Read turkana Agai 2 Bible Online

Agai 2 - turkana bible

Agai 2

¹Akolongit na ngatomwon-arei ka apei a elap alo a ngikan-kaarei a ekaru alopei kangolo, abu Ekapolon Akuj kiruor nabo kisitoru akiroit keng nia ekadwaran Agai.

²Tolimok Akuj Agai atamar kisuruor Serubabel lo arai ekaweikinan a Yuda, ka emuron loapolon a Akuj Yochua, ta ngitunga daang lupiyayek tolimok kesi kona,

³“Akai a Akuj nakolong a ekingaren a, ngae anikus eringa itamunit akibuseanu nakolong keng? Ingolikinito tokona esi atamar ikoni ai? Ikwa nyesibit tokona anikus ibore pasit a?

⁴Tani kikoni neni, ejoikinit iyong Serubabel ititinyer. Iyong Yochua dang, totitinyer. Totitinyeketo esi ngitunga daang a akwap. Tosuba etich kainyo kirukit ayong Akuj Namerikanyer ka esi.

⁵ Nakolong ipudunioto esi alo Misiri, abu ayong kechikichik esi atamar kiruki ka esi jiik. Eringa ayong kirukit ka esi, warasi nyieam.”

⁶Ebala Akuj Namerikanyer kona, “Eringa cha wadio ani erumor etamaranik adis ka akwap, anam ka akwap nikoonon.

⁷Etamaranikini ngibukui daang, yaunae ebari kech daang nege, sodi esubus ayong akai naga.

⁸Erai akwangat ka egolit daang anakwap ekang.

⁹Eliwor akai a Akuj nakitetet na ibus noi akidwang nakolong a ekingaren. Neni ngesi etajakaanea ayong ngitunga kang kiboikinos nikaalimon. Ayong Akuj Namerikanyer ngesi alimu nguna.”

¹⁰Akolongit na ngatomwon-arei ka ngoomwon a elap alo a ngikan-koomwon a ekaru alo a ngiarei alo araakar Dario ekapolon a Persia, tolimok Ekapolon Akuj Namerikanyer ekadwaran Agai akiroit naga.

¹¹Tolimok kona, “Tolimok ngimurok totiakut akiroit naga.

¹² Ekoe, kelemu mono itwaan akiring na italeunitoe kilukak loworu keng, ikwa ta ketap eworu ngolo amugati, kori atap, kori emuna, kori akimiet, kori akimuj cha nache daang, esibit esi eliwor akimuj na etapio ngina na italeunitoe a?” Tatachut ngimurok tamasi, “Mam jik.”

¹³Kingit Agai kesi nabo tama, “Ani bo keliwor itwaan ngini ni nyitaleuno ani atapea ekatoan, ani erumor tatap apei a ngamuja kanguna. Eliwor akimuj ngina dang na nyitaleuno a?” Tatachut ngimurok tamasi, “Ee.”

¹⁴Sodi tatachak Agai kesi tama, “Ebala Ekapolon Akuj ikokinete neni ngitunga a akwap kana ka etich daang a ngakan kech. Ngakipeyos na ipeyeete kesi alokenoi daang, nyitaleuno.”

¹⁵Ebala Ekapolon Akuj, “Kitama lokojokon ngakiro napei tokona jik esubakinosi. Ani eringa amoru nyidokokino namoru nache alokai a Akuj,

¹⁶ekoni eboyor kus ai? Iloose esi natukiet a epeipe isakete ariamun ngakiloi ngamiae ngaarei, nakaneni toriamut amiat apei. Toloto akiwoun ngalitae amiat apei anichiet emuna, nakaneni kiwout ngalitae ngatomwon-omwon.

¹⁷Abu ayong kataram esi a eron a akoro, ka eloch ta ngamoru a akiru, enyasu ibore daang nikolong itakinito esi. Ani ikoni neni dang, ipot esi towout abongun nikang.

¹⁸Erai tokona akolongit naga na ngatomwon-arei ka ngoomwon, elap lo a ngikan-koomwon, akolongit na arumorere akiduk ngapirio na itoweito akai a Akuj. Kidarutu tokona kingolikis ngakiro na esubakinosi napei tokona jik.

¹⁹Tani tokona kemam ngikinyam idongito lokerui, tamam ngamanat a ngimusabib, ka ngimeyana, ka ngalam ta ngikito a akimiet lu ekokito, kapiari ayong esi napei tokona jik.”

²⁰Abu Ekapolon Akuj kisuruor Agai na a ngaarei akolongit na ngatomwon-arei ka ngoomwon a elap kangolo, tama,

²¹“Tolimok Serubabel ekaweikinan a Yuda atamar edikino ayong etamaranikini adis ka akwap,

²²sodi etukumiyo ngikicholongo a ngapolosio, ka akinyasun ngikilinga a ngapolosio a ngibukui. Ebelukwaari ngaurukukui ka ngikameak kech. Edakarosi ngangolei ka ngikameak kech.

²³Serubabel, ekasuban etich kang, akolongit ngina, kaseuni ayong iyong topolok a ekiro kang. Iyong ngesi kaseu ayong.” Akuj Namerikanyer alimu nguna.