Read turkana Mika 5 Bible Online

Mika 5 - turkana bible

Mika 5

¹Ngitunga a Yerusalem, tochunakisi ngajorei kus! Kiriama ngoni ngimoe! Etijikis kesi ekarikon a Ngisirael.

² Ebala Ekapolon Akuj kona, “Betleem lo a Epirasa, idit iyong alorerea a Yuda. Tarai nikon aseunea ayong ekapolon a Ngisirael, lokolong araakasi taapaakeng ngikapolok napei kolong kanuan.”

³Ejali Ekapolon Akuj ngitunga keng tanang aberu na eriaba idouni ikoku nisapat. Sodi ngitunga a ekapolon ka daang lu eraakasi ngirikon, ebuario kiruko ka ngitunga kech.

⁴Erupuni ngesi epolokinit ngitunga keng a agogongu ana eanyuni ani a Ekapolon Akuj, ana erai Akuj alope.

⁵Eyauni ngesi ekisil. Naitijikinioto ngitunga a Asiria ngitunga yok, kikekis ngalaarin tolomut nawiyei, kimeari ngoni ngikarikok yok lukajwok[3] kitijikis kesi.

⁶ Ebwangete ngajorei kech ngitunga a Asiria. Ee robo, ebwangete akwap a Nimurod a ejie. Kiyuunete kesi[4] ngoni ani a ngitunga a Asiria nakitijikinioto ngitunga a Asiria ngoni kipudata akwap yok.

⁷Ani Ngisirael lupiyayek, ikokinete ngakop naketililimok, na epetakini Akuj lobukui lukaalak. Ikokinete ngakop na eyakasi lonyia. Igienokinosi kesi Akuj, meere itwaan.

⁸Epete Ngisirael lupiyayek lobukui ka ngitela lukaalak, kikokis engatuny alokiding ngitieng a amoni. Ikokinete itaok a engatuny alokiding ngisipaan a ngamesekin. Elomuni ngesi namesekin toporokin, ani erumor tonyilinyilia tongop kona edemunio.

⁹Ebwangete Ngisirael ngimoe kech, tomunyasi ngimoe kech daang.

¹⁰Ebala Ekapolon Akuj kona, “Ngirwa ngulu, etwarakini ayong ngangolei kus na ejie. Enyasu ngaurukukui kus na irito ngangolei.

¹¹Enyasuni ayong ngirerea a akwap kus, atouko ngawasea kus nakaagongok daang.

¹²Enyasuni ngiborei lu isubatar esi, kemiek esi emam ngikadwarak.

¹³Enyasuni ayong ngakujo kus nasubuna. Enyasuni tani ngamoru a ngapirio kech anakitaleuno. Nyeringa nabo esi ilipete ngiboro lu isubete esi a ngakan kus.

¹⁴Adituni ayong anakwap kus ngapirio a Achera na erai akuj kus nasubuna. Enyasuni ngirerea kus.

¹⁵Angoi ayong noi erira ngibukui daang lu awounete akiwap ngakiro kang.”