Read turkana Sekaria 10 Bible Online

Sekaria 10 - turkana bible

Sekaria 10

¹Kilipa Ekapolon Akuj akiru na ngirupei. Ngesi eyaununi ngidowon a akiru. Ngesi eyaununi ekidam kiturup ngamanat kotere itwaan daang.

²Ingalaate ngamuk na ilamilamere kesi, alioko isemeete ngimurok anamaliteny. Ani lua ngakies, irujaate alioko. Ani lu isililingete ngitunga, erai akisililing kech apasit. Ngakiro nguna erimitotor ngitunga a Yuda akwap loger a ngamesekin ana echakara. Aanyut kesi ngichan ani emamakar ekeyokon.

³Angoit ayong eleleba kotere ngikeyokok lugelayek lu epolokinito ngitunga kang. Ichiekiarito kesi ngitunga kang, erirae ayong kesi. Ayong Akuj Namerikanyer, eyoki ngitunga a Yuda lu eraakasi ngamesekin kang. Etiliwori kesi angole kang nakapiranan alojie.

⁴Alotunga a Yuda, epete ngikapolok ngigelagelae. Epete lu ikote amoru naapolon igangit akai, ka lu ikote apir a eam, ta lu egogong loger a akau ana ejie.

⁵Ejiete ngitunga a Yuda loger a ngitunga alukajwok kipudata ngimoe kech alochoto a ngirotin. Ejiete kesi kainyo ayong Ekapolon Akuj kirukit ka kesi. Emunyarete kesi tani lu edokito ngangolei.

⁶“Etogogongi ayong ngitunga a Yuda. Ayuuni ayong Ngisirael, lu eraakasi alesit a Yosep. Kesieniyete kesi ayong atobua nawiyei kech. Tosub nyengero kolong ayong kesi. Kainyo ayong arai Ekapolon Akuj na arai Akuj kech. Atachuni ayong ngakilipasinei kech.

⁷Ikokinete Ngisirael ngikajwok alojie. Elakarosi loger a ngitunga alu emasito emuna. Ingolikinete ngide kech nguna talakaros, kilelebun alakara lotai kech, kotere daang na asub ayong Ekapolon Akuj.

⁸“Anyarauni ayong ngitunga kang atochunak wapei. Kainyo ayuu ayong kesi, talalaketa loger lokolong sek.

⁹Tani kolong kealarit ayong kesi lobukui, tani anakwapea anakalonak ketamunete ayong. Idongete kesi ka ngide kech eyarete tobongosi nawiyei kech.

¹⁰Abuuni ayong kesi alo Misiri, achununi anakwap a Asiria. Toloma nakwap a Gilead ka Lebanon, kilelebun todidinger akwap.

¹¹Ani itorete kesi nanam a ngichan, arami ayong Ekapolon Akuj ngitoroi, toon nituluk a angolol a Nili. Etuborio ekinis a Asiria, sodi torotok apolou a Misiri.

¹²Etogogongi ayong ngitunga kang. Iwapete kesi ngakiro kang ketalakasi ayong. Ayong Ekapolon Akuj alimu nguna.”