Read turkana Abakuk 2 Bible Online

Abakuk 2 - turkana bible

Abakuk 2

¹Aliwor ayong eketeon, adokari ayong lopem lo iteere edaru ngakiro nakalimokini Ekapolon Akuj, ka ngakiro na etachuni ngesi kotere eburas kang.

²Katatachak ayong Ekapolon Akuj tama, “Kigir ngakiro nakedodikini ayong iyong nakitab ilereete kisomaunere atipei.

³ Eringa akisingolikinet idarit esaa keng, ikirikiruna tosubakin, nyeliwor alioko. Ani pekedolu atipei, kidaru. Esubakin dir, nyetinenikini.

⁴Karika a, itwaan cha daang ni nyetenoono, nyeyari, Ani ni etenoono, eyari kotere anupit keng.”

⁵Ingalana ebari,[1] nyerubete ngitunga lukenisak. Epol ebele kech ikwaan ka ni elomete ngikatoak, nyimwokeenete loger a akitu. Echunete kesi ngibukui daang tarata ngikech, kitiliwosi ngitunga ngikech a ngikulepek.

⁶Nyedikino ngitunga lurikon ngulu ekianatar kesi a? Sodi tarata ebalasi, “Oitiakoi! Abe etioko nginyas ianyunete esi, ngitunga lu ichunete ngiboro lu nyerai ngikus! Ibarakinete esi namichae tanang ori?”

⁷Akolongit apei, kingoikinete esi ngitunga lu kimichaate esi, epote kitamaranikis esi, kitodemasi ngiboro.

⁸Kona ingatareta esi ngiboro a ngibukui alukaalak, engatarete ngitunga daang lupiyayek ngiboro kus, kotere ngitunga lu iar esi, ka amoitanut na isubeta esi akwap ka ngirerea ka ngitunga daang lu elomito neni.

⁹Oitiakoi! Abe etioko nginyas ianyuni iyong, itwaan ni itabari awi kon a eger aloaronon, sodi kikek akai kidiama nyeedolioto naaronok!

¹⁰Irek iyong ngakiro na eyaunete ngileech nawi kon. Ilem nginyas kon a ilope ani imunyarea ngibukui lukaalak. Ijal iyong akiyar kon.

¹¹Isikalou iyong tani ngamoru a ngawasea, kikamasi ngakito na iriwokinitae nakais.

¹²Oitiakoi! Abe etioko nginyas ianyuni iyong, itwaan ni idukokini ere a ngaakot, sodi kitowo a aronis!

¹³Kingolik a, edaikin etich a ngibukui nakim, ichidarito kesi ngakiinyir pas. Nia Akuj Namerikanyer eponitotor nguna.

¹⁴ Ilelebun akwap ngitunga lu eyenete ekipur a Ekapolon Akuj, loger lo ilelebakatar ngakipi nanam.

¹⁵Oitiakoi! Abe etioko nginyas ianyuni iyong, itwaan ni itamasi ngikidunyet anyunyura kon, kisiraka kesi loger epurot, sodi kingolikinea kesi emuner!

¹⁶Kidakakinosi iyong ngileech akidwang arimatoi, imasi iyong kitereter! Kitamasi iyong Ekapolon Akuj eriras kon, sodi tarapa ngileech arima kon!

¹⁷Amoitanut nakolong isubea iyong Lebanon, kibongokini tokona iyong. Imunyari kolong iyong ngitieng, kitubulete tokona ngitieng iyong, kotere ngaakot a ngitunga ka amoitanut nakolong isubea iyong akwap ka daang lu elomito neni.

¹⁸Nyo eanyunio anakuj anasubuna? Ana erai itwaan asubuni, asuat na itiakitae, eketataman a alioko! Nyo igieno ekasubunan a akuj kangina tarai asubu ngesi akuj na nyejaki tani akituk?

¹⁹Oitiakoi! Abe etioko nginyas ianyuni iyong, itwaan ni isuruori akitoe ibala, “Tokienyu!” Tama niti ilimokini amoru na imuleleara “Tonyou!” Eyakasi ngakiro kidodikini akuj nasubuna a? Kingolik a, eburuchiarit egolit ka akwangat, emam akianget alotooma keng.

²⁰Eyei Ekapolon Akuj kai keng na italeuno, kimiek ngitunga daang a akwap kililinga chek alongaren keng.