Read turkana Sekaria 13 Bible Online

Sekaria 13 - turkana bible

Sekaria 13

¹Ebala Akuj Namerikanyer kona, “Akolongit ngina, engaario eitanit kitaleu ngalesea a Daudi ka ngitunga a Yerusalem anakisech kech ka amina ngakujo nagelayek.

²Ngirwa ngulu, ekisari ayong ngirora a ngakujo anasubuna kadaang anakwap, tojongoi alimit kesi anakwap nabo jik. Atubori ayong anakwap itwaan daang ni iwoga ebala arai ekadwaran, emoria aapei ka etau a ekimue a ngakujo anasubuna.

³Ani kemin itwaan iche ni erubakinit edwari, ilamete apakeng ka itiokeng lukolong auriyete ngesi tamasi, ‘Nyiyari iyong kainyo iruoro iyong alioko ilimit ekiro a Ekapolon Akuj.’ Ani kedwar ngesi, ichumete apakeng ka itiokeng.

⁴Akolongit ngina, irumete ekadwaran daang ngileech kotere ngakisingolikinet na edwarea ngesi. Nyenapi ngesi eworu lo a ngajul esaki akingalare ngitunga.

⁵Pearai elimuni tama, ‘Meere ayong ekadwaran. Arai ayong eketan ngamanat, ngesi ayaritor napei kolong a ekiditeu.’

⁶Ani kingit itwaan ngesi tama, ‘Ngaka inyo ngaporos na eyakasi nakwaan kon nugu?’ Etachakini ngesi tama, ‘Aanyuni ayong alokai alopae kang.’ ”

⁷ Ebala Akuj Namerikanyer kona, “Tonyou kare, akwara! Kikeun kichum ekeyokon kang. Ee robo, ekeyokon lo esubi etich kang. Taara ekeyokon, topetaros ngamesekin. Etorwaari ayong akan kang etijik ngitunga lupalag.

⁸Anakwap kadaang, anatiaket anauni a Ngisirael anakwap, emunyarosi ngatiaket ngaarei, kidong atiaket apei bon.

⁹Atiaket napei idongi ngina, etemi ayong ka akitoseg loger lo itosegea itwaan akwangat, ee robo, loger lo itosegere egolit. Kelipete kesi ayong kaneni, sodi atatachu ayong ngakilipasinei kech. Atamari ayong, ‘Eraakasi lugu ngitunga kang.’ Etamarete kesi, ‘Ekapolon Akuj erai Akuj kosi.’ ”