ngaarei.

⁷⁹Araakasi ngadekon keng atubwa nakwangat na arai apotis keng ngakiloi 1.5, ka ateger nakwangat na arai apotis keng ngagiramea 800, itemitoe a eger alosek itemeenere. Elelebitae ngatubwae nguna daang ngakiria naajokak ka akimiet na a ngakipeyos a ngalemet.

⁸⁰Tolem nabo itubwa a egolit ni arai apotis keng ngagiramea 110, ilelebitae emitina.

⁸¹Tolem nabo itaok, ka emesek, ta imesek ni erai ekaru epei toliwor akipeyos na inomio,

⁸²ka ekoroe lo arai akipeyos a akisech,

⁸³ta ngakipeyos a ekisil na araakasi ngimongin ngiarei, ka ngimesekin ngikan, ka ngikora ngikan ta ngimesekin lukiliok ngikan lu araakasi ngikaru ngipei-pei. Ngadekon a Aira alo arai lokookeng a Enan kesi nguna.

⁸⁴Ngadekon daang na etaleunere ekeno a ngakipeyos, alemunete ngikarikok lutomon ka ngiarei a Ngisirael, ngatubwae nakwangae ngatomon ka ngaarei, ka ngategerin naachik ngakwangae ngatomon ka ngaarei, ta ngitubwae lua egolit ngitomon ka ngiarei.

⁸⁵Arai apotis a ngatubwae anakwangae kadaang ka ngategerin nakwangae ngakiloi 27.6, itemitoe a eger alosek itemeenere.

⁸⁶Arai apotis a ngitubwae alu a egolit kadaang ilelebitae emitina, arai ngakiloi 1.32, itemitoe a eger alosek itemeenere.

⁸⁷Araakasi ngakipeyos na inomio ngimongin ngitomon ka ngiarei, ka ngimesekin ngitomon ka ngiarei, ka ngimesekin lukiliok ngitomon ka ngiarei lu araakasi ngikaru ngipei-pei, imorikina aapei ka ngakipeyos kech na a ngalemet. Araakasi ngakipeyos a akisech ngikora ngitomon ka ngiarei.

⁸⁸Araakasi ngakipeyos a ekisil ngimongin ngitomwon-arei ka nguomwon, ka ngimesekin ngitomwon-kapei, ka ngikora ngitomwon-kapei, ngimesekin lukiliok ngitomwon-kapei lu araakasi ngikaru ngipei-pei. Nguna kesi eraakasi ngadekon na alemunio na etaleunere ekeno a ngakipeyos.

⁸⁹Ani elomari Musa loeam a Akuj akiruor ka Ekapolon Akuj, abu ngesi kiira Ekapolon Akuj isuruori ngesi anapukenit a asaduku a achamunet, alokiding ngiborei luarei lua ngabeben.*g**