Read turkana Sepania 1 Bible Online

Sepania 1 - turkana bible

Sepania 1

¹ Akiroit a Ekapolon Akuj naga, na alimokinio Sepania lokookeng a Kuchi, alo arai lokookeng a Gedalia, alo arai lokookeng a Amaria, alo arai lokookeng a Esekia. Ngirwa ngulu, Yosia lokookeng a Amon ngesi arai ekapolon a Yuda.

²Ebala Ekapolon Akuj kona, “Amunyari ayong ibore daang anakwap,

³amunyari ngitunga, ka ngitieng, ka ngikieny ta ngikolea. Edwangi ayong luaronok. Ekisari ngitunga anakwap. Ayong Ekapolon Akuj alimu nguna.

⁴“Erirae ayong ngitunga a Yerusalem ka lua Yuda daang a atwaret. Ekisari anakwap ibore nipiya a Baal, ka ngirora a ngimurok alu esubete etich a Baal.

⁵Amunyari daang lu edokete kidiama ngakais akilip akolong, ka elap ta ngikanyer. Amunyari daang lu ikongete ebalasi kaminasi ayong, tarai ikongete a ekiro a Molek.

⁶Amunyari daang lu abongosi akamaluwot, lu nyeringa kewapito ayong, daang lu nyakasakuunete ayong kori nyekengiseenete ngakiro.”

⁷Kililinga robo alongaren Ekapolon lo erai Ekapolon Akuj! Kainyo anang akolongit na etubio ngesi ngakiro. Esaki Ekapolon Akuj akitiliwor ngitunga keng ngakipeyos, anyarau ngimoe akirem Yuda.

⁸Ebala Ekapolon Akuj kona, “Akolongit na a akipeyos ngina, erirae ngikaweikinak ka talokookeng a ekapolon, ta daang lu esubete ngitalio lugelayek.

⁹Akolongit ngina erirae ayong daang lu ilipito loger a ngitunga alu nyeyenete Akuj. Erirae tani lu ilelebete ngakais a ngikapolok ngiboro alu a erukoonu ka engalas.”

¹⁰Ebala Ekapolon Akuj kona, “Akolongit ngina, iirario akigoro alokidor a Ekolia, kiirarae elii alowae alokitetet a ere, kiirarae agiro ekokoriuni alomukur.

¹¹Kikaloutu, esi lu ilomito kwap ere, kainyo etoakete ngimuchurus daang, emunyarosi daang lu itemete ngaropiyae.

¹²“Esaa ngolo erim ayong Yerusalem a akinwaket, erira ngulu ibelobelosi anajako niti ebalasi, ‘Emam ibore esubakini Ekapolon Akuj, nyesubakini naajokak, nyesubakini naaronok.’

¹³Engatario ebari kech kinyasunae ngakais kech. Edukete ngakais nakaneni nyelomete, itaate kesi ngamusabib nakaneni nyemaase emuna kech.”

¹⁴Aapuu akolongit naapolon a Ekapolon Akuj, aapuu ikirikiruna atipei. Edwarer akolongit ngina, itoowanikini tani ngikiliok lukajwok.

¹⁵Eliwor akolongit ngina aka anyunyura, eliwor aka ngichan ka ariaba, eliwor aka nginyas ka amunyaro, eliwor aka aribu kinyikok, eliwor aka ngidowon ka akirionut,

¹⁶akolongit na ekutakinere aburuch taramae elii a ejie, kitijikinoe ngirerea lua ngawasea anakaagongok ka ngipemin lukooyak.

¹⁷Ebala Ekapolon Akuj kona, “Ayauni ayong ngakiro naaronok lotunga, kitwapatwapa kesi loger a ngimuduk. Kainyo kasechakis kesi ayong, ebukor ngaakot kech loger a ngakipi, tobosa ngawat kech loger a ngachin.”

¹⁸Akolongit na anyunyura a Ekapolon Akuj ngina, nyeyuunete kesi tani ngakwangae ka egolit kech. Emunyari Ekapolon Akuj akwap daang a anyunyura keng ana ikwaan ka akim. Atipei jik, etubori ngesi akiyar a itwaan kadaang ani eyei nakwap.