Read turkana Sekaria 14 Bible Online

Sekaria 14 - turkana bible

Sekaria 14

¹Kingolikisi a, enangi akolongit a Ekapolon Akuj na ekorere ebari lo angatario anikus, tokorae iteete esi.

²Echununi Ekapolon Akuj ngibukui daang toremo Yerusalem. Elemario ere ka ngakais kus, totikoonoroe ngaberu kus. Erikio epewae a ngitunga a Yerusalem, ani luche lu idongete, nyichiekete nikalapatan a ere.

³Ani erumor enyouni Ekapolon Akuj kitiji ngibukui ngulu, loger lo itijio akolongit na ejie.

⁴Akolongit ngina, ewei ngesi alomoru a ngikito a akimiet alo eyei kide Yerusalem. Etiakio emoru ngolo ngatiaket ngaarei napei alo kide tanang too, min adipo naapolon kiding. Eteni epewae emoru kwap, toten ewae loche kuju.

⁵Imatarosi esi kitoro nadipo na etiakit emoru ngaarei. Imatarosi esi loger lokolong amatarotor taapaakus na arikirikokinea akwap ekaru lo araakar Usia ekapolon a Yuda. Ebuni Ekapolon Akuj, na erai Akuj kus, kirukut ka ngulu italeuno daang.

⁶Akolongit ngina, nyemini akatorot kori eloch.

⁷ Erubakini akwap erai apaaran jiik. Ekapolon Akuj bon eyeni ngirwa ngulu. Nyemini apaaran kori akwaar, kainyo tani ebong, erubakini akicha eyei.

⁸Ngirwa ngulu, eleleunete ngakipi na akiyar alo Yerusalem. Ngakipi nguna epewae, elelekinete nanam a Amakat ani epewae tolelekis anam a Mediterenian. Erubakinete ngakipi nguna eleleete nakamu ka nakiporo.

⁹Ekapolon Akuj bon eliwor ekapolon a akwap kadaang. Akolongit ngina eliwor Ekapolon Akuj apei bon, nabo eliwor ekiro keng epei bon.

¹⁰Akwap daang, napei alo Geba alokwap tanang Rimon alokuju, eliwor aro nilapat. Edirisi Yerusalem kilany akwap daang na idunyatar. Enyouni ekukuor a ere kangolo alokidor a Benjamen tanang lokidor Lokiitoret lokolong sek ayei ekidor eche. Enyouni nabo alopem a Ananel tanang loboro luchiet ngamusabib a ekapolon.

¹¹ Elomete ngitunga lore a Yerusalem kainyo nyeringa ere ngolo epete ngilam. Ee robo, elomete ngitunga neni nikaalimon.

¹²Ngitunga daang lu epote akitijwore ngitunga a Yerusalem, edekakinosi ngidekesinei lukaarak lugu. Ebosete ngawat kech eringa eyarete. Ebosete ngakonyen kech eringa eyakasi nachukulei a ngakonyen, ani ngangajepa tobosa eringa eyakasi nakituk kech.

¹³Akolongit ngina, eyauni Ekapolon Akuj ebuloi loaronon noi, kitijik ipei kech daang erukitos keng.

¹⁴Itijikini Yuda Yerusalem. Engatarete kesi ebari a ngibukui kadaang alu idunyatar akwap a Yuda. Echunakinete kesi egolit ka akwangat ta ngiworui lukaalak noi.

¹⁵ Edeke lokaaran ngolo, etingi tani ngangolei, ka ngitieng lu ikwaan ka ngisikiria, ka ngikaala, ka ngisikiria ta ngitieng daang lu eyakasi nadakar a ngimoe.

¹⁶Ani erumor itwaan daang ni epuun alobukui alu epote akitijwore ngitunga a Yerusalem, eliwor eloseene Yerusalem ekaru daang, akilip Akuj Namerikanyer ka alakar kotere esukukuu a Ngikalea.

¹⁷Ani kewou ebukut eche anakwap alosit Yerusalem akilip Akuj Namerikanyer nyerami akiru akwap kech.

¹⁸Ani kewout Ngimisiri asubakin esukukuu a Ngikalea, etingi edeke lopei kaaran lo etingi ngibukui lu ewounete asubakini esukukuu ngolo.

¹⁹Eriras ngolo eanyunete ngitunga a Misiri ka ngibukui daang lu ewounete asubakin esukukuu a Ngikalea.

²⁰Akolongit ngina, igirakinio lokaadongoi a ngangolei ngakiro nugu, “Italekinitoe Ekapolon Akuj.” Ani ngamoti na eyakasi kai a Akuj, ikokinete ngatubwae na eyakasi ngaren ekeno a ngakipeyos.

²¹Italeunio amot daang alore a Yerusalem ka akwap a Yuda, toliwor ilipitere Akuj Namerikanyer. Ngitunga lu elemuununete ngakipeyos, ikulaate akiring a ngakipeyos. Akolongit ngina, emam ngimuchurus epete kai a Ekapolon alo erai Akuj Namerikanyer.