Read turkana Naum 3 Bible Online

Naum 3 - turkana bible

Naum 3

¹Oitiakoi! Abe etioko nginyas eanyuni ere lokaaran! Engalas ka ngiboro lungatara ileleba! Nyesaluni angatanar ngiboro!

²Kiira erue a ngalita, ngakilelei irimete, kuturkutur a ngangolei, aporopor a ngaurukukui!

³Aneteunosi ngikameak ngangolei, ewaliwali ekileng, ipeka akwara! Aar ngajorei, atukokin ngawat, nyimarun ngawat nakatoak, ilegeete ngawat nakatoak ngitunga!

⁴Esubasi nguna daang kotere amalaat na idwangit nache daang. Amalaat nabe Ninewi, ikwaan ka aberu na ibus tarai akasuban. Aloki ngesi ngibukui a emalaanu keng, kingala ngitunga a asubanu keng.

⁵Ebala Akuj Namerikanyer kona, “Ninewi, kanyoik ayong iyong! Kabutori ngiworui kidong imuner, kisemoto ngibukui amunerer kon, kisemoto ngapolosio ngileech kon.

⁶Kemasakini iyong asakatan, katosubea ngakiro na ngimeny toliwor iyong kisemoo.

⁷Ngitunga daang lucha kingolikinete iyong, toriangakinos kikutukutoosi ebalasi, ‘Wae, idaun cha iyong Ninewi a! Ngae kikalounio iyong? Aliwae esakario ngikesililingak kon?’ ”

⁸Ninewi, ijok iyong akidwang Tebes a? Ere lo edukitoe lokwaas a angolol a Nili. Ere lo iriamito ngakipi. Anam iratakinit ngimoe anikeng, ngakipi eraakasi ngawasea keng!

⁹Apolokinit ngesi Kuch*g** ka Misiri, amam esal a apolou keng. Put ka Libia ebakito ka ngesi.

¹⁰Tarai arikio ngitunga a Tebes tarata ngirikon. Edichio ngide kech totoaka anakiluguchaet a ngirotin kadaang. Ngikiliok keng lu erimae torikoroe eenitae a ngiriko, tokoranakinos ngitunga lu arikete.

¹¹Ninewi, ikokini iyong dang itwaan ni irakarit epurot, kibileri iyong tasak amatar lomoe kon.

¹²Ngawasea kon nakaagongok daang, ikokinete ngimeyana lu eraito ngameyana, ani iukuukokinio tararakin nakituk a ekanyaman!

¹³Kingolik mono iyong ngasigerea kon, ngaberu cha ngaberu alokiding kus! Engaamete ngidorin a akwap kon, alongaren ngimoe kon, amunya akim ngasua na iriwokinitae.

¹⁴Tookutu ngakipi kidaruneta kiriamio, kitogogongo ngawasea kus, kichiaka echoto kinoma ematapar, tolemutu ngakito nasubet ematapar!

¹⁵Neni ngesi kimunyakini esi akim, kirikari esi akwara. Kimunyario esi loger a amelu ana emunyari emaase. Toureas loger a emaase, ee robo, talalaketa loger a lodete!

¹⁶Italalaate esi ngimuchurus kus, kidwanga tani ngikanyer a adis! Angopiasi tokona loger a ngimases alu epetarete ngabeben toporosi.

¹⁷Ikote ngikarikok kus asepich a emaase na ilulo anawasea akolongit na akatorot. Ani ipiripiruuni akolong, toporosi. Emam itwaan eyeni ni alot!

¹⁸Ee ekapolon a Asiria, ejotoote ngikeyokok kon, ani ngikarikok kon, ajotoorosi jik. Apetakin ngitunga kon lomoru, angop itwaan echunakini kesi.

¹⁹Emam kona kitedekuunio iyong, emam ngajemei kon kona itedekio. Daang lu iirarete ngakiro a nginyas kon, tarama ngakan elakara. Kainyo eyei dir itwaan tani ipei ni abu tobuchun anamoitanut kon ana nyedaun a?