Read turkana Sekaria 5 Bible Online

Sekaria 5 - turkana bible

Sekaria 5

¹Ani engoliari ayong nabo, ataanyunga akitab na eporit alokidiama.

²Kengit ayong emalaikat ngolo tama, “Nyo itee iyong?” Atatachu ayong atama, “Etee ayong akitab na eporit alokidiama, erai aoyau keng ngamitae ngakan-koomwon, tarai aurianut ngamitae ngoomwon ka anus.”

³Abu ngesi katolimok ayong tama, “Tooma akitab ngina igiritae ngilam lu ineinearete akwap daang. Ewae epei a akitab igiritae atamar itwarakinio ngikokolak daang anakwap. Ani ewae loche, igiritae atamar ngitunga daang lu ikongete iruorosi alioko, esubere ngakiro napei nguna.

⁴Ebala Akuj Namerikanyer ngesi alope ayauni ngilam ngulu, tolomasi kai a ekokolan kadaang ka itwaan daang ni ikongi kiruor alioko elimit ekiro kang. Iboikinosi ngilam ngulu nakais kech, sodi tonomiasi ngakais nguna wadaang, ngakito ka ngamoru aapei.”

⁵Bu nabo emalaikat nikang tama, “Kingolia taanyunga ibore ni ebunit!”

⁶Engit ayong atama, “Nyooni ngini?” Tatachu ngesi tama, “Erai ibore ngini akikap na eyei akisech[2] a akwap kadaang.”

⁷Ayei akikap apukenit na asubunitae anasuat anaapotion. Ani iwolorio apukenit, engolik ayong aberu ibooyi alotooma akikap ngina.

⁸Katolimok ayong emalaikat tama, “Eweikinit aberu naga aronis.” Ani erumor kijukak emalaikat ngolo aberu ngina nakikap, tonikenik akikap.

⁹Ani engoliari kidiama, ataanyunga ngaberu ngaarei eporunito ni ayei ayong, atia ngabeben kech na kata pelekuto, tolemut kesi akikap topororeta.

¹⁰Engit ayong emalaikat atama, “Aliwae eyaarito kesi akikap?”

¹¹Katatachak tama, “Eyaarito Babilonia, todukokis akai keng. Ani erumor akai ngina, esipokinio akikap neni.”