Read turkana Ekimar 9 Bible Online

Ekimar 9 - turkana bible

Ekimar 9

¹Elap lo a ekingaren a ekaru alo a ngiarei alo kolong arotokinioto Ngisirael alo Misiri, abu Ekapolon Akuj kisuror Musa anariet anabe Sinai ebala,

²“Ejoikinit Ngisirael irichakinete akolongit a Adeparet.

³Atabong a akolongit ana a ngatomon ka ngoomwon a elap kalo, ngesi ejoikinit Ngisirael irichakineta Adeparet itemem ka ngitalio keng daang.”

⁴Sodi tolimok Musa ngitunga atamar kirichakis Adeparet.

⁵ Apot kesi tosubakis nguna akolongit na a ngatomon ka ngoomwon a elap alo a ekingaren, anariet a Sinai. Apot ngitunga tosuba ngakiro loger lokolong adungokinitor Ekapolon Akuj Musa.

⁶Ayakasi ngikiliok ngiche lupeetaleuno ani atapitotor akwaan a itwaan anikatoan. Peapedorete kesi akirichakin Adeparet akolongit ngina. Apot kesi toloto nia Musa ka Aron

⁷tolimokis tamasi, “Nyikitaleuno sua kainyo kitap akwaan a itwaan anikatoan, nakaneni kotere nyo pekichamunere sua kilemuni aapei ka Ngisirael luche ngakipeyos a Ekapolon Akuj?”

⁸Tatachak Musa kesi tama, “Kidarutu eira ngakiro na edunguni Ekapolon Akuj.”

⁹Tolimok Ekapolon Akuj Musa atamar

¹⁰tolimok Ngisirael tama, “Ani keyei itwaan nikus kori nalesea kus ni nyitaleuno ani atapea akwaan a itwaan anikatoan, kori kelosit alotoru na anikalonan, nakaneni tasaki ngesi akirichakin Adeparet,

¹¹ejoikinit ngesi irichakini adaunet a elap a epei, atabong a akolongit ana ngatomon ka ngoomwon, a elap alo a ngiarei. Ejoikinit ngesi enyami akolongit ngina ngamugati napadok ka ngikito luadwarak.

¹²Emam akimuj ngina na eperi kiwalak, kori emam akoit a ibarasit na ebelio. Kirichakisi akolongit a Adeparet kiwapa ngitalio keng daang.

¹³ Ani itwaan cha daang ni italeuno, tarai nabo nyelosit nikalonan, nakaneni towou akirichakin akolongit a Adeparet, nyeringa ngesi imarunitae atamar erai ipei a ngitunga a Ekapolon Akuj, kainyo abu ngesi nyeelemik Ekapolon Akuj ngakipeyos akolongit ngina. Eriamuni ngesi ngichan a akisech keng a ilope.

¹⁴“Ani keyei itwaan a akwap a ache ni irukito ka esi, tasaki akirichakin Adeparet, ejoikinit ngesi irichakini iwapit ngitalio a Adeparet daang. Etal ngolo esakitae itwaan daang iwapi tani kerai ilope a akwap kori ika akwap a ache.”

¹⁵Akolongit na adukokinere eam a Akuj, abu edou kimuk eam. Ani nakwaare, kikwaanikin edou ngolo ka akim.

¹⁶Tosubas loger ngolo akolongit daang, naparan kimuk edou ani nakwaare kikwaanikin edou ka akim,

¹⁷Nacha ikeunor edou, taramakis Ngisirael, ani nicha ewaar edou, toloma kesi neni.

¹⁸Arai na edungunio Ekapolon Akuj atamar taramakinae, taramakis Ngisirael, ani esaa daang lo emukitor edou eam, toloma kesi nadakar ngina.

¹⁹Ani imuki edou eam nikooyen, apot kesi kiwapa ngakiro a Ekapolon Akuj, nyeeramakis.

²⁰Ngirwa ngiche, emukit edou eam a ngirwa a ngidikidio. Ani kanguna kadaang, eboikinosi kesi kori aramakinete iwapito ngakiro na adunguni Ekapolon Akuj.

²¹Ngirwa Ngiche, emukeene edou eam napei ebong jik tanang nataparach, ani napei ikeunor, tonyout Ngisirael taramakis. Ani nacha ikeunor edou, taramakis kesi.

²²Ani kimuk edou eam a ngirwa a ngiarei kori a elap a epei kori a ekaru a epei, kori a ngirwa alukaalak, apot Ngisirael kiboikinos, nyeeramakis. Nakaneni ani ikeun, apot kesi taramakis.

²³Arai na edungunio Ekapolon Akuj atamar toloma wache, apot Ngisirael tosubakis loger ngolo. Ani na edungunio atamar taramakinae, tosubakis loger ngolo. Asubete kesi nguna daang iwapito ngakiro nakolong adunguni Ekapolon Akuj kisitoru nia Musa.