Read turkana Sepania 3 Bible Online

Sepania 3 - turkana bible

Sepania 3

¹Oitiakoi! Abe etioko nginyas eanyuni Yerusalem! Ere lokechanan kinyasuna, ere lo ichiekiarit ngitunga keng.

²Emam akiroit iirari, nyechamuni akikilakino. Nyigieno ngesi Ekapolon Akuj, nyirudar nia Akuj keng.

³Ikote ngikarikok keng ngingatunyo lu irurumaate, ngikatubok ngakiro keng ikote ngipeei lu enyamit akoro lu nyisiwalakinete akoit.

⁴Eroko ngikadwarak keng nyekachito ngakiro, emodeaka. Enyasut ngimurok ibore ni italeuno, asecha kesi etal.

⁵Ekapolon Akuj na eyei lore ngolo, etenoono, nyesubi naaronok. Ataparach daang, esubi nguna eriyan nyichwangakini jik. Nakaneni ngitunga lu nyetenooko, nyitimete ngileech.

⁶Ebala Ekapolon Akuj kona, “Amunya ayong ngibukui. Enyasu ngirerea kech. Etiliwo ngawasea kech ka ngipemin asakatan. Aliworosi ngirerea kech alaireng, emam itwaan eringa elosi alorotin.

⁷Atama ayong, ‘Kaemete kesi ayong dir, echamunete ngitunga kang akikilakino, sodi nyiinyasunere akwap kech.’ Tongero neni noi toroketa, tosuba naaronok loger lopalem.”

⁸Ebala Ekapolon Akuj kona, “Tokona bocha, kidarunae ayong. Akolongit na anyounio atolimo. Kainyo atiaku ayong achunakin ngibukui, atochunak ngapolosio, sodi atobukok kesi anyunyura kang, atotikok apotis a angoit kang daang. Inyasunio akwap daang a anyunyura kang ana ikoni akim.

⁹“Ee robo, ngirwa ngulu, elochi ayong ekiruor a ngibukui tojoker, sodi katanyarata kesi ayong, tosuba etich kang iwapito ngakiro kang.

¹⁰Ngitunga kang lu epetara, lu kelipito ayong epote tani a ekwakaye ngangololin a Kuch,*g** kainut ayong ngakipeyos.

¹¹“Akolongit ngina, nyikirumete esi ngileech ani kolong kingerioto ayong. Kainyo alemari ayong alokiding kus lukenisak ka lu iwogasi. Nyiiliworotor esi nabo lu iwojosi alomoru kang alo italeuno.[1]

¹²Kiruki ayong ka esi lu ipalaaka kitiditeuna. Ianyunete esi ni iyuunotor alokiro a Ekapolon Akuj.

¹³ Ngulu idongete Isirael, nyesubete naaronok nabo nyiruorosi alioko kori nyitoruni alioko nakituk kech. Edakasi kesi topero akaalimon, emam itwaan itoemi kesi.”

¹⁴Ee Isirael, kimaritetek, Ee Isirael, kirema! Ee Yerusalem, talakar kipurok a etau kon kadaang!

¹⁵Alema Ekapolon Akuj eriras kon, achakaki ngimoe kon kwap. Ekapolon Akuj na erai ekapolon a Isirael, irukito ka iyong, nyeringa nabo iyong iemi naaronok.

¹⁶Akolongit ngina, elimokinio Yerusalem kona, “Ee ere a Yerusalem, nyiem! Wara ngakan kon nyiirum emudekeke!

¹⁷Irukito iyong ka Ekapolon Akuj na erai Akuj kon, erai ngesi akajwon na idwangea iyong ngimoe kon. Elakar ngesi kotere iyong, kitikitetenuni[2] ngesi iyong a amina keng. Eeokini ngesi imaritete kotere iyong,

¹⁸loger a akolongit ana a esukukuu.” Ebala Ekapolon Akuj kona, “Etongopia ayong akolongit na ngichan, sodi nyikitingeta iyong ngileech.

¹⁹Ngirwa ngulu, erirae ayong ngitunga daang lu kichiekiarito iyong. Ayuuni lu engwalito daang, atobuu ngirikon nawi. Elochi ngileech kech toliwor ekipur, ipuruunete ngitunga daang anakwap kesi.

²⁰Ngirwa ngulu, kabuuni esi nawi, kachununi ayong esi wapei. Ketiliwori esi lu kiyenikinitae kipuruun alotunga kadaang anakwap. Ketajakaani esi nabo.” Ekapolon Akuj alimu nguna.