Read turkana Sekaria 12 Bible Online

Sekaria 12 - turkana bible

Sekaria 12

¹Erai akiroit naga aka Ekapolon Akuj kotere Isirael. Ekapolon Akuj nakolong apetakini adis, tosub akwap, ka ainakin itwaan akiyar, ebala,

²“Edikino ayong etiliwori Yerusalem ekopo a emuna. Tamata ngibukui lu idunyatar kimatamatakinos loger a ngitunga alu irakarit epurot. Ani eremio ere a Yerusalem, eremio tani ngirerea daang a akwap a Yuda.

³Akolongit ngina, etiliwori ayong Yerusalem amoru naapotion alotunga kadaang. Daang lucha esakete adakun amoru ngina, ewanasi. Eremete ngibukui daang ere ngolo.

⁴Akolongit ngina, etubuli ayong ngangolei daang sodi esikerepik ngikameak ngangolei daang. Achoikini ayong ngitunga a Yuda, nakaneni etumudukani ngangolei a ngimoe kech.

⁵Ngesi etamareta ngimacharin a Yuda, ‘Ngitunga lu elomito Yerusalem, eanyunete ngikilinga ani eyei Akuj Namerikanyer na erai Akuj kech.’

⁶“Akolongit ngina, esikwaanikini ayong ngimacharin a Yuda ka akim na enoki anakito. Ee robo, kori ikokinete akim na enoki alokiding amana na ebwangit. Emunyarete kesi ngibukui daang lu idunyatar. Nakaneni ibooyete ngitunga a Yerusalem alore kech nikaalimon.

⁷“Esidwangi ayong mono ngajorei a Yuda, sodi nyiidwang ekipur a ngalesea a Daudi ka lo a ngitunga a Yerusalem, nyiidwang lo a ngitunga aluche a ekitela a Yuda.

⁸Akolongit ngina, etowei ayong aupwal kiriam ngitunga a Yerusalem, toliwor ni epalag noi anikech, egogonger kikok ekapolon Daudi. Erikete ngalesea a Daudi kesi loger a emalaikat a Ekapolon Akuj, kikokis Akuj alope.

⁹ Akolongit ngina, enyasuni ayong ebukut daang lo eremi Yerusalem.

¹⁰“Ngalesea a Daudi ka ngitunga luche a Yerusalem, elelebikini ayong etau lo a ngisien ka lo a akilip. Eanyungarete kesi lokolong echumete, kikaloikis loger a ngitunga alu igorosi kotere ikoku kech ni erai ipei bon, kori ikalounete lokojokon loger a itwaan ani igoror iuriuna ni ekingaren eriaba.

¹¹Akolongit ngina, emini akigoro naaronon noi Yerusalem na ikoni akigoro a Adad-rimon[7] anaro a Megido.

¹²Igoro akwap daang etia ni etia, igorosi ngimacharin daang a ngapei-pei, ngikiliok a akech, ngaberu a akech. Emachar a Daudi, ngikiliok a akech, ngaberu a akech. Emachar a Nasan, ngikiliok a akech, ngaberu a akech.

¹³Emachar a Lawi, ngikiliok a akech, ngaberu a akech. Emachar a Chimei, ngikiliok a akech ngaberu a akech.

¹⁴ Igorosi ngimacharin daang lu idongete, ngikiliok a akech, ngaberu a akech.”