Read turkana Mika 2 Bible Online

Mika 2 - turkana bible

Mika 2

¹Oitiakoi! Abe etioko nginyas eanyunete ngitunga lu etukosi naaronok, lu itamete naaronok, nyiirete ngaju. Ani napei cha iwalarea, ani eanyunete erot, tosubakis nguna sek atukito.

²Na imueta kesi ngamanat, todemasi ngitunga. Na imueta ngakais, tolemasi. Emam itwaan kori iborosit a awi a itwaan ni idongi.

³Ebala bocha Ekapolon Akuj kona, “Ayoro esi, atukit ayong ayaun ngakiro naaronok nikus, na emam kona igakinete esi, nyeringa nabo esi inisasi kainyo ilomarete esi lochan.

⁴Na enangea akolongit ngina, kiramakinete esi ngitunga eeos lo kirasitotor, kimodete esi a eeos alo igorore ebalasi, ‘Kimunyar ngoni muny! Epoto Ekapolon Akuj akwap yok akoraki lukolong kirikete ngoni kirai ngirikon.’ ”

⁵Kotere ngakiro nguna, na enangea ngirwa lu ebuakinere ngitunga a Ekapolon Akuj akwap, engopi ikakorakinan ngalesea kus akwap.

⁶Ebalasi ngitunga ayong, “Tojongo adwaranakin sua. Tojongo adwaranakin sua ngakiro nguna daang. Nyikisurumi Akuj sua ngileech.

⁷Ikokinio ngakiro nu elimunio ani a Ngisirael ai? Ajongo palem Ekapolon Akuj akiteun ngakiro a? Nikeng dir eponitotor nugu a?” Tolim Ekapolon Akuj tama, “Nyesuruoreene sek ayong lu etenooko niajokon a?

⁸“Nakaneni inyoikis esi ngitunga kang[1] loger a ngimoe. Na ebongunioto ngitunga alojie itamito atamar emam ngache anawi, ikwa idarito esi kaneni abutor ngikotio kech.

⁹Ani ngaberu a ngitunga kang, itwarakis esi anawiyei kech ana eminasi. Ani ngide kech, idemasi esi apiaro kang jik.

¹⁰Tonyoutu toloto, emam nege ni eringa eyuunere. Kotere nginyas a ngasechesea kus, enyasun nege lokojokon.

¹¹“Ani kebu itwaan ni edai apula ka alioko tama, ‘Adwari ayong atamar ianyunete esi ajako a emuna ka epurot.’ Ekadwaran lo ikoni ngolo ngesi esakete ngitunga lugu!

¹²“Kachunakini ayong esi daang wapei, ee robo, esi Ngisirael lu eringa idongito. Kachunakini ayong esi loger a ngamesekin ana echunakinitae nanok. Ilelebun ngitunga nakwap kus loger a achokor ana ileleba ngamesekin.”

¹³Engauni Akuj kesi kipud anaenanot. Ebwangunosi kesi alore topudut alodorin a ere. Ekapolon Akuj na erai Akuj kech, ingarenikini toriko kesi.