Read turkana Mika 4 Bible Online

Mika 4 - turkana bible

Mika 4

¹Ngirwa lu isidiunosi, emoru lo edukokinitae akai a Akuj, eliwor emoru lo ewoi akidwang luche. Ilengi ngimukur daang. Eropuunete ngibukui daang moru ngolo.

² Epote ngibukui lukaalak tamasi, “Potu apana moru a Ekapolon Akuj,[2] kapana kai a Akuj a Isirael. Kitatamea ngesi ngoni eboyor keng, ewapeta ngirotin keng. Kainyo ngakitatamet a Ekapolon Akuj, eponito alo Yerusalem. Eponito ngakiro keng alo Sion.”

³Etubi ngesi ngakiro a ngibukui alukaalak. Etiakuni ngesi ngakiro a ngakwapea anaapolok, ana eapiyete ka na eloka. Itiakete kesi ngilengea kech tarata ngirokonin. Kitiaka ngakwaaras kech tarata ngilengea luiriet ngikito. Emam ngibukui elemunete ngakwaaras sodi tangaasi ejie. Nyeringa nabo echunio ngajorei.

⁴ Iboikin itwaan daang akaalimon, kwap ngimusabib keng ka ngimeyana, emam ibore nabo iteriangakini kesi. Alimu Akuj Namerikanyer nguna.

⁵Kainyo ngibukui daang iwapito ngakiro a ngakujo kech. Nakaneni kiwapi ngoni jik ngakiro a Ekapolon Akuj ana erai Akuj yok.

⁶Ebala Ekapolon Akuj kona, “Ngirwa lu isidiunosi, achununi ayong ngikangwalak, achununi lukolong etwarakini, achununi lukolong awani ayong.

⁷Ani lu engwalito, eliworosi kesi idongito, Ani ngulu etwarakinio, eliworosi ebukut lo eyenikinitae. Apolokini ayong kesi alomoru a Sion, napei alorwa kangulu jik.”

⁸Ani bo iyong Yerusalem, lo irai aita na iteo Akuj ngitunga keng loger a ekeyokon. Kibongokini iyong apolou anakwap ana kolong arai akon.

⁹Nyo bo igoror iyong iremar? Emam iyong ekapolon a? Atoana ekesuruoron kon a, iriabar iyong loger a aberu ana eriaba esaki akidoun a?

¹⁰Kasiosi ngitunga a Yerusalem, toriabakinos toliata, loger a ngaberu ana eriabasi akidoun, kainyo inyounete tokona alore toloto toloma naroatin. Iloose esi Babilon. Nakaneni kiyuuni esi Ekapolon Akuj kaina, anakwap a ngimoe kus.

¹¹Achunakin ngibukui lukaalak akitijikin esi, ebalasi, “Ejoikinit Yerusalem inyasunio, kingolikini ngoni a ngakonyen yok!”

¹²Nakaneni nyeyenete ngibukui ngulu ngitamen a Ekapolon Akuj. Nyiteete atamar kichunun kesi loger a ngakies a ngimomwa ana echunio lopem tadaae.

¹³Ebala Ekapolon Akuj, “Ngitunga a Yerusalem, tonyoutu tadaa ngimoe kus! Ketogogongi ayong esi loger a emong alo erai ngaamwar keng ngakwangae, tarai ngakejen ngasua nanyangayek. Ipudaarete esi ngibukui lukaalak, sodi kiinut ayong ebari lokolong angatarete kesi. Toliwor ebari kech ekang ana arai Ekapolon a akwap kadaang.”