Read turkana Sepania 2 Bible Online

Sepania 2 - turkana bible

Sepania 2

¹Etige, ebukut lo nyikitimete ngileech! Tochunakinos wapei toriangakinos,

²eringa esi nyekutara loger a ngatunyeny ana ekutari ekuwam, eringa angoit nakamoitanan a Ekapolon Akuj nyedoluno nikus, eringa akolongit a anyunyura a Ekapolon Akuj, nyedoluno nikus.

³Tasaka Ekapolon Akuj, esi daang lu itiditeuna anakwap, lu iwapito ngakiro na edunguni ngesi. Tosuba ngakiro na eteniyete, kitiditeunos alongaren Ekapolon Akuj. Tokona ngon ipuunosi aloriras, akolongit na anyunyura a Ekapolon Akuj.

⁴ Emam itwaan idongi lore a Gasa, eliwor Achikelon alaireng. Iritario ngitunga a Achidod lotingilan, kiritarae lua Ekiron alore kech.

⁵Oitiakoi! Abe etioko nginyas ianyunete esi Ngipilisti, esi ngitunga lu ilomito lokwaas a anam. Atubu Ekapolon Akuj akiroit anikus. Kimunyari ngesi esi nyiidong tani ipei.

⁶Ee ekwaas a anam, iliwor iyong achokor, todukoe ngakais a ngikeyokok ka nganokin a ngamesekin.

⁷Ngitunga a Yuda lupiyayek kesi elomete lokwaas a anam, kiyoko ngibaren kech neni, sodi topero nakais na eyakasi Achikelon. Kainyo Ekapolon Akuj na erai Akuj kech, itamuni kesi tobuak najako kech.

⁸ Ebala Akuj Namerikanyer kona, “Eira ayong eger lo erasitotor Ngimoab ngitunga kang, ka ekiyeny a Ngiamon, erasito kesi ngitunga kang, kiwojos atamar kidemari akwap kech.

⁹Tokona bocha, loger araakar ayong Akuj Namerikanyer na ayari, na arai Akuj a Isirael, ikwaanikin Moab ka Sodom, kikwaanikin Amon ka Gomora. Eliwor akwap ngapanya a edoot kinyasun torup edoan awadaang. Ngitunga kang lupiyayek, engatarete ngiboro kech.”

¹⁰Nguna kesi eliworosi ebachit kech kotere ekinis kech, kainyo akianatar kesi kiwoganakis ngitunga a Akuj Namerikanyer.

¹¹Emoitanikini Ekapolon Akuj kesi, kitiliwo ngakujo daang a akwap pas. Eriedikokinete ngibukui daang ngesi kilipa anakwapea kech.

¹² Ee ngitunga a Kuch,*g** kimunyario esi daang a akwara kang.

¹³ Emunyari Ekapolon Akuj Asiria Itiliwori Ninewi alaireng, akwap nakoonon na erai ariet.

¹⁴Neni eurienikinosi ngisipaan a ngibaren ka ngitieng a moding. Elomete ngataruk ka tanapupu naitae a ngapirio. Erukinete tatula alopidinga, torukis ngikuruka alodorin, kainyo achaoror ngakais kech na ngakito a ngichekereng.

¹⁵Ere loti kolong ajakaanit logo, loti kolong ebooyi akaalimon ebala, “Ayong bon, emam eche.” Nyelo aliwor alaireng, aurienet a ngitieng! Itwaan cha daang ni inutuni, toriangakin kimungumungak akou.