Read turkana Sekaria 11 Bible Online

Sekaria 11 - turkana bible

Sekaria 11

¹Ee Lebanon! Tangaa ngidorin kon, sodi tonomia akim ngichekereng kon!

²Ee ngidomou, kigoro tosutonokisi, kainyo aukor ngichekereng. Enyasun ngikito lukebuseak! Ngichokei a Bachan, kigoro tosutonokis kainyo atub amoni nakamutonon.

³Kiira akigoro na esutonokineta ngikarikok. Adaun ekipur kech! Kiira ngingatunyo irurumaate. Enyasun amoni a angolol a Yorudan.

⁴Katolimok ayong Ekapolon Akuj na erai Akuj kang tama, “Toliwor iyong ekeyokon[5] a ngamesekin ana elosio akingol.

⁵Ngulu egielete ngamesekin nguna, nyeriangakinosi na engoleta. Ani ngulu agialarete, etamarete, ‘Ekapolon Akuj kipuroe! Kibar tokona sua!’ Tani ngikeyokok a ngamesekin kanu, nyisieniyete ngamesekin nguna.” (

⁶Tolim Ekapolon Akuj tama, “Nyeringa nabo ngitunga a akwap kana kesiniyete ayong. Ewaakini itwaan daang kwap ekarikon keng, ewaak itwaan daang kwap ekapolon keng. Ichiakiarete ngikapolok akwap, nakaneni nyayuuni ayong ngitunga anakan kech.”)

⁷Abu ayong atoliwor ekeyokon a ngamesekin ana adikino engolio, kainyo apot ngimuchurus a ngamesekin kegira ayong lotich. Atoting ayong ngaburoi ngaarei. Atanyara apei “Ajokis” atanyara nache “Akimorikin” sodi atolot akiyok ngamesekin.

⁸A elap a epei, ataar ayong ngikeyokok nguuni luaronok. Apot kesi katakadakis ayong, katoremokinos kesi dang ayong.

⁹Atolimok ayong ngamesekin atama, “Nyaliwor ayong ekeyokon kus. Kimiekisi lu ejoikinit etoakete totoaka, ani lu ejoikinit emunyarosi tomunyaros! Ani lupiyayek tomunyaros make.”

¹⁰Atolem ayong aburo kang na anyaritae “Ajokis” atobil kidodiu atamar abil achamunet nakolong achamakin Ekapolon Akuj ka ngitunga keng.

¹¹Tobilae achamunet ngina akolongit napei ngina. Ani ngimuchurus a ngamesekin lu keteete ayong, apot toyena atamar abu Ekapolon Akuj kiruor anakiro ana asubi ayong.

¹² Ani erumor atolimok ayong kesi atama, “Ani kingolikinito atamar itemokino, kitanyamae ayong ngaropiyae na eyokiyo. Ani kingolikinito atamar nyikitanyamete, totinga.” Apot kesi ketemokis ayong ngakabelebele a ngaropiyae ngatomwon-uni toliworos ngaropiyae ketanyamete kesi ayong.

¹³Katolimok ayong Ekapolon Akuj tama, “Kiwaak ni iwaanakinio ngaropiyae a akai a Akuj.”[6] Arai ngaropiyae na ketanyamio ayong nguna na itemokino kotere etich a akai a Akuj. Atolema ayong ekachak ni iwaanakinio ngaropiyae a akai a Akuj.

¹⁴Ani erumor atobil ayong aburo na ngaarei na anyaritae “Akimorikin” sodi tobilar akimorikin a Yuda ka Isirael.

¹⁵Abu nabo Ekapolon Akuj kesuruor ayong tama, “Toliwor nabo ekeyokon, nakaneni toliwor tokona ekeyokon loaronon!

¹⁶Kainyo ayauni ayong nakwap ekeyokon lo nyechoikinit amesek na echakara, kori nyesakari na ewoliyorit, kori nyitedeki na edeak, kori nyitani na nyedeaka, pearai enyami naatumak kibeibe tani ngimolokony.

¹⁷Oitiakoi kare ekeyokon loaronon, lo imiekini ngamesekin keng! Nyope edungio ekileng akan keng, ani akongu keng na aloteten topuyokinae! Nyope elilimiyorea akan keng, tomudukan akongu keng na aloteten.”