Read turkana Abakuk 3 Bible Online

Abakuk 3 - turkana bible

Abakuk 3

¹Akilip a ekadwaran Abakuk naga.

²Ee Ekapolon Akuj, eira ayong ngakiro na isub iyong, kabul noi. Tobongok nabo ngitichisio ngulu ngikaru lu kiyarea sua lugu, kisileereu alokaru alukosi kalugu, kitamu akisienut tani ananyunyura.

³Ebunit Akuj alo Edom. Ebunit Akuj na italeuno alomoru a Paran. Imukit akibuseanu keng adis, ileleba ekipur keng nakwap.

⁴Ikwaan akwangis keng ka akimilea imileaununi akan keng akicha, neni idaitere agogongu keng.

⁵Eyei edeke loaronon ngaren keng, totupite akitu anaabor.

⁶Na ewaar ngesi, torikirikok akwap, ani ekienyuuni, tamaranikis ngibukui, sodi kielar ngimoru lukajik, ngimukur lukajik, kiiloros nalup. Ikote ngirotin keng nikolong ngorot.

⁷Engolik ayong ngawiyei a Kuchan eriabasi, engolik ngieman Midian emaranete.

⁸Ee Ekapolon Akuj, ngangololin kolong inyunyurikina iyong a? Ngangololin kolong ingoikinit iyong a? Nganamea kolong kitelemarito iyong a? Idokit iyong ngidowon, kitiliwo ekuwam loapolon aurukuk kon na idwangea iyong kon.

⁹Ilemuni iyong akau kon todupak ngimalea. Tapak akwap a ngangololin.

¹⁰Nakingolikineta iyong ngimoru, torikirikokis. Tobukun ngakipi anadis, tokurupupuut ngakipi na alokwap, tonyout ngitoroi lukoapolok.

¹¹Kitiirakinos akolong ka elap ani eyakasi, kotere akimilea a ngimalea kon alu eporito, ka akipeka a akwara kon ana ekwaikwai.

¹²Itoruni iyong kiding akwap inyunyura, kipuda ngibukui a angoit.

¹³Ipuduni iyong bu ayuun ngitunga kon. Bu ayuun ekapolon a Yuda loseuna. Kipudaa iyong ekarikon aluaronok, napei alomosiring tanang nakejen.

¹⁴Igumi iyong a ngimalea kon ekarikon a ngasigerea keng, lokolong abuni apetar sua ikoni ekuwam lo ipiripiri, Echuruno loger alu ichiakiarito ngikebootok epali.

¹⁵Ipudae iyong anam a ngangolei kon, kitor lotoroi lu aneteuna.

¹⁶Na eirarea ayong nguna, atamaranik, tamaranikis ngipon kang kotere aemit, kerum ayong emudekeke, tolilimiyosi ngakejen kang. Eboikin ayong ekiilingat edaru akolongit a ngichan na iriraa Akuj ngitunga lu kitijiete ngoni.

¹⁷Tani bo kemam ngameyana ekokito, kori kemam ageor eyei lomusabib, tani bo kedakara ageor a akimiet, tani bo pekekokito ngamanat akimuj, tani bo kemunyara ngamesekin daang, tani bo kibooyete nganokin a ngaatuk kongina,

¹⁸alakar ayong ani a Ekapolon Akuj, epuruu Akuj nakayuuni ayong.

¹⁹ Ekapolon Akuj, na erai Ekapolon ngesi erai ngikilinga kang. Itipiranit ngakejen kang loger a agete, ketodoki ngesi ayong ngimoru.