Read turkana Ekimar 8 Bible Online

Ekimar 8 - turkana bible

Ekimar 8

¹Tolimok Ekapolon Akuj Musa tama,

²“Tolimok Aron kona, ani iwaakini ngataae nakan-kaarei ni esipotor, ejoikinit isingoliari lowae lo alongaren tolot akicha kech inaa.”

³Abu Aron kiwapak nguna sodi kisingolia ngataae ngaren ni asipotor, loger losek adungokinitor Ekapolon Akuj Musa.

⁴ Asubunitae ni esipor ataa a egolit alo itiakunitae napei alowae alo alokidiama tanang lowae lo a ngalup, ikwaan ka ekitetemes losek edodikinit Ekapolon Akuj Musa.

⁵Tolimok Ekapolon Akuj Musa tama,

⁶“Kitegelia Ngilawi ani eyakasi Ngisirael luche sodi kitaleu kesi

⁷a eger kalo, towatak kesi ngakipi na italeunotor, sodi tolimok tabanya ngawat kech daang nabo kilotasi ngiworui kech. Italeunosi kesi.

⁸Ani erumor, tolemut kesi emong losorokit aapei ka ngakipeyos a ngadekon ne eraakasi ngakiria naajokak ka akimiet, sodi tolemut nabo emong losorokit eche toliwor akipeyos a akisech.

⁹Tochunak Ngisirael daang wapei sodi kitowo Ngilawi alongaren eam kang.

¹⁰Ani irikuni iyong Ngilawi ngaren Ekapolon Akuj, idokokinete Ngisirael ngakan kech nakies a Ngilawi.

¹¹Ani erumor kitaleu Aron Ngilawi toliworos akipeyos na iwakiwakio kalemikinito Ngisirael ayong sodi tosubeta kesi etich kang.

¹²Idokokinete Ngilawi ngakan kech nakies a ngimongin aluarei, sodi tolemunae epei toliwor akipeyos a akisech, toliwor loche akipeyos na inomio, sodi kitaleunere Ngilawi.

¹³“Kitaleu Ngilawi toliworos akipeyos na iwakiwakio anikang, sodi tolem Aron ka talokookeng toweikis Ngilawi.

¹⁴Kitegelia Ngilawi ani eyakasi Ngisirael luche aloger kangolo sodi toliworos ngikang.

¹⁵Ani kirumo iyong akitaleun ka akitegeliar Ngilawi, eliworosi kesi lu itemokino akisub etich aloeam.

¹⁶Alema ayong kesi toliworos ngikang, pena nados a ngide alusapa alu ekingaren a Ngisirael. Aliworosi kesi ngikang a ilope.

¹⁷Nakolong aarea ayong ngiuriuna lua ekingaren alo Misiri, abu ayong etaleu ngiuriuna a Ngisirael lua ekingaren toliworos ngikang, etaleu alotunga ka ngibaren aapei.

¹⁸Alem tokona ayong Ngilawi pena nados a ngiuriuna alu a ekingaren a Ngisirael.

¹⁹ Epoto ayong Ngilawi ainak Aron ka talokookeng toliworos ainakinet a Ngisirael. Esubete kesi etich a Ngisirael aloeam, sodi kiratakineta ngakiro naaronok nyeanyun ka Ngisirael epote diyete ewae lo italeunitoe.”

²⁰Apot Musa ka Aron, ta Ngisirael daang kitaleut Ngilawi loger losek adungokinitor Ekapolon Akuj Musa.

²¹Apot Ngilawi kitaleunos ka akilotar ngiworui kech. Abu Aron kitaleu kesi toliworos akipeyos na iwakiwakio ani Ekapolon Akuj, nabo tosubak etal lo a akitaleun.

²²Apot ngitunga tosubeta Ngilawi ngakiro daang loger lo kolong adungokinitor Ekapolon Akuj Musa. Sodi apot Ngilawi kisiakis akisub etich aloeam, eweikinito Aron ka talokookeng kesi.

²³Tolimok Ekapolon Akuj Musa tama,

²⁴“Ngilawi lu eraakasi ngikaru kech ngitomwon-arei ka ngikan, ka lu iporito ngikaru kech ngulu, esubete etich aloeam kang,

²⁵ani enangete ngikaru ngitomwon-kan, esakitae tojongoto akisub etich ngolo.

²⁶Nakaneni epedorete kesi akingarakin Ngilawi luche akisub etich aloeam, nakaneni nyesakitae kesi esubete etich make. Eger ngolo ngesi itiakanakinea iyong Ngilawi etich.”